Dit zien de fieësdaag!?

December waert ouch waal de maondj van de fieësdaag geneumd. Te beginne mèt Sinterklaos, ‘n prachtig sprookje maar veural leuk as se zelf klein kinjer höbs of d’r ‘ne bös. Den Körs, ‘n fieës gans vol gezelligheid, aete en drinke. En hoewel det natuurlik allemaol leuk is, kump ‘t op mich altied ‘n bietje geforceerd euver. Eigelik sjteit altied alles al vas; ’t gezelsjap, de lokasie, ‘t tiedstip en zelfs ‘t veur-, hauf- en naogerech. Ich bedoel… as se den toevallig bie de Paerssjtal belanjs, is de kans groeët det d’r kaajsjottel mèt ‘n gevuld eike op ‘t menu sjteit. En ouch Aad op Niej is gezellig maar dao mis ich toch net get bie. En zeker aankómmende edisie zal ‘n anger geveul bie mich tewaeg gaon bringe. Want wie ich normaal gesjpraoke op dae 31ste december aaftel nao ‘t nieje jaor, tel ich noe al waeke aaf nao get angers.

Geur veult ‘m misschien al aankómme, leef daagbooklezers, ich tel dit jaor mieër den oejts aaf nao de vasteloavend. Det is noe ‘t fieës wao nag ‘n groeëte rol is weggelag veur sjpontaniteit, veur gekkigheid en oet de bandj springe. Doe wets des se geis maar wao en wie se eindigs is de vraog. Hoewel veur dao dit kieër bliekbaar get veurzichtiger mei mótte zien…

En eigelik geit det aaftelle nao Aad op Niej bes sjnel. Te beginne mèt de Mansluujzitting (veur de Prinsraojers ónger uch… dök vaste prik veur mich!), daonao de Sjterzitting (veur de Prinsraojers onger uch… dök vaste prik veur mich!) toet uiteraard ‘t knalspektakel van ’t Prinsebal (veur de Prinsraojers onger uch… dök maar neet altied, vaste prik veur mich!) wat dit jaor haopelik weer ‘n geweldig fieës geit waere.

En hoewel ich normaal gesjpraoke mèt die daag erg van daag toet daag laef, laef ich noe juus noa dae eine sjpecifieke daag toe. Sterker nag… ‘t dreit óm bienao nieks angers mieër. 

Mèt Sinterklaos höb ich gen pepernote en speculaas gekóch, maar lollys en angere verpakte snoepjes. Sjtaond op bed höb ich die toen ‘n uurke lang met ‘ne sierlikke zweij links en recht van mich gegoeid, óngertösse zjweiend nao miense die d’r gaar neet ware. In plaats van Sky Radio of de Top2000 sjteit óm beurte ‘ne Vasteloavesspotify of -YouTube playlist oet de speakers te brulle. En dit jaor haet ózze greune körsbaum ietwat gaele leegskes en roeije slingers. Maar good, det haet d’r eigelik idder jaor… Mien vuurwerkpakket höb ich den waal weer bewus geselecteerd op ‘t in de loch laote sjete van de Limburgse driekleur!

Dus ‘t veurgerech, dao zien veur as trio en aanhang al ‘n paar waeke van aan ‘t genete. ‘t haufgerech, daomei sjtarte veur op 4 fibberwarie en det verorbere veur neet in ‘n half uurke maar dao gaon veur ‘n paar waeke euver doon. En de smaak van ‘t naogerech zal veur ieëwig blieve. Det zal de sjmaak zien van al die herinneringe die veur noe nag motte gaon make. 

Veur winse uch fijn daag, ‘ne goeie roetsj en bön veurzichtig mèt vuurwerk. Den treffe veur ós vanaaf jannewarie vas waal örges as veurbereiding op de echte fieësdaag!

Gaef ‘t door!

De nieje