De letste en de ieërste
Zoeë, dao is d’r den. De letste in mien serie daagbookdeile. Det is zeker. Ich haop det geur ze mèt plezeer höb gelaeze. Det ich uch hie en dao get broekbare hints höb gegaeve euver waem ich bön en wellich ouch ‘ne inkele kieër op ‘n verkierd sjpaor höb gezatte. Ich vonj ’t in idder geval sjoeën óm te doon! Nao vandaag sjloete mien adjudante en ich ‘ne biezónjere tied aaf. ‘ne Tied vol veurbereidinge, sjtrakke plenning, geheimzinnigheid, risico’s en dus vol sjpanning aaf en toe. De letste kieër ontkenne des se ‘t messjiens waers en de letste kieër smoesjes verzinne euver wao ich noe weer haer mos.
Nao vanaovend brik d’r ‘ne nieje tied aan. Den waert veur ós väöl de ieërste kieër. De ieërste kieër as Prins oetkómme in de Sjakel, de ieërste kieër tegeliekertied plasse mèt ein van de adjudante, de ieërste kieër as trio nao de Seniorezitting en Vasteloavend wiej Toen maar ouch de ieërste kieër sinds jaore weer nao de sjoeël en Pinkeltje. En neet te vergaete; de ieërste kieër as trio gans baove-op dae wage en de ieërste kieër ós eige resepsie.
Toet sjlot vermoed ich det ich as Prins veur de ieërste kieër – net as menige veurganger van mich – in mien laeve óm de vasteloavend ’n träönke gaon laote. En mèt mich, det vul ich efkes veur häör in, minimaal ein van mien adjudante ouch. Det is waal zeker. Groeëte mondj, klein hertje of zoiets. Väöl dinge zalle veur as trio neet allein veur de ieërste kieër meimake, maar ouch einmalig. Det maak ‘t netuurlik extra speciaal en haopelik onbesjrieflik sjiek! Of d’r achter miene prinsennaam ouch ‘de ieërste’ kump te sjtaon? Of det miene achternaam wellich veur de ieërste kieër verkaoze is as Prins van de Windjbuujels? Wae wet, wae wet… Om dao ’n iets konkreter antjwoord op te gaeve; wae det noe wet, is sjlechs ’n zieër selek gezelsjap, nao vanoavend haopelik idderein dae de vasteloavend oppe Ruiver en Offebek ’n werm hert toedruuëg.
We gaon ’n groeët fieës bouwe, toet sjtraks!
Gaef ’t door en vastelaovend same!
Letste groet van de noe nog efkes onbekende Nieje
