Oppe Ruiver, volges mich ’t sjoeënste dörp van Limburg. ’t Plekske wao zelfs de Venlose en Remunjse miense jaloers op kènne zien. ’t Dörp wao miense neet vergaete same te geniete van de kleine dinge in plaats van op zeuk te zien nao ’t groeëte gelök. Wao de Riekswaeg dit jaor verangerd in Route 66!
’t Is 21.30 oer, Körsaovend kump d’r aan en de vastelaoveskriebels euverheerse de Körssfeer. De Ruiver is bedeild mèt Windjbuujels en Windjbuujelinnekes die zich sjtraks gaeve aan de Körsborrels of aan de Körsfilms. En ich… Ich zit thoes oppe bank, mèt ’n Prinsemöts op. “Det is nuuëdig óm in te zjweite!”, zeije de leje van de Prinsekemissie… Ich twiefel nag sjteeds of ze mich veur de gek haaje en zich sjtiekem kostelijk amusere mèt dees gedachte. Toch nim ich ’t zekere veur ’t onzekere, ’t zou ens zoe zien.
’t Niejs is mich inmiddels in de sjoon gezak en ’t besef sijpelt good binne: “Prins van de Windjbuujels 2017”, sjiek!
“En den ouch nag in ’t Jubileumjaor 6×11! ’n Groeëte tent oppe mert mèt ’n good programma, ekstra activiteite … ’t waert ’n biezónjer jaor. Vastelaovend viere as noeits te veure!” zei de Prinsekemissie die onaangekondig bie mien gezin binnesjtormde op ‘ne doordewaekse aovend. ’n Krat beer lichter en ’n ervaring rieker.
“En det terwiel ózze huidige hoeëgheid Prins Peter de Ierste nog sjteit te zjweije mèt de scepter en nag neet klaor is mèt zien momente mèt ’n gouwe rendje. Zónne goeje höbbe veur nog noeijts gehad.”
Pffff…Lek de lat maar hoeëg en veur de druk maar op PeeKaa! ’t Löp mich effe dun langs de boks… Gelökkig bliek det maar ’t fleske beer te zien det ich onhenjig langs mich höb geparkeerd. ’t Is omgevalle en ich had ’t neet in de gate, d’r zoot nog maar ’n bietje in.
Ich fantaseer verder euver de vastelaovend en bedink det ich mich neet zoe druk mot make. Ich höb twieje waanzinnige adjudante wao ich trots op bön, die maake ’t fieës gans kompleet en mèt dit Trio zien we onversjlaonbaar! Wat kèn d’r noe misgaon?
Brrrzzzzt… ’n berichtje van de Prinsekemissie: “De adjudante zien verantwaordelijk veur de Prinsemanjtel en en de Prinsevaere aan ’t einde van de aovend, die motte alik thoes kómme en weer truuk. En de Scepter mót geur ouch in de gate haaje, det kós ’n vaat beer asse dae kwiet raaks!” …. Die naate bóks veul ich weer aan mien bein plekke…
Ich gaef toe ’t zien fantastiese jónges die de sjpraekwaordelijke kers op de vastelaovend gaon zette, maar of dit de juuste persoeëne zien veur dees verantwaordelikheid zet mich ff aan ’t zjweite (maar des den waal weer good voor de sjteek die ich op höb). Ich gaon ’t ze gewuuën zelf vraoge ’t antjwaord laes geur de volgende kier.
Kei gaaf…Prins van oppe Ruiver… ich kèn neet wachte en ich höb d’r zin in!
Mèt vrunjtelikke groet,
Hoeëgheid Windjbuujels 2017
