Dinsdig 11 november 2026.
Wat is ´t toch geweldig óm al die verkleide miense óm ós haer te zeen. Ein groeëte zieë van kleure, gezelligheid, gelach en plezeer.
De 11e van de 11e, altied ´ne sjoeëne daag veur idderein dae van de vastelaovend helt, de äöpening van ‘t nieje vastelaovessezoen. Maar veur ós waas dit jaor toch efkes angers as angers. Veur mótte namelijk ‘n groeët geheim beware en de sjpanning zit d’r al in! Op deze daag höbbe veur ouch ’t ierste deil van ’t daagbook van de prins gelaeze. Profisiat prins van 2026, veur höbbe d’r super vuuel zin in en toet gauw, op ’t Prinsebal!
Iers efkes truuk in de tied.´t Waas ´ne gewuene doordewaekse aovend in oktoeëber. Althans det dachte veur. De bel ging en eine van ós waas thoes. De anger waerde nao hoes gelok en de leugentjes om béswil ware begós.
Veur krege ein sjtök kerboet aangereik. Veur ware sjtil, wäörd haje veur tekort.
Vraoge ze ós óm boerebroedspaar 2026 te waere? Veur kóste ´t neet geluive en veulde ós hiel erg verierd. Lang höbbe veur neet hove te dinke, dus höbbe veur daezelfde aovend nag jao gezag en geproos! En den dringk ’t pas ech door; kómmend jaor aete veur kerboet, laeverwórs en bloodwórs as ontbijt!
De klok begint te tikke. ’t Waerde tied om de getuge te vraoge en den ouch de res van ’t gezelsjap. Dit ouch nag alles in ’t geheim. @Prins van de Windjbuujels veur zien waal beniejd wat veur smoesjes geur höb gebroek.
Gelökkig waar idderein net zoeë enthousias as veur en zag idderein drek “JAO”, veur zien d’rbie. Eigelik hoofde veur dao ouch neet aan te twiefele; zie zien oet ’t zellefde vastelaoveshout gesjneje as veur. Maar wat ´n onbesjrieflik geveul is det: ós gezelsjap is compleet! En… d’r waerde nag mier geproos!
Truuk nao noe. ’t Vastelaovessezoen is geäöpend. Dalik kómme de fieësdaag en wie sjiek deze tied ouch is, ós gedachte zalle aaf en toe aafdwale nao 24 jannewarie 2026, de daag van ós oetkómme, Veur zien noe al aan ‘t genete, van de veurbereidinge die veur noe allein nag moge deile mét ós gezelsjap. Maar veur sjtaon te popele óm de vastelaovend in te gaon. Dit zal d’r zeker eine waere óm noeëts mier te vergaete.
Boerebroedspaar 2026
