‘Veur make deze Vastelaovend!’ Hoegheid prins Sjuul I en adjudanten Max en Maik oetgeroope!
Ruiver 31 januari,
Nao vandaag nog 11 volle maonde te gaon in ut nieje jaor, mer veur dit nieje trio is ut hielemaol zeker; Vastelaovend kènt gèn tied’.
Zoe- as idder jaor waerde gekoppeld aan t vastelaoves thema ein prachtige decor neergezatte door os bühne kemmissie, dit jaor moagte dees manne geneete van ein werme ontvangs in de bedriefshal van Johan Vossen! En auch dit jaor sting dr dankzij dees techneuten weer ein waar kunst-stôkske klaor. Ein tiedmessjiene met diverse klokke omringd die os in alle opzichte de tied leet verslaon.
Os grand-café de Sjakel loog dr weer fantastisch biej op ut moment det Net Oet Bed om 11 euver 9 op gehiel eige wieze ut prinsebal oäpende met ein prachtig niej nummer. Dae opmaot waas ut sein veur Vors Jeroen om met zien PeeKaa ut podium te betraeje en dr waerde ein aantal poginge gedaon om de tiedmessjiene aan de gang te kriege. Oeteindelik belandde veur den toch in ut goeije jaor, 2026, en kos dao eindelik Sjuul Dohmen zich presenteren as Prins Sjuul I.
Naodet de hoegheid bekend waas, waerde dr netuurlik in de zaal volop geraoje nao ziene linker en rechter, welke vrunj waare inmiddels waal erg lang weg om efkes te gaon plasse?
As rechter en linker, waerde Max Geraedts en Maik Stroeken geprizzenteerd aan alle aanwezige Windjbuujels en Windjbuujelinnekes!
Ein flitsend, jongk trio waas zoe aangekleijd en kos met ‘Danse’ laote zeen det de spanning gauw van huer heupe aaf gevalle waas.
Same met de veurzitter en de dames van ut trio, waerde dr geproost, waonao Net Oet Bed verder knalde met haör show om ut Prinsebal op gang te kriege.
De hoegheid, prins Sjuul I, en zien adjudante doon inmiddels alweer ein aantal jaore meij in de Ruiverse optoch met eine wage dae gebouwd waerd. Det bouwe geit haör alledriej good aaf, want in t motto; ‘Veur make deze vastelaovend!’ zit auch de verwiezing nao de goede hendjes van dees drie vakmen.
Prins Sjuul is as ongernimmer, met zien pap same actief in haör bouwbedrief veur allerlei renovatie, verbouw en tegelklusse. Met zien 22 jaor is Sjuul de ein nao jongste Prins in de historie van de Windjbuujels. Hae woent same met zien vriedin Lotte oppe Keulsewaeg, eine hook verder den de prins van ut aafgelaupe jaor. In 2016 moag hae al werm dreije in zien rol, want toen waas hae jeugprins in Offebek biej Jong Nederland.
Adjudant Max is auch woenachtig in Offebek, same met zien vriendin Loïs. Hae is veural met ut bewerke van hout erg henjig, en steit den auch biej Timaro oppe loenliest as vakman. Op dees locatie heelp hae in ut verleede auch al meij aan inkele Windjbuujel bühnes. Max is 25 jaor en dao meij de aadste van ut trio. De rol van adjudant is veur um neet onbekend, want biej Windjbuujels Jeug haaj dr dees ieër in 2017.
Adjudant Maik is met zien 24 jaor auch al eine ervare vastelaovesvierder. Waas in 2011 de ieërste broedegom in ut jeugboerebroedspaar, en moag ein jaor veur Sjuul in 2015 de Offebekse jeug veurgaon as prins. Maik woent taegewoordig oppe Ruiver, same met zien Didde. In ut dagelikse laeve verdeent hae as monteur de kos biej Schreurs Verwerminge en Installaties. De adjudante höbbe oppe dinsdigaovend haöre vaste dart aovend vanoet DC Ronckenstein.
Dit nieje trio haet ongeluifelik vuuel zin om ein fantastisch vastelaovesseizoen te gaan make, same met alle Windjbuujels en Windjbuujelinnekes. In ut biezunjer kieke ze den auch oet na haör receptie om dit same met uch te gaon viere. Dees receptie zal dit jaor aansjloetend aan de priesoetreikeing van de kinjeroptoch gaon starte. Waobiej de oapening waerd verzorgd door Lex Uiting en band. Dit zal rond de klok van 16:00 oer zien op zondig 15 fibruari.
Auch de optoch op 16 fibruari is netuurlik ein hoëgtepunt, temier omdet de hoegheid mer de deur hoof oet te stappe, om met de prinsewage te kenne gaon trekke in de optocht! En den netuurlik nog de volgende daag ein prachtige trouweriej van boerebroedspaar Maxie en Bas op de rol!
Veurdet ut zoe ver is, gaon adjudanten Max, Maik én Prins Sjuul I netuurlik nog hieël get plaetskes in ut Windjbuujelrieëk bezeuke om same met alle vierders dr get sjoëns van te maken, want ein dink is zeker;
‘Veur make deze Vastelaovend!’
