Windjbuujels & Windjbuujelinnekes,
‘t Sjpel is begós
En wat veur ein spel. Alles mót geheim blieve, veur sjpraeke sjtiekem aaf, de tillefoon maak euveroere en veur höbbe väöl lol en plezeer mèt mekaar. Veur kènne ‘t idderein aanraoje en den is ‘t sjpel van de vastelaovend nag maar pas begós.
Maar efkes truuk nao ‘t sjtartpunt. ‘t Waas eine zonnige daag in september. Veur krege ein tillefoontje mèt de vroag of veur in de kómmende weak eine aovond allein thoes ware. ‘Joa, det mót waal lökke’, waas ós antjwaord. Einmaal binne gebeurde d’r ein wónjer! Veur krege de vraog of veur kómmend vastelaovesseizoen ’t boerebroedspaar wilde zien. Ós antjwaord: joa, zeker! Sjiek, zoeget maaks se mer eine kier mèt.
Veur kóste aan de sjlaag en dreide ós köpkes euveroere. Wea vraoge veur as getuge? Wea vraoge veur bie ós femilie en welke angere rolle höbbe veur te verdeile? Einmaal alles op ein rieke gezatte, zien veur bie idderein langs gegange. En idderein zag volmondig jao. Os femilie is compleet!
De sjónste tied van ‘t jaor is begós. Veur tèlle aaf nao de elfde van de elfde en het begint steeds mier te kriebele. Ouch oppe Ruiver begint de vasteloavond sjteeds mier te laeve. De liedjesaovond en de blageliedjesmiddig ware in idder geval weer fantastisch. Wat ein opkóms! En wat ein geweldige nummers. Sjiek óm det te zeen. Gefeliciteerd AJO en de Snuupkes mèt het behaole van de ierste pries.
Ongertösse is d’r ouch witte rouk en löp d’r oppe Ruiver eine nieje prins róndj. Ouch is d’r ein nie aadwief gevónje. Ouch veur häör is ‘t sjpel van de vasteloavend begós. Veur winse häör väöl succes en plezeer mèt de veurbereidinge.
Veur duike nag efkes ónger de radar óm ós verder veur te bereide op ós oetkómme 16 jannewari.
Veur spreake ós.
