Windjbuujelinnekes en Windjbuujels,
Hiej weer ein berichtje van de adjudante, of mantjelzorgers, zoeëwiej de burgemeister ós neumde. Ze haet ós zelfs via Facebook ’n bleumke aangebaoje. ’n Leef gebaar, maar veur sjlaon dit waal aaf. Veur wille de gemeinte neet op extra koste jage en zien dus al tevreje as de burgemeister ós tiedes de sjleuteleuverdrach vriejhèlt.
Nae, mantjelzorg duisse oet naaste-leefde, en veur helpe mèt alle leefde dae hampeleman door dees zjwaore, drökke fase van zien laeve haer! Veur höbbe vol aafsjuw gekeke nao de foto van de mantjel, dae mevrouw Dassen biej ós veurige sjtökske plaatste. Veur zien waal beniejd wat zie gedaon haet naodet zie deze missjtandj in de mantjelzorg binne häör gemeinte gesignaleerd haet: haet zie dit mèt de mantjel der leefde toegedèk, of dit probleem duchtig aangepak, zoeëwie se moogs verwachte van emes dae biej de gemeinte werk?
’n Aantal angere reacties op Facebook gaon euver ’t ervare niveau van ’t dialek van de nieje. Neet zoeë vraemp: dae sjprik al bienao zien ganse laeve Ruivers.
Hans Niesse haet ’t euver de wieëk wao de nieje woeënt. Duit det d’r toe? Of de nieje dus ’n cd gekoch haet biej Hans? Gèn idee… veur höbbe ‘m veur de zekerheid ’n exemplaar gebrandj, den kèn d’r vas oefene. Vief sjieke liedjes veur ’n tieëntje, gèn geld. Maar ja, dae nieje verwach hieël dök de scepter kwiet te waere, dus dae is alvas aan ’t sjpare veur det vaat.
Veur merke det ’t langzaam dónderbiej kump: de pakke zien gepas en zitte wie gegaote, de foto’s zien geknip. D’r waert sjteeds mieër geraoje in ós ómgaeving, ze moste èns weite…
De ieërste zittinge zien al achter de rögk. Veur hure goeie reaksies euver de Vrouwluuj- en Mansluujzitting van aafgeloupe weekend en kieke oet nao de zittinge van de kómmende waeke! Missjien zeen veur ós dao (oucHh), wae wèt?
Veur zeen ós! Messjiens vanaovend? Veur winse in idder geval de nieje Jeugprins(es) en adjudante väöl sukses en hieël väöl plezeer. En Prinses Lynn Bongaerts en adjudante … väöl sjterkte vanaovend.
Zoeë, de taak reup: veur motte weer wiejer mèt dae nieje oppe rögk kratse… ’t is bienao ’n bleumke waerd…
Adjudante 2017
