Óffebèk, 18 fibberwari 2017.
In ós residentie Café Zaal De Paerssjtal kwaam op 18 fibberwari 2017 ′t 55e Boerebroedspaar Hans en Lianne Boonen-Bongers op de klanke van “Óffebèk blief Óffebèk” ónger de tradisionele hood oet.
Veur zien d’r gruuets op óm uch dit sjoeën boerebroedspaar veur te kènne sjtelle:
‘t Bruudje Lianne is bienao 41 jaor geleje gebaore in Óffebek. Dochter van Mat en Wies
Bongers-Stroeken die boerebroedspaar ware in 1986.
Lianne is de zus van Nicole Nooyen-Bongers en Twan Bongers ( jeugprins 2000). Same met Hans haet Lianne 2 zeuns Stijn en Gijs, die zitte allebei bie de Raod van 11 van Jong Nederland en gaon dit jaor veurop als Jeugprins Gijs de 1e en adjudant Stijn.
Door de waek geit Lianne nao Belvend óm sjlaaj te sjnieje bie Van Gorp-Greenfood. 
Lianne is al vanaaf 1995 lid van Jong Nederland, wao ‘t nag idder jaor meigeit op zomerkamp, de lètste 2 jaor as kaoksjtaf.
Ouch zèt Lianne zich al 8 jaor in veur de ouderraad van Basissjoeël Meander, dao regelt ‘t ónger angere de sjportdaag, ‘t paosontbijt en ‘t waofelbakke mèt Sintermerte.
Al ongevier 11 jaor duit Lianne knutsele mèt de dames van de Windjbuujels veur ’t Windjbuujel-winkelke. Verder duit Lianne gaer kaoke, ‘t leefs veur väöl miense tegeliek. Ein buffetje make of get angers lekkers.
Same mèt Hans en de jónges geit ‘t gaer op vekantie nao Oosteriek mèt häöre vouwwage. Alle tied dae ‘t den nog euverhèlt kiek ’t gaer tillevisie en den nao ein van die programma’s wao ‘t waal ens ein träönke bie kèn laote of goede tijden, slechte tijden.
De broedegom Hans is bienao 4×11+4 jaor geleeje gebaore oppe Industriejstraot, in de
huidige wuuening van ‘t broedspaar. Hae is de aadste zoon van Lam van Sjarel (Boonen) en
Nellie Gubbels. Die allebei häör sjpaore verdeent höbbe in de Ruiverse vastelaovend
(Windjsewindbuujelhajer).
In 1984 zat Hans zien ieërste eige sjtappe in de vastelaoveswaereld bie de raod van 11 van
Jong Nederland. Dao waerde hae in 1986 jeugprins, mèt as gevolg det hae toet op hede lid is
van de AJO (aad jeugprinse Óffebek).
In 1993 waas hae groeëte prins van de Windjbuujels. Same mèt zien Adjudanten Harry
Franssen en Erik Schoolmeesters (noe burgemeister van de boerebroelof) vormde zie ’t trio
det jaor en regeerde ónger ‘t motto: Haaj ’t sjoeën!
Daonao is dr lid gebleve van de raod van 11. Van 2003 toet 2016 waas hae lid van de prinsecommisie, waovan ouch nag 11 jaor as Vors van de Windjbuujels (2004 toet in 2015). Noe is d’r nag sjteeds besjtuurdlid, redactielid van ’t Windjbuujelmagazine, lid van de optochkemissie en boerebrunchkemissie (die ‘m motte misse…).
Neet allein op vastelaovesgebied is hae aktief. Hae is bienao 40 jaor lid van Jong Nederland,
wao hae groep dreijt mèt de aadste kinjer en idder jaor meigeit op zomerkamp.
Biej de voetbalclub VVRuiver is hae al ein aantal jaor jeugleider van teams van Stijn of Gijs.
Dit jaor bie de JO13-3 (de D3). Verder fiets hae gaer oppe wielrenfiets en mountainbike en is
hae lid van TWC De Paerssjtal.
Oh jao, aaf en toe mót d’r ouch nag werke …… bie de gemeinte Venlo.
As d’r den thoes is en neet op paad hoof veur ein van de ierder geneumde aktiviteite den
knómmelt d’r gaer in de haof of zit zich mèt ’n sjpannend book in ‘ne comfortabele sjtool.
Boerefemilie
Broor van de broed: Rob Boonen
Zus van de broedegom: Ellen Bongers-Bergs
Paeter: Marcel Nooyen
Maeter: Kim Engbrocks-Huberts
Buurman: Jan van Dijk
Buurvrouw: Anke Boonen-Janssen
Sirremoniemeister: Twan Bongers
Sókkertant: Nicole Nooyen-Bongers
Getuge van ’t bruudje: Ralph Engbrocks
Getuge van de broedegom: Nicole van Dijk-Engbrocks
De broedskinjer: Job, Loek, Lieve, Finn, Fleur, Len, Gijs, Pien, Koen, Jolijn, Stijn, Mijke, Bart
