Vastelaovesvereiniging "De Windjbuujels" Ruiver

Opgerich 8 november 1950 - Keuninklik erkénd op 22 mieërt 1975

In memoriam Joep Hermans

Oppe Ruiver, 28 fibberwarie 2022

In memoriam: Joep Hermans

Aafgelaupe waek bereikte ós ´t dreuvige berich det op 25 fibberwarie jl, ózze aad vors/veurzitter en ierelid Joep Hermans op 91 jäörige laeftied euverleje is.

Joep waas lid van ós vereiniging sinds 1967, wie hae Prizzedent waerde van de Raod van Ellef. Hae kwaam in ‘t besjtuur van De Windjbuujels in 1970. In 1975 waerde Joep gekaoze toet veurzitter en vervulde 11 jaor lang de döbbelfunctie van vors en veurzitter. Joep kwaam bie De Windjbuujels wie d’r ‘nne onröstige windj weijde door de vereiniging. Joep wis de rös truuk te bringe en haet d’r veur gezorg det d’r structuur kwaam in ós vereiniging. Zoeë sjtamme de ieërste sjtatute en hoeshajelik reglement oet dae tied en waerde ‘t betaald lidmaatsjap ingeveurd zoedet idderein lid kós waere van De Windjbuujels. In de besjtuursperiode van Joep waerde de vastelaovend veur ‘t ieërs geäöpend mèt ‘n Heilige Mis, waerde veur de ieërste kier ‘nne Windjse Windjbuujel oetgereik en versjeen de ieërste Ruiverse langsjpeelplaat. Ónger zien leiding waerde de naam van ós vereiniging omgeduimp van carnavalsvereiniging nao vastelaovesvereiniging De Windjbuujels. Joep sjting veur de vereiniging en waerde gezeen as ein autoriteit binne De Windjbuujels. ‘t Jaorliks hoeëgtepunt waas den ouch as Joep op hoeëgsjtaond niveau ‘t “politieke vastelaovesdebat” aanging mèt de burgemeister tiedes de sjleuteleuverdrachte. Op zien eige ludieke, sjerpe en gevatte wies wis hae as gènne angere de Ruiverse politiek ‘n sjpegel veur te haje. As lid van de prinsekemissie haet Joep maar leefs 19 veurgéngers oetgezóch. In 1984 ontving Joep van ‘t besjtuur van de Bond van Carnavalsvereinigingen in Limburg (BCL) ein hoeëge óngersjeiing veur zien väöle verdeenste veur de Ruiverse vastelaovend. Joep is beneump toet ierelid van De Windjbuujels.

Veur winse Paul en Jozemiek, Lonneke, Maartje en Martijn, Yvonne en Ed, Teddy en Sascha väöl sjterkte in de kómmende tied.

Names Besjtuur, Raod van Ellef en leje van Vastelaovesvereiniging De Windjbuujels

Roy Linssen
Veurzitter



In Memoriam Joep

Aankómmende evenemente

Sjponsors

SponsorKliks, gratis sponsoren!
© 2022 – Ruud Janssen – Feedback?Algemene voorwaarden