Bèste Hoeëgheid Prins Sjoerd I, adjudante Andy en Stan,
Veur uch nadert ’t inj en det zal zeker efkes pien doon maar geniet van vanaovend want as geur zoeë fieës wie det geur ‘t ganse jaor gedaon höb den sjloet geur aaf mèt ein knalfieës! Det verdeent geur want uch operasie is diek en döbbel gesjlaag!!! Ich wins uch den ouch alle gelök en rös toe want ouch det höb geur verdeent.
Veur ós dao en taege brik d’r ein nie begin aan. De lètste puntjes waere oppe i gezatte en veur druime al euver de lanjing in de Sjakel vol mèt enthousiaste Windjbuujelinnekes en Windjbuujels die net as veur zin höbbe in ‘n fieësje. De sjpanning sjteig en de aetlös wuuërt minder. Aaf en toe bekruup mich ein geveul det ich maar moeilik kèn ómsjrieve. Weit neet wat ’t is. Wat ouch sjteeds lastiger wuuërt is ’t lege. Doe wèts op ‘n gegaeve moment nimmer wat se mós zègke, maar ouch det huuërt bie ‘t groeëte sjpeel van ‘t prins –en adjudantsjap! Veur wachte gewuuën nag effe ein waek en den wuuërt de druim werkelikheid!
Noe get reaksies op ’t gastebook:Ich bön hiel blie veur de miense van de T.O.D. det zie op ’t goeje sjpaor zitte, blief oplette en haaj ós good in de gate…lol. Man van ’t maedje van de Leewerveltwaeg, wat leef van uch det geur uch zorge maak, maar det is nörges veur nuuëdig. Veur kriege alles mei al is ‘t op aafsjtandj! Op miene laeftied mót ich good oetgerös aan dees taak beginne en kèn ich ‘t mich neet leiste óm volgende waek zaoterdig wie eine meuge herder in de Sjakel te sjtaon. Den kèn ich mich baeter van te veure sjpare neet waor?! Wat betref ‘t KVL wins ich alle betrokke luu väöl sukses zóndig en haop ich det ’t ‘n geweldig groeëte happening wuuërt wao gans Limburg van kèn genete en det me nao aafloup zaet:”dao oppe Ruiver geit ech alles.”
Nag ein dingk det ich neet moog en wil vergaete…SJEIV: wat waar ’t sjoeën in Ahoy, kort maar krachtig en ós prinses haet genaote van uch… Volgende waek laot ich weer mieër van ós hure. Wins uch allemaol ein geweldig weekend.
Captain Crazy en crew…
