Leef Windjbuujels & Windjbuujelinnekes,

Op ‘t moment det ich dit sjrief, kleure de blaedjes van de buim roeëd, gael en greun. En noe zien veur al weer ‘n tiedje verder. De buim zien inmiddels kaal. Keuning wintjer sjteit veur de deur. Zoeë wie ze zègke zien dit de donker daag veur körs. Maar nieks is minder waor. Want donker zien dees daag allesbehalve. Ós donker daag veur körs waere gevöld mèt ‘n hert vol roeëd, gael en greun. Wat ‘ne prachtige tied. En wat ‘t nog prachtiger maak, is ‘t geveul det veur same mèt ós sjoeën boerebroedspaar as boeregezelsjap de vastelaovend moge gaon belaeve.

Want man man man, wat höbbe veur d’r zin in! ‘t Duurt den nog effe maar de veurbereidingen zien alweer in volle gank. Want zoeë-as geur weit is d’r nog vuul werk aan de winkel veurdet ‘t fieës kèn gaon beginne.

Maar mèt dit fantastisch gezelsjap geit det gans goodkómme. Bie de vergaderinge waert der vuul besjpraoke en hie en dao van ‘n natje en ‘n droogje genaote.

Veur mótte ós nog effe geheimhaje. Maar de 24e van januari moge veur ós den eindelik bekènd gaon make aan ‘t groeëte publiek! Degene mèt gezóndj boereverstandj ken natuurlijk al oet de tekst haole waem veur zien. Want ja, zoeë-as det in de traditie pas, zitte d’r in dit sjrieve ouch get tips euver ós identiteit versjaole. Dus veur de puzzelaers ónger ós: succes!

Veurdet ‘t zoeë wied is, höbbe veur netuurlik nog van alles op ‘t programma. Zoals ‘t oetkómme van de Jeugdprins(es) van Windjbuujels’ Jeug en netuurlik ‘t oetkómme van de Bacchus. Bön hiel beniejd waem det weer zal waere. Maar wae ‘t ouch waert, veur gaon knalle mèt z’n alle.

Veur noe wins se veur uch alvas sjoeën fieësdaag en ‘n gezóndj en gelökkig niejjaor.

Names de getuge