Goejedaag same,
Hie ein wäördje van ugge nieje Börgemeister en ziene Ambtenaer.

Ich zal as Burgemeister aaftrappe,

Veur wiste ‘t al, ózze börgemeister Bob Vostermans ging ós geimeinte verlaote en det d’r dus dr ‘ne nieje börgemeister nuedig waas.
Omdet ich vreuger op sjoeël good opgelet höb bie staatsinrichting wis ich natuurlik precies wie det proces verlöp óm te kómme toet eine nieje börgemeister.
Bliekbaar is dao tösse miene sjoeëltied en noe, toch ‘t ein en anger verangerd dao in ‘t gemeintehoes. ‘t Waas veur mich den ouch dudelijk ‘n verrassing det se veur zo’n rol onger ‘t genot van eine Sjroebelaer op zóndigmorge waers gevraog door ‘n toekómstig broedspaar.
Wat ein verantwoordelikheid en wie mót det d’r allemaol oet gaon zeen. Maar as se veur zo’n rol gevraog waers, den zaes se netuurlik JAO kei sjiek!
Die verantwoordelikheid is netuurlik hiel erg belangriek maar det mótte veur ouch neet te groeët make,
det geit mich waal lökke, daovan bön ich euvertuug.
As ich zeen wat zich dao in Den Haag allemaol aafsjpeelt ónger leiding van Dick Schoof den dink ich det ich die boere en boerinne van de Ruiver en Offebek waal mèt de naas de goej richting oet krieg.
En wie det oet mót gaon zeen…
Ós mam zag vreuger al: “‘ne Hoeëge hood, det duit ‘ne miens good”, dus dae is gauw aangesjaf.
En dae höb ich al geregeld op thoes veur de sjpegel as ich aan ‘t oefene bön wie ich as börgemeister noe precies mot sjtaon mèt mien henj.
Ich zoog det altied biej börgemeister Vostermans wie dae oppe foto sjting. Det geit mich waal lökke.
Maar ja, as börgemeister kèns se netuurlik neet alles allein doon, want ja, ich höb maar twieë henj en die mót ich bie-ein haje… Zoe-as ich hiebaove al sjreef.
Dus dao is ein rechterhandj veur nuedig en det is netuurlik de ambtenaer.
Miense, det is hiel belangriek want wat ‘ne ambtenaer allemaol mót doon det is vuuel, hiel vuuel.
Óm uch ein beeld te gaeve van al zien werkzaamhede, dae drink koffie en praot ambtelike taal.
En die ambtelike taal, die is hoeëgsnoeëdzakelik veur ‘t “moment suprème” dae dinsdigmiddig mèt de vastelaovend. De trouwerie van ós broedspaar!
Zier belangriek dus…!

“Ambtenaar pak de pen’’

Beste miense,
Dao sjtaon dich den twieë miense die se hiel good kèns aan de deur op zondigmorge, neet gek op zich dus die höb ich binnegelaote. Koffie, jao lekker koffie. Alles good, jao alles good. Doot geur nog get mèt aete, bön net ‘t ontbijt klaor aan ‘t make. Fijn waer vandaag jao fijn waer…
Veur kómme eigelijk get vraoge…..veur gaon vastelaovesdinsdig trouwe in Offebek bie Harrie van de Paerssjtal wils doe os in ‘t ón-ech verbinje?
Ich sjrók en vroog: “ech???” “Nae, on-ech” waas häör antjwaord maar de vraog is ech. Begriep geur ‘t nog?
(Angers de lètste paar zinne nog ‘ne kier opnie laeze).
“ZEKER”, zag ich, “det gaon veur doon”. En in gedachte waas ich al miene ambtelijke taal nao veure aan ‘t tovere en al ‘ne speech aan ‘t sjrieve. Sjpreakgesjtalte mót ich regele en zal ich ouch welkóm zien oppe receptie enzovoorts…
“Maar doot röstig”, waerde gezag, “iers effe prooste met unne Sjroebelaer”. Mich waerde ouch vertèld waem de börgemeister waert van dit gezelsjap en ich mót zègke: twieë henj op eine boek, mèt dae miens kin ich waal samewèrke!
Noe begreep ich ouch waoróm det ich die tesse van de jas dae ze aanhaje huurde rammele, dao zoot glaas in gevöld mèt Sjroebelaer. Zoeë waerde ‘ne gewuene zóndigmorge toch waal huul speciaal!
As veurbereiding veur dit alles bön ich zelfs mèt de börgemeister same gaon shoppe veur ‘ne hood, want de börgemeister zien mam zag… ‘ne Bolhood sjteit ‘ne ambtenaer good! Wies wäörd zien det.
Ich höb ouch al same mèt de börgemeister veur ‘t sjpegel gesjtaon. Leuk sjtel bie-ein mò ich zègke!
Verder bön ich noe drök, erg drök. Alles mót ich veurbereide, de typmesjien maak euveroere.
De trouwact is zoewied klaor en ‘t enige wat nog ontbrik is ‘ne goedkeurende kröl ónger die acte.
En ouch ich staon veur de sjpegel te oefene: “wils doe ….as diene onwettige echtgenoot verbónje in ‘t ón-ech enz… Ich weit zeker hie mot ‘ne echte boerezakdook aan te pas kómme!
Veur kènne waal zègke det de sjpraekwaordelike sjpanning begint te stijge bie ós veur zaoterdig 8 fibberwarie.

Miense, veur zeen ós gaer op 8 februari!

Hoeëgachtend,

De Burgemeister en ziene Ambtenaer!