Hoeëggeieërde Windjbuujels en Windjbuujelinnekes,
De vastelaovend laef oppe Ruiver as noeijts teveure?! ’t Is indrukwekkend óm te zeen wie ‘ne Windjbuujel zich inzet veur alle activiteite en evenemente. Of ’t noe de kemissies veur de zittinge zien, de Bacchusklöp, de Windjbuujels, Boerebroelôf, wagebouwers, de prinseraojers, de AJO’s, EPS, joekskepelle, sjminkers, barsjponsoren, gemeintelijke bemeujers of de sjtille genieters. Idderein duit mei! En det, det maak de Ruiver de Ruiver en zoe biezónjer…
Vanaovend is ’t Bacchusoetrope en zal Luuk oetgezjweijt waere, ouch ózze huidige hoeëgheid Windjbuujelprins Twiejedoezendzestien is mèt zien letste mooie momente bezig. Ich wil uch biej deze alvas väöl sjterkte winse en ontzettend bedanke veur ’t aafgeloupe jaor. Z’n goeije höbbe veur nog noeits gehad. Prins Niels I en adjudante Max en Rick regere inmiddels al ’t kómmende jubileumjaor ónger ’t motto “Vastelaovend gen zörg”, van herte gefeliciteerd, we zulle elkaar gauw de handj sjödde.
In ’t létste sjtuk loos ich de bescheidenheid van mien adjudante, die al ónger ’t synomiem “mantelzörger” ’n bleumpke aafsjloge en dudelik maakte wao ‘ne echte vastelaovesvierder ’t veur duit; naasteleefde! Of eigelik ouch waal ’n good glaas beer en väöl gezelligheid, aevegood vaeg ich mich ’n träönke weg. Dees manne (en gèn jónges Leon Smolenaars) weite in ilk geval wie ’t vastelaovesviere in mekaar sjtik, dao höbbe ze ’t book van Marlou de Roover neet veur nuuëdig. Toch haop ich det geur gesjteund waerd in de rol van manjtelzorger door hoeëgedelgesjtrenge vrouwe Petra Dassen-Housen die ich biej deze nog wil felicitere mèt de verlenging van häöre ambtstermien. Ge höb hiejmei weer väöl miense gerösgesjteld.
Óm op de reaksies in te gaon van uch as trouwe laezer kèn ich als ierëste bekènne det we zeker ’n meining höbbe euver de Mansluujzitting. ’t Waas ’n ontzettend sjiek programma wederom en de sfeer waas zoeë good det d’r neet zoe neij mier gekeke waerde nao de jas dae idderein aantrok. Det bringk mich nao Babs Huyben die ‘Häökske 66′ zou reservere. ’n Sjoeën gebaar, maar det häökske bliek d’r gaar neet te zien biej Harry weit ich noe als ervaringsdeskundige. De beste opsie is nummer 366 en dae waar inderdaad vriej, dank hiejveur:
Aan Pieter Franssen kèn ich melde det ich de sjmoking neet allein gepas höb, maar zelfs al höb vettig gemaak. Rob Claessen Claessen sjtelde de vraog of we elkaar ware taegegekomme die waek. Om ieërlik te bekènne weit ich det neet mieër, maar det zou zoemaar kènne en wat zjweis doe altied vrunjtelik. En Hans Niessen, ’t sjpiet mich … mèt de verkoup van de Cdees waar ich neet thoes. Haaj maar ’n exemplaar veur mich apart, want de kwaliteit van die euvergebranjde is maar naadje.
Mochte d’r verder nog vraoge zien den laeze we die ongetwiefeld en zalle mien adjudante en ich die gaer veur uch beantjwaorde. ’t Kump noe hieël doen biej en ich mót toegaeve det ’t ouch sjteeds sjpannender waert. Ich höb ’t oetkómme al 100x belaef in mien gedachte. Sjteeds guuëf ’t mich kiepevel as ich d’r aan dink. De geheime reis geit nog effe verder, maar ’t begin is in zich! Veuralsnog wins ich uch allemaol huuël väöl plezeer met de kómmende festiviteite.
Mèt joeksige vastelaovend groet,
Hoeëgheid elect 2017
