De ierste kater van ut jaor is gezak en Bacchus 2017 kruup oet zien sjulp. As iers wil ich uch allemaol ut beste winse veur ut nieje jaor. As twiede wil ich uch gaer belaove mien bes te doon om ein van dees winse same met uch waor te make; Vastelaovend 2017 make toet un onvergaetelikke editie.

De letste waeke van ut jaor zien un goeie training gewaes veur michzelf en mien klup. We hubbe vuul same getraind maar ouch idder veur zich. Getraind om os net-neet sixpacks, veur uch om te zette in forse beervaetjes zoedet we de vastelaovend same met uch vol kenne haaje.

Oug al draag ich ut geheim al unne hiele tied met mich met en bun ich langzaam aan ut idee gewend geraak, nog veult ut wie de daag van gistere det mich de vraog waerde gesjteld. Ut waas unne zondig morge in Oktober. Ich kreeg get berichjes van unne naam dae mich neet metein bekend veur kwaam. Naodet ich ut nog uns good gelaeze had dach ich the begriepe wat ich loos. Waas ut un lullig smoesje van de bacchus kemmissie om bie mich thoes langs te komme? Veurdet ich wis wat dr allemaol aan de handj waas sjting d’r al veur de deur. Met razelende henj van sjpanning maakte ich de deur aop en noom ich unne breef aan dae ich nog amper aope gevouwe kreeg. “Wils doe de nieje bacchus waere?” loos ich. Wie d’r einmaol de deur weer oet leep waas ich redelik gekalmeerd. Al had ich zelf ut antwoord nog neet ech oetgesjpraoke, hae wis det dr de Bacchus van 2017 zojuus de handj gesjud had.

Aaf en toe kiek ich nog us nao dae breef om mich te herrinere det dit allemaol genne druim is, maar wie donder bie ut kump wie echter det ut waert. Zeker nao ut laeze van de ierste woorde van ut prinselik trio. Ich ken neet wachte om uch de handj te sjudde en un pilske aan te reike op ut prinsebal.

Noe is ut precies drie waeke toet ich mien geheim met de wereld ken deile en ich begin ut opnie sjpannend te vinje. Wat zal dit unne prachtige vastelaovend waere. Bacchus van oppe Ruiver en asof det nog neet ier genog is, onnog us in ut 66 jaorig jubileumjaor van de Windjbuujels. Maar zal ich ut waor kenne make? Ut is natuurlik un fantastich gesjink, maar oug un zjwaore taak. Gelukkig sjtaon ich dr neet allein veur en hub ich un goeie klup om mich haer wao ich op ken bouwe.

Vastelaovend 2017, ich hub dr zin in.

Ich wins uch allemaol unne fijne aovend en den zeen veur os gauw.

Groete, Bacchus 2017 Oppe Ruiver