’t Deurt nag 11 maond maar ’t dinke is gesjtart….tenminste….in ’t besjtuur.
In eeders geval zien veur al zoe wied det veur weite waat veur wille. ’t Profiel van de nieje veurzitter det veur höbbe opgesjteld, wille veur den ouch gaer mèt uch deile. Breeve kent geur euveriges neet indeene…..tips gaeve waal. Geur weit ós te vinge.
PROFIEL VEURZITTER v.v. de WINDJBUUJELS
Gezóch: nieje veurzitter per 1 december 2014
Natuurlijk vraoge veur ‘t sjaop mèt de 5 puuët…maar wieër vèlt ‘t waal mei.
Geveul veur Vastelaovend
De nieje veurzitter:
• Hèlt van de Vastelaovend maar hoof gènne echte Vastelaoves-gek te zien
• Hoof daoróm neet persé oet de vereiniging aafkómstig te zien
• Löp de belangriekste aktiviteite mei mèt ’t Gengig Gedeilte, maar hoof zeker neet euveral biej te zien; waal dreug hae den “de möts”
Persuuënlikheid
De nieje veurzitter:
• Haet de nuuëdige laeveservaring zoeëdet hae in moeilikke situwasies vanoet ziene persoeën richting kèn gaeve en kèn optraeje
• Mót verbinjing kènne bringe mèt jóngk en aad; is daoróm neet te jóngk maar ouch neet te aad (35-50 jr)
• Is verbinjer en teamsjpeler; duit ‘t veur de vereiniging en veural neet veur zichzelf; gènne ” jobhopper”
Kómpetensies
De nieje veurzitter:
• Haet de gevraogde kómpetensies in basis in zich; is gènne moeilikke persoeën maar is veural zichzelf
• Hoof neet perfek of hieël ervare te zien; mèt de huidige ervare samesjtèlling van ‘t besjtuur krieg ‘nne veurzitter de kans óm foute te make, te liere en te greuje
• Haet kiek op finansieje en bedriefsveuring, kèn ‘n vergadering leije en óngersjeit hoofzake van biejzake
• Is in sjtaot mèt allerlei types van miense en partners óm te gaon
• Vindj net zoeë gemekkelik ziene waeg richting gemeinte as richting jeugleje
• Kèn good loestere maar dörf diskussie ouch aan te gaon, te interveniëre en in te griepe
• Haet d’r gewuuën zin in; hae kommuniseert, sjtimuleert en entoezjasmeert
• Sjteit aope veur verniejing op alle nivo’s; kiek wieër den korte termien
• Hoof gènne sjpraeker te zien maar dörf waal de mikrofoon te pakke
