52e BoereBroedspaar Astrid & Fred Simons-Bongers
Óffebèk, 22 fibberwari 2014
In ós residentie Café Zaal De Paerssjtal kwaam op 22 fibberwari 2014 om 22 oer 11 ′t nieje BoereBroedspaar Astrid & Fred Simons-Bongers op de klanke van “Óffebèk blief Óffebèk” ónger de tradisionele hood oet.
‘T Bruudje: Astrid is 39 jaor jóngk en gebaore oppe Hazekamp in Óffebèk. Dochter van Piet Bongers en Nel Timmermans. (Peter van Marie van de Reus en Sjaak van de Kogel en van Nellie van Baer van de Sjansemaeker oet Tegele). Astrid is werkzaam bie de Hema oppe Ruiver. Astrid is aad lid van de KPJ Ruiver en is lid van Jong Nederland Óffebèk en leidster van de Maxioren 2. Ouch is Astrid lid- en besjtuurslid van de BoereBroelof en maak deil oet van de kinjer kemissie. Dao bie is Astrid ouch nag “Opteikenaer” bie de Sjötterie in Beesel bie de windjbuks wedsjtrieden. De Broedegom: Fred is 47 jaor jóngk en gebaore in Offenbeek aan de Bergerhaofwaeg. Zoon van Thei Simons en Bep Rutten. (Thei van Frits van sjlèchter Tuën en An Alers oet Aad Dörp in Beesel en van Bep van Rutte Hein en Johanna Dennessen van de Mariasjtraot). Fred werk al mier as 25 jaor bie Hovuma Magaziensjtellinge in Óffebèk as projekengineer. Is ouch aad lid van de KPJ Ruiver en sinds 2001 lid en veurzitter van Jong Nederland Óffebèk. Lid van de BoereBroelof en zit same met zoon Lars bie de drumband van de Sjötterie in Beesel. Fred werk gaer in de tuin en helt kiepkès en geite.
Astrid en Fred zien de trotse elders van Eline, 16 jaor en Lars, 13 jaor. Samen woeëne ze aan de Bergerhaofwaeg 11b in Óffebèk.
As getuge sjtelle veur uch veur:
Helga & Patrick Boots-Taal Kinjer Bo & Cheng
Nicole & Richard Bongers-Dorssers Kinjer Maud & Eef
Names de Broedspare-kemissie Sylvia Schoolmeesters en Mat Bongers wille veur uch van herte oetnuüedige óm nao de Boerebroelof optoch te kómme kieke op Vastelaoves dinsdaag 4 mieërt en aansjloetend óm 15.00 oer de trouwerie bie te woeëne in ós residentie Café Zaal De Paerssjtal. De optoch route zuut d’r as volg oet; Vertrek bie ós residentie Café Zaal De Paerssjtal richting sjpaorwaegeuvergang wao veur V.V. de Windjbuujels welkom heite in ’t Boereriëk. Vervólges via de Keulsewaeg truuk richting Mariasjtraot, Bergerhaofwaeg, Sint Annasjtraot truuk nao ós residentie Café Zaal De Paerssjtal. Names de Boerebroelof winse veur idderein ‘nne sjoeëne te gekke en veural gezellige Vastelaovend!
