Good geraoje!

Leef Windjbuujels en Windjbuujelinnekes, ‘t nieje jaor is noe ech weer begós; ‘ne frisse sjtart wao-in d’r haopelik ‘n haup probleme die de waereld de aafgeloupe jaore in zien greep gehaje höbbe, opgelos zien of sjnel gaon waere. Netuurlik wil ich uch via deze waeg, ouch names mien adjudante en aanhang, ’n magnefiek roeëd-gael-greun en gezondj niej jaor winse.

Op persuuënlik vlak is ‘n niej jaor dök ‘n moment van goeje veurnimmes. Neet hieël fanatiek, maar ich probeer d’r altied ‘n bietje aan mei te doon. De onvermijdelikke ‘mieër bewaege’ en ‘minder aete en drinke’ sjtaon weer hoeëg op ’t lieske. Det ieërste geit waarsjienlik nag waal lökke maar ‘ne druuëge jannewarie – oftewaal ‘Dry January’ – geit d’r zeker neet in zitte. Op die manier kèn ich haopelik éch dubbel getraind aan de sjtart van ‘t vastelaovessezoen versjiene. Wellich det dit ‘n geschik moment is óm wat mieër euver michzelf te vertelle. Ich wil de fanatieke Prinsraojers namelik gaer van deens zeen. 

Ich bön van ‘t aajerwets mannelikke geslach en ich bön aajerwets same mèt emes van ‘t vrouwelikke geslach. Ich bön genne gebaore Windjbuujel maar waal getaoge in de gemeinte Beesel. Uiteraard höb ich gewuuën ’n baan. Meziek vinj ich leuk óm te loestere, sjport vinj ich leuk óm te kieke en as se wils blieve laeve, mos se aete en drinke. Vandaor det ich gaer vertoef in de Ruiverse en Offebekse horeca. Verder bön ich van jongs aaf aan ‘n echt fieësbieës waobiej de Vasteloavend ‘n prominente plek innimt. Dae höb ich in versjillende plekke van dichbie moge belaeve maar ós eige dörp höb ich daobie noeijts euver gesjlage. Was se hie zuuës, det zuuës per sjlot van raekening nörges! 

Oh jao… ich kós ’t stiekem neet laote en höb toch maar ens ‘ne blik op de tössestandj van ‘t Prinsraoje geworpe. Wat ‘n sjoeën name sjtaon dao tösse! En wat ‘n, veur mich in idder geval, verrassende kopposities. Verklap ich daomei det ich de koplouper neet bön en det dae ‘t dus neet geit waere? Oei, den sjrief ich det maar neet. Van ’n klein aantal name op de lieës zou ich ‘t fantasties vinje as se ‘t nag oeijts waere maar of se det zelf ouch zoeë fantasties zoude vinje, waag ich te betwiefele… Maar verreweg de meiste namen op de lieës vertelle nag get angers. Det de Windjbuujels, en dus Óffebèk en de Ruiver, zich nag lang gen zörge hove te make euver ‘t veurtbesjtaon van ‘t oetrope van ‘ne nieje prins. Mèt dit talent op die lieës kènne ze zoeë te zeen nag minimaal 6×11 jaor veuroet. Gaef ‘t door krieg daomei weer ‘n sjoeën beteikenis.

Wilt geur nag get verangere aan dae Prinsraoje-tössesjtand? In de kefee’s sjtaon de goude ‘Gaef-t-door-kistjes’. Of missjiens haet emes ‘m waal bie dich aafgegeave. Scan de code, laes de informatie, pak ’n pepierke, schrief get op en steun tegeliekertied de Kinjeroptocht!

Vastelaovend same en gaef ’t door!

De Nieje

PS: ’t volgende daagbookdeil is veur mien adjudante. As geur get wilt weijte van dees twieje? Den reageer gerös via de social media posts.