Gen Sissie
Mien twieëde daagbookdeil wil ich beginne mèt ’t felicitere van trio Gesjat en de rietjes mèt ’t behaole van de finale bie ’t KVL. Ouch nog ‘ne proficiat veur PeeKaa lid Rob veur zien óngersjeiing as Lid van Verdeenste bie de Windjbuujels.
Verder begin ich d’r al mieër aan te wènne det ich éch de poeës höb gevange. Noe Sinterklaos weer truuk is nao Sjpanje, kènne veur ós nag ieërs gaon klaormake veur de Körs en Niejaor. Dao is idderein netuurlik drök mèt, mèr veur höbbe ’t nag drökker. Tössedoor zien veur ‘n aantal kieër mèt ós trio en dames bie elkaar gewaes óm wat zake te regele. De dames höbbe ’t drök mèt häör kermis-/vastelaovespèkskes. Ouch veur as trio zien de pakke gaon passe en jao huuër, veur ós drie hadde ze ‘n passend pèkske mèt wit haemp hange. En as die zellefs ós passe den kènne d’r nag vuuël Ruiverse hiere Prins of adjudant waere.
Langzaam begint ’t d’r den ouch éch op te lieke en kump 15 fibberwarie dónderbie. Ich höb begrepe det de band Stout oet Venlo al extra aan ’t rippetere is óm d’r ‘ne te gekke aovend van te make. Oeteraard mót d’r nag ’t ein en anger geregeld waere maar dao höbbe veur nag waal ’n paar daag de tied veur. Messjiens tiedes de Körs. ‘n Jaor gèn Sissie kieke maar ens gaon naodinke euver de tèks veur de kerk en de sjleuteleuverdrach.
Ouch krieg ich mèt de daag mieër zin in de Mansluujzitting, de halve finales van ’t LVK, de Buutteaovend, de Sjterzitting en de Kinjerzitting. Nao de Körs lekker beginne mèt vastelaovesmeziek. Thoes en aaf en toe in de auto. Mèt dae vastelaovesmeziek get helder in de hoeskamer velt ’t neet zoeë op as ich sjpringend de sjoon aan ’t inloupe bön. Netuurlik waal blieve oplette, want d’r kènne mèn in de omgaeving woeëne die alles in de gate haje óm de nieje Prins te ontdekke. Ich zoog ouch det op de Windjbuujelsite ‘ne sjtart is gemaak mèt raoje waem ich bön. Beniejd wieväöl ’t d’r sjtraks good höbbe, want de chocomel en die krat beer mótte droet.
Naeve de aktiviteite die ich al hiebaove sjreef, zien nag ’t aaftraeje van Jeugprins Hero I, ‘t oetkómme van de nieje Jeugprins(es) van de Windjbuujels, ’t sjeije van Boerebroedspaar Sandra en Steven, ’t oetkómme van ’t Boerebroedspaar 2025 en den nag ’t aaftraeje en opnimme van Prins Tom II mèt zien adjudante Rick en Willem. Dees Hoeëghede van 2024 wil ich nag hieël väöl plezeer winse in de letste waeke van uch vastelaovesjaor. ’t Kèn gen maot!
D’r is nag van alles te doon veur det ‘t 15 fibberwarie is. Ich haop det geur as inwoeëners van ós sjoeëne Windjbuujelriek langzaamaan sjtart mèt de veurbereidinge van de Kinjeroptóch en de Groeëte Optóch, zoeëdet veur twieë sjieke en kleurrieke parades kriege. ’t Volgende sjtökske in ’t daagbook zal door mien adjudante gesjreve waere. Messjiens nag dit jaor. En den zal ich örges nao niejaor waal weer get op pepier zette.
Sjloeët ich aaf óm uch te herinnere aan ’t koupe van kaarte veur de Buutteaovend en de Sjterzitting van de Windjbuujels op 31 jannewarie en 1 fibberwarie via de site van de Windjbuujels: https://windjbuujels.nl/etickets/
Zeen veur ós dao?!
Windjbuujelprins 2025
