Leef Windjbuujels en Windjbuulinnekes,
SUPER, VET, GAAF………NEET TE FILME! Miense, wat eine geweldige aovend höbbe veur zaoterdig gehad. Eindelik mochte veur ós presentere as ‘t nieje Windjbuujeltrio van 2015. Wat ein ontvangs, felicitaties, reaksies en wat ein geweldig fieës waas det. Onbesjriefelik gewuuën! Det vergits se noeits van dien laeve mieër. Kiepevel!
De zaoterdig begós lekker röstig. Nag effe nao ’t handjballe kieke van ós Maud en daonao sjnel nao hoes. Ós mam en Mieke ziene pap höbbe veur mèt ein smoesje gevraog óm te kómme. Toen kwame ouch nag ‘toevallig’ John, Nicole en Ron op bezeuk mét de kinjer. Wie veur dao allemaol biejein zote, moch ich eindelik vertelle det ich de nieje prins zól waere…….
Wat waas det gaaf. Die haje hielemaol nieks in de gate. Geweldig óm die gezichte te zeen en die kinjersnuutjes te zeen glundere en mich vol óngeluif aan zitte te kieke. De poster höb ich mótte laote zeen ómdet ze ’t angers neet geluifde. Ouch de elders van John en Ron höbbe veur toen alvas eine poster gebrach en ouch dao höbbe veur genaote van häör reaksies.
Toen saoves same met de vrunj op waeg nao ’t Prinsebal. Man wat waas det sjpannend. Nao ein klein uurke móste veur sjtiekem wegsjluipe en ós in ós pakke heise. De Men in Pek ware d’r klaor veur. En knalle!
Gistere de ieërste officiele take as nie trio. Ieërs nao de bioscoop óm de nieje vereinigingsfoto te make veur 2015. Sjmiddigs de Windjbuujel gehese, dae wappert noe weer in ’t Windjbuujelriek. Danao nao Offebek wao in ‘ne heite bomvolle zaal Prins Maik I mèt zien adjudante Stijn en Dirk oet de Iphone kwame. Ich höb gezeen det geur d’r ein flink fieësje van kènt make. Det geit hielemaol good kómme! Vanaaf dees plaats nag ‘ne kier: van herte proficiat!
Miense nogmaals bedank. ’t Waas geweldig !
Sjtart de Bandj
Prins Ryan I
Adjudante John en Ron
