“Häökske 66”
Beste Adjudante, wat bóf ich toch mèt uch! Uch wäörd zien gerössjtellend en ich krieg d’r nag mieër zin in den ich al had. De kriebels jeuke wao ze neet jeuke kènne en kratse haet al gènne zin mieër.
’t Wantroeëwe nao uch waas netuurlik neet terech, zoeë-as de hieër Smolenaars en Franssen al suggereerde, maar as ich de foto van ózze hoeëgedelgesjtrenge vrouwe Dassen zeen den begriepe miense messjien mien zörg. Wellich det geur as adjudante mèt häör in euverlegk kènt traeje óm te bezeen wat geur in dergelikke beniepende situasies kènt doon. En messjien det de gemeinte ’t beleid euver manjtelzörg nag ’n kieër ter diskussie wilt sjtelle deze Vastelaovend. Wat vindj geur dao van?
In de reaksie op ’t sjrieve van miene Adjudante loos ich ouch goeije tips euver de scepter. Zoeë sjrief Michel Smeets euver zien eige ervaringe (AUW), ich haop det alles good is gekómme. ’t Is belangrieëk det we as trio van idderein liering trèkke en good loestere nao betrokke Windjbuujels om ’t fieës nag grótter te make.
Erg ieërvol óm te laeze is ouch det Babs häökske 66 veur ós vriej wilt haje oppe Mansluujzitting. We zalle d’r den ouch gebroeëk van make as we kòmme. Naeve de jas van ózze huidig zittende Hoeëgheid dae vurrig jaor zelfs ’t lef had om veur ’t oetkómme ’t podium van de Mansluujzitting te betraeje in ’n sjpetterend optraeje mèt de Toddezék. Petje…uhm sjteekje aaf!
Op de website van de Windjbuujels loos ich det ’t online prinsesjtumme is gesjlaote. As ich de top 10 laes en men zou ‘ne gok mótte wage is ’t veur de handj liggend om veur ‘ne Roy, ‘ne Joep, ’ne Vleeger of eine dae begint met ’n B te gaon. Hoewel Baerke op ein sjteit höb ich in de wandelgange gehuuërd det dae op Wintersjport ging…
Sjoeën wäörd van de nieje Bacchus, ich herkèn vuuël van dien sjrieve. Allein ós trio haet die training óm van de net-neet sixpack aaf te kómme allang gehad. Waem wet sjödde we ós al ierder de handj op de vriedig van ’t Bacchusoetkómme. Eine van ’t trio zal d’r ongetwiefeld effe bie probere te zien. Ich wins dich huuël vuuël plezeer alvas en geneet van elk moment, dat zal ich ouch namelijk gaon doon.
’t Enige det mich nag res te sjrieve in dit sjtök is det ich geniet van deze biezonjere en sjpannende tieëd in dit prachtige dörp. De wäörd van Prins Peter I om in ’t moment te laeve zal ich zeker neet vergaete. ’t Is neet mekkelijk óm z’n sjiek geheim veur dich te kènne haje, zeker neet mèt de miense óm mich haer die nogal gaer Prinsraoje. Gelökkig höb ich mien gezin, mien adjudante en de PeeKaa óm ’t te kènne deile. Ich kèn in ilk geval priesgaeve det ich de Vastelaovend mèt de paplaepel ingegaote höb gekrege oppe Ruiver. Ouch ’t Prinssjap is mich in zekere zin neet vraemp. Móch se as laezer gaer mieër wille weite euver mich of mien adjudante den hoof se det maar te vraoge. Mien adjudante en ich zulle uch vraoge met plezeer beantjwaorde.
Proost!
Hoeëgheid 2017
