Soms zien d’r momente in ’t laeve, die zien “neet te besjrieve!”
Den zien veur efkes sjtil en zeuke veur nao wäörd. Zoeë ouch wie veur aafgeloupe waek totaal onverwachs ´t dreuvige berich krege det veur vuuel te vreug aafsjied mótte nimme van ós aad-besjtuurslid en ierelid. Vol ongeluif deej dit niejs de ronde binne ós vereiniging.
Ben waas besjtuurslid van De Windjbuujels van 1999 t/m 2011, waovan ruum 10 jaor as penningmeister. Ben noom zien taak as penningmeister oeters serieus en de cente van de vereiniging ware den ouch in gen baetere henj as die van Ben. Ben waas ‘n sjtabiele en onmisbare krach: ‘ne man wao se van opaan kós, wao ze op kós bouwe en op kós vertroewe! Pünktlich wie hae waas haaj Ben zien zaakjes altied op orde! Ben waas genne miens veur oppe veurgróndj, maar genoot ‘t leefs van ‘n aafstendje van de Ruiverse vastelaovend óm ‘m haer! Ben is jaore ‘n drievende krach gewaes in de redaksie van de sjtaatscourant van ‘t Windjbuujelriek en ‘t huidige magazine “De Windjbuujel”. Ben waas nog actief in de kemissie tekezinge. Ben haet met ós vereiniging hoeëgtepunte en deeptepunte meigemaak. In de jaore det de vereiniging ‘t léstig haaj en d’r ‘ne gans nieje Raod van Ellef gezoch mós waere, bleef Ben loyaal aan De Windjbuujels en brach hae de vereiniging weer in röstiger vaarwater. Hieveur zien veur Ben vuuël dank versjöldig. Neet veur nieks is Ben toet ierelid beneumd veur alle verdeenste veur de Ruiverse vastelaovend en De Windjbuujels in ‘t biezonjer. Ben waas gruuets op deze titel. As ierelid waas Ben same met Nellie ein troewe bezeuker en ein gaer gezene gas mèt ós activiteite. ‘t Is neet te besjrieve det Ben ziene sjtool veurtaan laeg zól blieve!
Vastelaovesvereiniging De Windjbuujels zal mèt groeët respek aan Ben truukdinke as ‘ne miens mèt hert veur de vereiniging en hert veur de Ruiverse vastelaovend.
Veur winse Nellie, Jeroen & Eefje, Maarten & Anke, Noud, Yfke, Senn en Fleur vuuel sjterkte met ‘t drage van dit verlees.
Names besjtuur, Raod van Ellef en leje van Vastelaovesvereiniging De Windjbuujels
Oppe Ruiver, 1 oktoeëber 2023
Roy Linssen
Veurzitter
