Veur weite neet baeter, den det Carnavalsvereiniging De Windjbuujels officieel is opgerich op 8 november 1950. Ruiver wilde in naovolging van häör buurgemeinte ‘nne georganiseerde vastelaovend. Ut carnaval vieren zoot de miense oppe Ruiver , Óffebèk en Lieëuwe in ’t blood.
Veur de oorlog waerde d’r al vuel gekostumeerde bals georganiseerd door de zaalhajers en vereiniginge. Dees bals gove de börger mood, al moste väöl miense, net as de euverheid, euver de sjtreep getrokke waere. Nao Twieëde Waereldoerlog kwaam alles in ein sjtruimversjnelling. De miense ginger ruumer dinke en wilde met ein baeter gevulde beurs ouch waal wat mier ontsjpanning den alleein de plaatselijke kermis.
Bij de oprichting van De Windjbuujels waas d’r van enige organisatie nog gén sjpraoke. D’r waas ierder sjpraoke van ‘nne groep vrunj, die veur de carnaval inkele kiere bie elkaar kwame om enige sjtructuur aan te bringe in dit fieës. Deze groep grueijde oet toet toet ein Raod van Zeve met as doel om ein carnavalsvereiniging op te richte veur hieël Ruiver en Óffebèk, die de naam “De Windjbuujels” kreeg.
De naam is waarsjienlik aafgeleid van “windj” en “gén geld” waoveur de miense oppe Ruiver en in Óffebèk in de buurgemeinte bekend ware. De optoch in 1952 met de Raod van Zeve waerde ein groeët sukses. Nao deze historische optoch kreeg men ein echte Raod van Ellef en ’n bestjtuur. De georganiseerde carnaval in ’t Windjbuujelriek waas ein feit. In 1984 waerde de naam van carnavalsvereiniging verangerd in Vastelaovesvereiniging “De Windjbuujels”
