Windjbuujelinnekes en Windjbuujels,

Sjoeën om te laeze det ‘t ouch dit jaor alle kemmissies gelök is óm de hoeëgheden biejein te kriege.

Op dit moment is gans Ruiver nog in de ban van Sinterklaos. En veur ouch natuurlik. Mer toch kiëke veur ouch al waeke get wieër veuroet. In plaats van de sjoon zette, höbbe veur de sjoon vas gepoets, zoeë det se de 31ste jannewarie ouch sjpik en sjpan d’r op sjtaon. Ouch höbbe veur in de tössetied ós pekskes gepas. Gelökkig zien veur alle drie gesjlaag. Veur kènne dus helaas neet te vuuël van det sjlokgrei van kläöske aete, want den gaon de knuip nimmer toe. Veur haaje ‘t dus mer bie ‘n mandarijntje dit jaor, ouch ‘lekker’.

Det de vastelaovend doenderbie begint te kómme is good te merke in ‘t dörp. Det wuurd de kómmende tied dus extra oplette veur ós óm ós neet per ongelök örges te versjpraeke.

Veur höbbe óngertösse al get aovende biejein gezaete óm belangrieke dinger door te sjpraeke en te fantasere wie deze vastelaovend geit zien. De verzinsels van mien hoeësorde zien eindelik oetgewerk nao ‘n definitief ontwerp. Ich bön beniejd wie dae d’r dalik oet kömp te zeen.

Óm effe truuk te kómme op de vraog van de boere in häör daagbook wat betref de smoesjes, zin in ‘n fles beer?

Veur winse uch ‘ne sjoeëne Sinterklaos en det ‘t mer gauw volgend jaor moog waere.

De Nieje