Hemde en sjoon
Leef Windjbuujelinekkes en Windjbuujels,
Dao zien v’r weer. Veur wille beginne mèt de komplimente aan de Joekskemissie en de sjpelers van ’t Ruivers keteerke. Wat waas det sjoeën! Wat höbbe veur dit weekend genaote van wao de Ruiver groeët in is. Nag ’n paar daag en den is ’t aan ós óm ’t Windjbuujelriek veur te gaon. Veur barste noe éch van de energie, dao höbbe veur gen Joris wekt op veur nuuëdig.
Op de socials van de Windjbuujels kènt geur ouch zeen det de sjilderieje vorm beginne te kriege, veur zien ontzettend beniejd nao ’t eindresultaat. Galerie de Sjakel zal d’r kleurig biesjtaon.
Als geur noe z’n sjilderie in de henj krieg, zet d’r den iets oet de kunstigs op en gaef ’t sjilderie sjnel door zoedet zoeväöl meugelik Windjbuujels en Windjbuujelinekkes de kunstenaer in zich los kènne laote en veur oppe Ruiver ‘n weergaloze vastelaovescolleksie kènne prissentere.
Wat betröf de veurbereidinge… ós hemde zien grótter gemaak en in ‘t dierenryck misse d’r get vaere. Van welke rare vogel mót geur zellef mer ontdekke. Ós sjoon höbbe veur weer geboent en ’t danse laote veur mer bie sjpringe en de polonaise loupe. Wat ós betröf kèn ’t fieës beginne! Veur sjtaon te popele óm te knalle van Kessel toet Brach en van Belvend toet Beesel.
Vriedig is de resepsie van Jeugprins Hero I mèt zien adjudante Casper en Kevin. Geur gaot toch ouch? Zaoterdig is den de beurt aan de nieje Bacchus. Veur höbbe dees daag ens opgelet en höbbe toch waal ‘n idee welke groep Bacchus Dirk kèn opvolge. Wat hadde die jonge ’n lol, mer ouch dors! Zóndig is den ’t moment veur Prins Mark I óm de scepter in te levere en zien welverdeende rös te gaon pakke. Mer veur nimme ‘t sjtekske gaer van ‘m euver. Hieël gaer zelfs. Wat haet Prins Mark ’t aafgelaope jaor gaas gegaeve, neet te besjrieve! Mark, Maurice en Jasper hiel väöl plezeer gewins kommend weekend.
Höb geur uch trouwes al opgegaeve veur de optochte die mèt de Vastelaovend door ‘t Windjbuujelriek trekke? Want wat is d’r noe sjoeëner den ‘ne kleurrieke Kinjer- en Groeëte optoch, dae door ‘t dörp trek. Det is pas oet de kuns!
Veur höbbe vas ‘n kaerske aangesjtaoke, veur good optochwaer. Veur gaon verder mèt naegelkes biete en op en neer door de kamer ieësbaere. Mèt dit waer neet zo moeilik.
Toet sjnel!
De nieje met zien maatjes
Prinsraoje: https://windjbuujels.nl/prinsraoje/
