Veur zien halverwaege ós reis, ’n turbulente reis met eindbesjtumming: Hotel de Windjbuujel! Nag veer waeke te gaon toet ’t prinsebal. Ich merk det ’t vastelaovesvirus net zoeë hel óm zich haer griep as ’t griepvirus. Veuralsnag wint biej mich ’t vastelaovesvirus en ich haop det ich det veurluipig zoeë kèn haje. Links en rechs vange veur al get signale op det d’r drök gespeculeerd waerd euver de Nieje. ’t Geit nag alle kantje oet en det maak ’t veur ós extra sjpannend maar zeer zeker ouch sjoeën.

In gedachte höb ich mich al dök de gezichte van sommige luuj probere veur te sjtelle op ’t moment det ich mèt mien adjudante, óngetwiefeld razelend van de zenuwe, oetkóm op ’t Prinsebal. Euver de Sjakel gesjpraoke … ’t Niejaorsconcert van de harmenie waas ouch dit jaor gesjlaag. Sjoeën óm te zeen det ’t fluiterkorps, de harmenie Ruiver en zelfs de harmenie van Beesel sjteeds mieër gaon samewerke. Det duit mien vereinigingshert good.

Ich begreep waal det ’t neet väöl had gesjaeld of ózze Prins Joep II had ’t bienao aaf laote weite nao ’ne wellich iets te gezellige niejjaorsróndjgank mèt de Raod van 11. Noe kèn ich det euveriges good begriepe, want ouch veur höbbe inmiddels al ’n paar kieër moge ervare det aovende mèt de PeeKaa erg gezellig en laat waere. Laot sjtaon as dao ouch nag de res van ’t gengig gedeilte bie kump.

Veur wille netuurlik ouch vanoet dees plaats Marina felisitere mèt ’t behaole van de halve finale van ’t LVK! Wat zou ’t gaaf zien as doe in de finale kums! Veur gunne ’t dich van herte! Dus miense…, vergaet neet te sjtumme! Daonaeve bös se ouch nag ein van de veer finaliste veur de CMC Alaif clip trofee. Wie sjiek is det! Hieël väöl sukses en ós sjtum höbs se uiteraard!

Gelökkig kumt d’r ouch dit jaor ’n Boerebroelofsgezelsjap. ’t Zou dich toch gebeure, des se Prins waers van de Windjbuujels en det d’r den veur ’t ieërs in 55 jaor gèn Boerebroelof is! Wie jaomer zou ‘t zien as d’r kamers in Hotel de Windjbuujel laeg bleeve! Ich bön blie det d’r ouch noe weer vastelaovesleefhöbbers zien opgesjtaon en dees kèr zien gaon trekke. ’n Teiken det de vastelaovend laef in Óffebèk en Ruiver! Vastelaovend viers se same, dus wie mieër Hoeëghede wie sjoeëner! Ich weit zeker det veur d’r  met alle Hoeëghede same ‘ne ontzettend sjieke tied van make en ich kèn neet wachte om uch de handj te moge sjödde.

Waem ich alves ’n spesjiaal welkom in ’t Windjbuujelriek en ’ne dieke prefisiat wil gaeve is Prins Jeffrey Brouwers en Prinses Zenna Feller. Zie zien dit jaor ’t Prinsepaar van de Borchgrave oet Roostere en ze woeëne op dit moment oppe Ruiver aan de Prinses Christinalaan. Waem wet kènne we ós ondanks ós drökke agenda’s nao de 16de fibberwarie nag urges treffe.

Ós reis geit nag effe verder. Same mèt mien reisleiders, Cor en Don, geniet ich nag in relatieve rös van de kómmende sjpannende waeke. De zittinge kómme d’r aan en langzaam waert de Ruiver klaor gesjtoump veur de sjoeënste dage van ’t jaor. Veur winse Prins Joep II en zien adjudante Twan en Roy nag ‘ne prachtige tied toe. Veur zalle uch good in de gate haje en haope – net zoe wie geur det vurrig jaor kreeg – op nag get tips en tricks óm de kómmende waeke door te kómme.

Cor en Don hadde veuralsnag ’n loezelaeve. Behalve det ze mich aaf en toe met allebei de bein weer op de grondj mótte zette, höbbe ze zich nag neet ech meug hove te make. Mer dao zal binnekort verangering in kómme want ze sjtaon te popele óm ouch ens ’t waord toet uch te richte. Ze zien det nieks zeggende gewazel van mich meug en bringe gaer get mieër deepgang in ’t daagbook. Ich wins häör daobie väöl sukses! As geur vraoge veur heur höb, den sjtel ze gerös, dao zien ze reisleiders veur!

Väöl plezeer de kómmende tied!

Hoeëgheid 2019!