In ‘ne zuch en ‘ne sjeet waas ‘t weer veurbie, vastelaovend 2014.
Noe ich weer mèt 2 bein op aerd gelandj bön kèn ich truuk kieke op get onvergaeteliks.
Leef Windjbuujelinnekes en Windjbuujels ’t klink aafgezaag maar ’t is ech waor: BEDANK, BEDANK, BEDANK!!!
Wat veur höbbe meigemaak is ónbesjriefelik, gaon det dus ouch neet probere te omsjrieve. Maar aan alle reaksies, appjes, smsjes, kaarte, breve, blome en kedo’s höbbe veur de leefde van uch geveuld en det duit good, hiel good!!!
Van te veure haaj ich al gezag det ’t veur mich daag zólle waere mèt ’ne lach en ’n traon en det zien ’t gewaore. De Ingelsman zól zègke ” an emotional rollercoaster” en det klop hielemaol. De daag in vogelvluch:
Vriedig de sjoeële, die gezichter van de kinjer, ich veulde mich net Sinterklaos! Mien eige werk wat ein geveul…der Weisse Stein wat ’n ajerwets gezellig fieës.
Zaoterdig effe bie Rick ziene pap langs veur ziene verjäördig, blome bringe nao ’t graaf van pap en mam, ’t oetreike van de hoesorde aan de raod, de kerk met de prachtige meziek en zang van Jan, Sanne en John. Daonao de sjleuteleuverdrach op ’t gemeintehoes maar, maar wat höbbe veur gelache om os eige Kirchraojs maedje en de Beeselse inbring van Har Reijnders.
Zóndig kinjeroptochdaag…en wat ein waerke; hielemaol super!!! De resepsie in Beesel, ’t heerlikke aete bie Bosdael en daonao de eige resepsie. Man,man, man wat ein drökte en wat ein fieës. Sjpesiaal wil ich effe mien kollega’s bedanke veur häöre inzet ,maar ouch alle joekskapelle, de Harie’s,,La Bamba en W-Dreej veur häör onvergaetelikke optraeje…
Maondig de daag van de groeëte optoch, de priesoetreiking oppe mert mèt ’t geweldige confettikanon van ózze Bacchus Olaf I en daonao de kroege Karré, lekker gegaete bie de Paerssjtal, ’t Heukske en nao de resedensie wao nag éns get ekstra gaas woord gegaeve.
En toen waas ’t alweer dinsdig…boerebrunch (hiel gezellig, Michel en Sandy nogmaals bedank veur uch enorm originele biedrage), treffe aan ’t sjpaor, ophaole boerebroedspaar, optoch en resepsie bie de Paerssjtal ein groeët vastelaovesfieës.
’s Aoves nag effe nao “Karin” en toen waas ’t zoeëwiet: Windjbuujelsjtrieke en ’t is weer gedaon!!!
Same mèt jeugprins Nick I zien adjudante Jean Paul en Mike, jeugprins JN Joep I mèt zien adjudante Rody en Sander, Boerebroedspaar Astrid en Fred, getuge Richard, Nicole, Patrick en Helga, jeugboerebroedspaar Jill en Jordy, getuge Daniëlle en Lars, Bacchus Olaf I met zien klöp en aadwief Christel höbbe veur; Rick, Vivian, Mark, Renske en ich geprobeerd d’r mèt uch ‘ne geweldig sjoeëne vastelaovend van te make en ich moog sjtelle det det gelök is…nogmaals leef luuj BEDANK!!! Deze vastelaovend zit in mien hert en zal dao altied blieve zitte. Kén ’t gekker…
Uche prins Geert I
