Ich höb de poeës gevange
Boooaahh…., wat kènne vieëf jónges dich ’n aantal nachte wakker haje. Naodet ich mèt ‘ne sjmoes bie eine van de PeeKaa in hoeës waas gelok, sjting dao binne drie mintue de res van de PeeKaa binne. Ich herkende ’t drek. En dach… ’t zal toch neet? Nag gèn minuut later kreeg ich de vraog óm Windjbuujelprins 2025 te waere? Mien anjtwaord waas drek: jao! De PeeKaa vroog toen: “Is det zoeë? Is ’t neet sjlum om ieërs diene aanhang te informere?”. Toen maar toch ieërs miene tillefoon gepak en gebeld, ondanks det ich ’t antjwaord waarsjienlik al wis. ’t Antjwaord aan de angere kantj van de lien, waas zoeëas verwach ouch: jao.
Veur det de PeeKaa verder ging mèt de oetlègk wie alles in zien werk geit, höbbe veur netuurlik ieërs geproos op get sjieks en unieks wat veur mich kómme geit. Daobie bedach ich mich ouch det ’t nag ’n paar maondj duurt toet aan ’t Prinsebal van 15 fibberwarie 2025. De aovend (of baeter gezag nach) duurde nag lang. Ich kreeg behuuërlik väöl informasie en opdrachte mei nao hoes. De ieërste nach det ich neet kós sjlaope brook daonao aan. ‘ne Nach wao ich väöl höb naogedach euver wat kómme geit en wat geregeld mót waere. Ein van de ieërste zake waas netuurlik ’t keze van twieje adjudante. Det wól ich sjnel geregeld höbbe omdet ich dit niejs gaer mèt dees twieje wól deile. ’t Keze van de adjudante waas euveriges neet zoeë gemekkelik as ich mich had gedach. In mien direkte omgaeving zoude mieërdere kandidate dees rol kènne vervulle. Maar ich moog d’r maar twieje adjudante vraoge. Det is ouch maar good.
De daag naodet ich gevraog waas óm Windjbuujelprins 2025 te waere, höb ich mien adjudante verras. Die zachte ouch drek jao. Daomei is ’t trio 2025 kompleet. Dae aovend höbbe we netuurlik geproos en al väöl veursjtellinge gemaak euver wat ós te wachte sjteit.
Naodet d’r nag nachte kwame – wao ich amper kós sjlaope en de Vastelaovend van 2025 al minstens ellef kieër veurbie höb zeen kómme – waerde de nachte langzaamaan get baeter en langer. Erg sjnel daonao zien veur mèt ’t trio en de PeeKaa bie-ein gewaes. Ouch veur de adjudante is ’t netuurlik prettig as se weijte wao se aan toe zien. Mieër dan ’n A4-tje mèt get data krege veur euveriges neet. ’t Waas baove-al ‘ne sjoeëne aovend wao veur väöl verteld en gelache höbbe.
Noe de 11e van de 11e is gewaes, kèn ’t Vastelaovesfieës éch beginne. Vandaag äöpene veur de Vastelaovend in ós Windjbuujelriek. Ich wins ’t huidige trio, mèt Prins Tom II veurop, ’ne sjoeëne en gezellige aovend toe. Waem wèt loupe veur waal same de polonaise?
As Trio 2025 verheuge veur ós op alles wat kómme geit. Vanaaf noe mótte veur volges de PeeKaa erg alert zien op de Prinsraojers. Veural de Sjeempeekaa. En geur weijt, raoje in de kefees mót geur sjtraks zeker doon, want det is weer good veur de Kinjeroptoch. Nag sjieker is ’t as geur zellef meidoot aan de Kinjer- of Groeëte optoch.
Toet sjlot wil ich de Ruiverse Revue femilie ’ne dieke prefisiat winse mèt de vief geweldige veursjtellinge in de aafgeloupe waek. Op diezelfde bühne moge veur sjtrakkes Kermis en Vastelaovend viere. Is det zoeë? Jao, det is zoeë!
Windjbuujelprins 2025
