Windjbuujels höbbe weer eine nieje hoeëgheid;
Prins Mark de ieërste met adjudante Maurice en Jasper!
Wat keeke veur dr allemaol nao oeët, ut Prinsebal, weer eine regerende Prins veur ut Windjbuujelrieëk. Want ut vastelaoves-geveul det wille veur same toch blieve belaeve. Daoveur mot de vastelaovend waere doorgegaeve. En precies det is den auch ut thema ‘gaef ut door’ veur dit vastelaoves-seizoen.
Naodet in aanlaup nao ut Prinsebal de Windjbuujels en Windjbuujelinnekes al ware opgeroope om te raoje waem de nieje prins zou waere, ware ze auch oetgedaag om huer eige vastelaovesmotto in te levere.
Vuuël inzendinge, sjoeëne motto’s en hiej en doa get flauwekul kwame veurbiej. Unne inkele veurgenger leet zien eige motto al veurbiej komme. Mer in de gouwe kistjes haaj de PeeKaa mieër gestopt den det veur gedach haaje. Op zaoterdig 4 februari waerde det ut publiek in de Sjakel dudelik. Nao ein heuse sjpelsjow onger leiding van ozze vors Jeroen (de Mol) kwaam det toet ein fantastische finale met ut oetroope van Prins Mark de ieërste. Mark Verlinden is getrouwd met zien prinses Anneke Reijnders en vader van zien blaage Jolie en Jevie. In ut dageliks laeve is hae actief as bedrieëfsleider binnensport accommodaties en daonaeve achter de bar biej Ronckestein en de Paerssjtal. Auch hanteert dr nog regelmaotig de pen om ein sjtôkske te sjrieve veur onger angere Puik.
Hae wuurd deze vastelaovend ongersteund door zien adjudanten Maurice (Martens) en Jasper (Emans).
Ut nieje trio kos op ein, hoe ken ut auch anges, werme ontvangs raekene toen ze bekend gemaakt waerde. Same met de Badmötse en auch dj’s Bauke en Olaf waerde dr eine sjpetterende aovend van gemaak. En det alles onger ut motto: ‘Neet te besjrieve!’
