‘t Is inmiddels november as Prins Joep II mèt zien adjudante Twan en Roy breid lachend bie ós de kamer in kieke… Vanoet de krantebak waal te versjtaon! Messjien waert ‘t tied om dae bak ens op te sjoeëne, flits ‘t door mich haer. Of zou ‘t ‘n veurteiken zien? Feit is det ich dees jónges nog noeijts zoe dök in de auge höb gekeke as de aafgelaupe waeke. Ich had op ‘ne late aovend ‘n aantal telefoontjes gemis en ’smorges wachtte mich ‘n geluidsfragment van de PeeKaa euver ‘n hotel wat ze veur mich geboek hadde. ‘n Hieël biezónjer hotel…

Det mich dit euverkump… Ich waas ech kompleet van de wap. De vastelaovesrazel maakte zich van mich meister en ‘t duurde effe veur det ich ‘ne nieje teug zuurstof toet mich kós nimme. Neet lang daonao kreeg ich kramp in mien kake van de ‘smile’ dae, as geur good kiek, zich nag altied aafteikent op mien gezich. Op waeg nao de zaak waerde Mariah Carey de móndj gesjnoerd en mós die plaats make veur Marina. Of ich qua werke éch nuttig bön gewaes dae daag, vraog ich mich zellef waal aaf.

‘t Sjpel is begós… en det ich det noe moog sjpele. Det sjpel det duurt bies 16 fibberwarie. Den moog idderein ’t weijte det ich de Nieje bön! Uiteraard kèn ich det neet allein. Toen ich mien vruijke ‘t groeëte niejs vertelde en zien reaksie zoog, waas ‘t veur mich euverdudelik: dit waert ‘n onvergaetelikke ervaring. En den netuurlik miene Linker en miene Rechter. Wie veur die ginge vraoge, begreep ich wat de PeeKaa bedoelt met de sjpanning as se ‘de vraog’ geis sjtelle. Allebei haofde ze gén seconde nao te dinke. Häör vruijkes waerde eigelik pas nao 10 minute aangekeke of ze ’t d’r ouch mèt ens ware.

‘t Trio 2019 is compleet. De koffers zien gepak. De ieërste hotelkamers van Hotel De Windjbuujel zien geboek! Ich bön d’r van euvertuug det dit Hotel binne de kortste kiere is volgeboek met hieël väöl Ruiverse luuj die same mèt ós d’r ‘ne ónvergaetelikke vasteloavond van wille make.
As ich zeen wat d’r de aafgelaope waeke aan Ruivers talent al van zich haet laote huuëre den weit ich zeker det ‘t super gezellig waert in de hotellobby. Elke morge zalle veur wakker waere en dinke: “Laot ós vandaag laeve asof morge neet besjteit…”
“Feng nag eine” zal ein gevleugelde oetsjpraak waere aan de hotelbar as de hiere van de EPS zich dao nestelle, omringd door blage die same met Jur de sjlaeger “Vastelaovend is cool” zinge. Óm tensjlótte in de kleine uurkes erm in erm aaf te sjloete met “Vastelaovend Bedank” gezónge door Marina.

Wat bön ich gruuëts det veur mich in dit hotel ‘t penthouse is geboek! Ós reis is begós, bie elke tössesjtop zalle veur uch op de huuëgte haje van dees reis. Veur noe winse veur uch hieële sjoeëne, leefdevolle Körsdaag en ich gun idderein ‘n net zoe biejzónjer 2019 as wie det veur ós ongetwiefeld geit waere!

Hoeëgheid 2019 van de Windjbuujels!