Wäördje van de Getuge
Langzaam geit ‘t richting ‘t Boerebal in Óffebek, terwiel veur nag sjteeds erg drök zien mèt de veurbereijinge. Toen veur door ‘t aansjtaonde broedspaar gevraog zien óm de rol van Getuge te vervulle, höbbe veur uiteraard volmondig Jao gezag. Maar sjtiekem dachte veur waal, wat geit dit allemaol veur ós beteikene? Inmiddels zien veur ‘n paar maondj verder en zien de kontoere al behuuerlik zichbaar. Dit wil dus zègke , det ‘t noe richtig begint te kriebele en det veur sjtiekem soms al get vóchtige hendjes kriege.
Vreuger ginge veur altied op vastelaovesdinsdig nao de Paerssjtal óm dao de Boerebroelof te viere. Det heel dus in: Pap en mam sjtinge aan de bar en veur ware rundjes aan ‘t renne óm de kerktore, dae dao toen nag sjting. Óngertösse waerde d’r binne, ‘t huwelik voltrokke en flink gefieës ónger ‘t genot van huidvleis op roggebroeëd, mèt natuurlik ‘n lekker glaeske beer. Jaore later ginge veur getrouw kieke Waem ónger de hood oet kwaam tiedens de klanke van “Óffebek…det blief Óffebek”.
Inmiddels zien veur ‘n aantal decennia verder en gaon veur wéér nao de Paerssjtal. Noe neet mier óm rundjes óm de kerktore te renne, of óm te kieke waem ónger de hood oet kump, maar óm zelf deil oet te make van dees traditie. Ós is dus gevraog óm sjtrakkes ‘n handjteikening te zètte ónger de trouwakte en dus daomei ‘t onechte huwelik good te keure. Ómdet ‘t aansjtaonde broedspaar in ‘t echte laeve al jaore gelökkig getrouwd is, zalle veur dit aankómmend huwelik den ouch neet in de waeg sjtaon.
Uiteraard haope veur det geur d’r allemaol bie ziet en det de Paersjtal oet zien voge bars, as veur ‘t ieërs ‘t nieje Boereliedje ten gehuuer waert gebrach. As rasechte Ruiverse, gaon veur de van oorsjprong Óffebekse traditie veurtzètte en same mèt alle Windjbuujels en Windjbuujelinnekes d’r ‘ne geweldige Vastelaovend van make. En sjtiekem haope veur, det d’r tiedes ós fieës, boete ‘n aantal kinjer ‘n rundje óm de kerk aan ‘t renne zien en dao net zón sjoeën herinneringe aan euverhaje.
Toet binnekort.
De Getuge
