Dit daagbookdeil wille veur sjtarte mèt de felicitaties nao Jeugprinses Romay I en häör adjudante Guusje en Fiene. En netuurlik ouch ’n felicitatie nao Bacchus Baek mèt zien Bacchusklöp. Sjiek det geur de poeës höb gevange. De ieërste sjäöp zien daomei euver de Vastelaovesdam. Ouch winse veur Mark Eijkelenbergh (ein van de bouwers van ’t dekor veur ‘t Prinsebal) hieël väöl baetersjap, det d’r sjnel moog opknappe.

 

De foto’s zien al gemaak en dus kènne veur aangaeve det veur d’r gans klaor veur zien en kènne neet wachte om mèt alle Windjbuujelinnekes en Windjbuujels de kermis op te gaon. Nao bienao veer maondj veurbereiding moge veur ós 15 fibberwarie aan uch gaon veursjtelle. Det zal ’n sjiek en óngeluifelik moment waere, wao veur al ‘ne hiele tied nao toe laeve. Waal höbbe veur al kènne genete van de Buutteaovend en de Sjterzitting, komplimente aan alle artieste en de Dórsvlaegels en daomei aan de joekskemissie van De Windjbuujels.

 

Ós veurbereidinge zien zoeë good as klaor en de Prinsekemissie is d’r ouch klaor veur… Of mesjiens waal mèt De band Stout zal ongetwiefeld ouch sjtaon te trappele, dus wat held ós nog taege om d’r zaoterdig de 15de ‘ne fantastische Prinsebal van te make. Geur krieg ’n trio det al versjillende jaore de Vastelaovend oppe Ruiver viert; mèt de Vastelaovend en Ruiverse kermis gaon veur d’r taegeaan wie ’n paar jonge van róndj de 20 jaor.

 

Veur zalle ós bès doon óm veur idderein klaor te sjtaon. Van de kinjer van de kleutersjoeël toet de seniore in ‘t Windjbuujelriek. Maar veur ’t zoeëwieët is moog geur nag ‘n aantal kieër raoje waem de Hoeëgheid van 2025 waert en den zien veur beniejd waem die krat beer van de kinjeroptóchkemissie in óntvangs moog nimme. Moog ’t gelökkigste sjaop winne!

 

Mèt Vastelaovesgroet,

De nieje, A1 en A2

 

PS: Veur winse zoeëwaal ’t huidige as ’t nieje Boerebroedspaar en Minimoos ‘ne joeksige aovend toe kómmende vriedig en zaoterdig.