Regelemente toekènning van de “Windjse Windjbuujel”

De vereiniging kent leje van verdeenste en iereleje, mèr de hoeëgste óngersjeiïng van de vereniging is die van de “Windjse Windjbuujel”. ’t Is ’n óngersjeijing die zieër selektief, en zaeker néét jaorliks, aan ‘nne Ruiverse miens of vereiniging wuuërt oetgereik. Doel van de toekenning van de ‘Windjse Windjbuujel’ is: Publieke hulde en ierbetoeën bringe aan eine of mieërdere persoeëne en/of insjtellinge die zich op biezónjere en zeer verdeenstelikke wieëze höbbe ingezatte veur ’t Windjbuujelriek, aevel neet óm of vanoet kómmersjéle doelsjtellinge.

Oetgangspunte met betrekking toet de toekenning van de ‘Windjse Windjbuujel’:

• de kandidaat haet zich biezónjer verdeenstelik gemaak veur ’t Windjbuujelriek op sósjaal-maatsjappelik- of kultureel gebied in ’t kader van ’t Vastelaoves-gebeure of
• de kandidaat oet ’t Windjbuujelriek haet zich boete ’t Windjbuujelriek biezónjer verdeenstelik gemaak op sósjaal-maatschappelik- of kultureel gebied in ’t kader van ’t Vastelaovesgebeure.

Toekenning gebeurt door ’t besjtuur van de Vastelaovesvereining op veurdrach van de Windjse Windjbuujelkemissie. Dees kemissie besjteit op dit moment oet de hieëre Wiel Verlinden, Leon Smolenaars, Andy van Helden en Roy Linssen. De óngersjeijing besjteit oet ’n beeldje van de handj van de Ruiverse kunstenaer Joep Nicolas met ’n biepassende oorkonde en medalie. Door de toekenning óntsjteit veur de óntvanger ’n persuuënlik rech veur ’t laeve op vrieje toegang toet vriejwaal alle vastelaovesaktiviteite van Vastelaovesvereiniging ‘De Windjbuujels’.