Meidoon aan de kinjeroptoch en/of groeëte optoch? En wets se neet wao se mos beginne? Veur helpe gaer.
Op donderdig 19 november organisere veur ‘ne informasie-aovend veur optochdeilnimmers. De aovend is veur individuen, groepe en wagebouwers die nag noeijts höbbe meigedaon aan de optoch. Maar ouch miense die al ens höbbe meigedaon aan de Kinjeroptoch en/of groeëte optoch en nag tips en advieze kènne gebroeke zien van herte welkom.
De informasie-aovend besjteit oet ’n vieftal korte prissentasies mèt voldoende ruumte om vraoge te sjtelle. De prissentasies gaon in op wie se ‘ne praalwage bouws, wat de risico’s en aansjprakelijkheid is van optochdeelname, huuëre veur ervaringe en tips wie se van ’n idee toet de oetveuring kums en lichte veur ’t jury- en optochtregelement toe.
Nao aafloup van de presentaties is d’r nag ens extra ruumte om vraoge te sjtelle aan de optochspecialiste. En wellich waere kontakgegaeves gedeild zoedet geur straks ouch nag ens advies kènt inwinne.
De informasie-aovend sjtart om 20.00 oer op donderdig 19 november aansjtaonde bie kefee-zaal de Paerssjtal. Idderein is welkom. De deilname is gratis en aanmelde veuraaf is neet nuuëdig.
Moch geur op veurhandj al vraoge höbbe den kènt geur ’n mailtje sjture nao optoch@windjbuujels.nl