Op vastelaovesmaondig 3 mieërt trèk d’r weer de groeëte optoch door ’t Windjbuujelriek. Óm 13.30 oer zal de deilnimmer mèt nummer 1 sjtarte en vanaaf de Keulsewaeg richting de Ruiverse mert loupe. De route löp via de Keulsewaeg, Riekswaeg nao ’t Raadhuisplein, wao ’t eindpunt is. As vervolges de prinsewage as lètste deilnimmer de mert opdreijt zal hie kort daonao de priesoetreiking plaatsvinje.

Bie deze ouch ’t verzeuk aan de bewoeëners van de optochroute óm de auto NEET aan de waeg te laote sjtaon en óm ’t hoes zoe sjiek meugelik te versiere. In idder geval de windjbuujel, vaandel of vlag op te hange.

Wils se meidoon den kèns se dich aanmelle via ós insjriefformulier op de Windjbuujelsite. En den kènt geur insjriefe in ’n aantal categorieë: Einzelgengers en duo’s (1-2 pers.), kleine groepe (3-8 pers.), groeëte groepe (>8 pers.) en praalwages. Mel uch aan en den zeet geur vanaaf woensdig 26 fibberwarie (in Puik, www.windjbuujels.nl, social media-kanale van ós) de opsjtelling.

Achteróm is kermis!