Leef Windjbuujelinnekes en Windjbuujels,
De ieërste Hoeëgheid van 2015 is d’r oet: Prins Sjors II van Windjbuujels Jeug. Vanoet deze kantj eine dieke proficiat veur dich en dien adjudante Tim en Kwin. Uch geheim is vanaaf noe gèn geheim mier en geur kènt alvas volop genete van de sjoeëne Vastelaovestied. Ich weit zeker det veur d’r same eine ‘Neet te filme Vastelaovend’ van gaon make.
Veur ós begint ‘t noe ouch sjteeds sjpannender te waere. Nag maar twieë waeke en den is ‘t ech zoe wiet. De lètste sjtökskes van de film waere noe aan elkaar gemonteerd zoedet alles op tied klaor is veur de groeëte premiere. ‘t Waert ouch tied om noe get mier euver ós zelf te vertelle.
Veur zien alledrie tösse 3×11 en 5×11. Ouch zien veur alle drie gebaore en getaoge in os sjoeëne Windjbuujelriek. Dao woeëne veur noe nag. Of det in Ruiver of Óffebèk is det maak nieks oet. Vreuger höbbe veur ouch same gelierd. Zoe lang kènne veur ós dus al. Altied same op sjtap gegaon wao veur ónger angere de maedjes höbbe liere kènne.
De ieërste zittinge aafgeloupe weekend zien al verleje tied. Wat haaj ‘t Trommel en Fluiterkorps weer een good programma same gesjtelt. Veur kieke oet nao de Sjterzittinge. Ouch dao zien veur van de partie.
Veur wille idderein dae vanaovend nao de ieërste zitting geit hiel väöl plezeer winse. Ouch alle kinjer die morge mèt de Kinjerzitting meidoon, väöl plezeer. Messjien zeen veur ós waal op ein van dees activiteite.
Veur haope det geur noe get mier van ós te weite ziet gekómme. Höb geur al ein idee, vergaet den veural neet te raoje op de zittinge want det is natuurlik ouch veur ein hiel good doel, namelik de Kinjeroptoch.
Alaaf
