Leef Windjbuujellinnekes en Windjbuujels,
Ich bön zaoterdig uche prins gewaore maar ich veul mich de keuning te riek!!! Wat ‘n ontlading en emosie. En wat ein reaksies…neet normaal. Ich bön d’r hielemaol van in de wolke. Eindelik höbbe veur ós moge prissentere as Windjbuujeltrio 2014 en det waerde tied. ‘t Zjwiege is veurbie.
Luu, veur kènne neet omsjrieve wat ‘n geveul det is óm in zónne geweldige zaal as in de Sjakel door uch zoeë onthaold te waere. Hertverwermend! Bedank dao veur.
De daag begós get zjwaor veur mich: waas vriedig nao ’t LVK gewaes en det hakde d’r effe in. Dus ‘n bietje duf en mèt klein uigskes höb ich nag get boeëdsjappe gedaon en bön ich nag oppe kóffie gewaes bie eks-prins Pieter II en eks-aadwief Christel. Daonao bön ich gaon kaoke want ja doe mós ‘ne goeje baom höbbe as se aan zoeget sjieks begins. Wortelesjtamp mèt braodwors, dao haaj ich ech zin in. En det sjmaakde!
Ónger de douche gesjprónge en mich in mien pilote/purserpak gehese en op nao de Sjakel. Ich haaj gelökkig ein taak gekrege en same mèt mien charmante sjtewardesse Mieke en Nel höbbe veur eine leuke act ineingezatte door miense ieërs door ein deteksiepäörtje nao binne te laote en boardingpasse oet te deile. Naodet de ieërste vluch vertrókke waas waerde ich get nerveuser. Nag efkes en den zól ich mien pilote/purserpak moge omruile veur mien prinsepak. En wie ich dao in de gate sjting en Hans Niessen taege mich zag: ” Noe gaon…” weit ich nimmer wat ich dach en bön geluif ich de buun opgerend en höb letterlik ein gaat in de lóch gesjprónge. Toen waerde mien twieë co-pilote bekend gemaak, Mark en Rick en ouch zie ware dolenthousias. Veur waerde alledrie aangekleid, Renske en Vivian waerde d’r bie gerope en veur zien kompleet!!! De vastelaovend 2014 kèn beginne. Wat ein fieës, wat ein fieës en dit is nag maar ’t begin…
Zondigmorge weer vreug paraat en daonao nao de residensie óm biejein te kómme veur de groepsfoto en óm de Windjbuujel te hijse. Wie det gebeurd waas zien veur mèt eine groeëte sjtoet ein serenaatje gaon bringe bie Nol Wassen. Ein hiel biezónjer moment veur ‘ne hiel biezónjere miens.
Op nao de Paerssjtal veur ’t oetrope van de nieje jeugprins van Jong Nederland. ’t Waas der werm, drök en de sfeer zoot d’r good in…In ’t glaze hoes zote nag ‘n paar kandidate maar wie ich dao efkes nao binne ging sjnapde ich hiel good det der dao ‘n paar oetwolle. Miene leve wat waas ’t d’r werm! En toen waar ’t zoe wiet: ’t trio waerde bekend gemaak. Prins Joep I mèt zien adjudante Rody en Sander…fantasties jónges geur weit d’r ‘n fieësje van te make. Super!!! Veur haope nag väöl van die fieësjes mèt uch mei te make.
Det waas in vogelvluch ós ieërste weekend!!! Veur haje uch op de huuëgte.
Kèn ’t gekker…
Prins Geert I
Adjudante Mark en Rick
