‘t Letste sjtukske in de anonimiteit… Gelökkig en jaomer tegeliek, ’t haet waal iets. ‘t Prinseraoje is flink aan de geng en ich höb al prachtige theorieje gehuuërd. Scotland Yard en de CIA zoude d’r jaloers op zien!

‘n Paar dinge mót ich helaas waal nag ontkrachte, zoeë is mien favoriete pilske neet van ‘t merk Brand, maar van get angers. Ach… maar det zal de “Brand” in uch theorieje weer nao angere rauk leiden. De theorieje euver miene sjriefsjtiel zien op zien minst markant, frappant en opmerkelik te neume. Maar den lèk ich ’t d’r messjiens te diek op. Net zoe as ich neet ‘t “aad wief” geneump had in mien vurrige sjtök (Pé Schouten, José Smets-Dings en ouch mien chevalerèske adjudante attendeerde mich dao hieël hoffelik op). Det brink mich toet ‘t bedanke van Inga mèt häör biedrage as “Aad Wief”. Doe höbs ‘t waanzinnig gedaon en doe verdeens ‘t óm as letste in de riej van “kertrekkers” as letste aaf te moge traeje. ‘t Waert ‘n oetdaging veur de volgende om dich te euvertreffe.

Op de reaksies in de vurrige sjtökke höb ich nag ‘t volgende te zègke;

• ‘t Kompliment van Geert Niessen euver mien sjrieve nim ich van herte toet mich, ich gaon d’r van bloze. Ich höb die reaksie namelijk noeijts gehad op de körstkaertjes die ich dich gesjtuurd höb.
• Die foto van ós twieje Rick Stevens is neet óm aan te zeen en ich haop neet desse die publiceers, det zal Vivian ouch neet appreciëren dink ich.
• Rob Claessen kèn ich vermelde desse ‘t knipuigske vergaete bös, verder waar de vruntjelikke zjwei d’r weer als vanouds ondanks dien drukke baan biej PSW.
• De foto van Haökske 66 is neet gemaak door Leon Smolenaars, maar hae sjtòng waal vlakbiej toen dees genaome waerde beste Pieter Franssen.
• Den de High-Tea…. Ich haop det geur (Rudy de Vlieger) neet te väöl gebaoje höb, maar we zalle ‘t zeker gezellig make. As Karin Vogels ós zaoterdigmiddig oppik den zalle we d’r zien! We verzamele óm 14.00 oer bie mich thoes. We kènne ‘t neet te laat make omdet we nag ‘n belangrieke aktiviteit höbbe ’s aoves.

Verder höb geur ‘t ongetwiefeld al gehuurd of gelaeze. De Blage höbbe ‘t KVL gewònne en de twieëde plaats van Marijn Hermans is eigelik ouch gewuuën ’n ieërste plaats. Wat knap! Allemaol van herte gefiliciteerd! Wat ’n superprestatie. ‘t Bewies maar des te mieër wie veur as klein dörp vastelaovend laote laeve.

Ouch zal ‘t uch neet ontgaon zien det Prins Peter I is opgenaome bie … de EPS. Op dit moment zien we dus effe prinsloos en det huuërt d’r dit jaor noe einmaol bie. Maar gènne paniek, ich huuërde van de PeeKaa det die alles ónger controle höbbe. Ze höbbe zelfs Trump al truuk in ‘t witte hok gesjtuurd óm zich neet mèt ós te bemeuje. ‘t Aafgeloupe jaor höbbe we ‘n fantasties trio gehad mèt Prins Peter I veurop. Ich höb zeker ouch de letste waeke mèt bewónjering gekeke wie dees manne häör rol in de vastelaovend vervulde. Mèt passie, plezeer en oprechtheid sjtraolde ze vastelaovend euver nao de miense. ‘t Zat mich aan ’t dinke en goof mich nag mieër de euvertuging dit veurt te gaon zette. Ich haop det geur ‘t waardige aafsjied bie Kefee Ronckenstein good ontvange höb en belaof uch biej deze det geur mèt ‘n gerös hert oet kènt gaon ruste. De lesse van uch op Facebook zien good ontvange en we zien d’r klaor veur!

Ich wil idderein bedanke veur de leuke interacties op mien sjrieve en ‘t sjrieve van mien adjudante. Wat res is ‘t Prinsebal, de zenuwe nimme toe en ‘t kump noe hieël doeën bie. Veur höbbe d’r zin in.

Beste Windjbuujels en Windjbuujelinnekes … toet zaoterdig!

Hoeëgheid “Elekt” 2017