Leef Windjbuujels en Windjbuujelinnekes, Noe ’t nieje jaor begós is, begint de sjpanning toch waal toe te nimme. As ich euver de Ruiver loup, dink ich det idderein ’t aan mich zuut. Ouch mien adjudante huuër ich zegke det ze dinke det ’t aan häör te zeen is. Maar eigelik is det ouch waal weer sjiek, zo’n geheim. Natuurlik felisitere veur de hieëre veterane van Revoc/VCB die de halve finale van ’t LVK höbbe bereik. Veur haope det geur de finale in Kessel gaot haole en Ruiver dao moog vertaegewoordige. Veur zoude ’t ouch waal erg sjiek vinje as geur den ouch mèt uch rubberbuütjes nao Kessel gaot. Den ziet geur neet aan de tied van ’t vaer gebonje, en kent geur ’t laat make. Maar let waal op det geur de daag daonao weer ’n bietje fit ziet, want geur wilt uiteraard waal oetgerös op ’t Prinsebal versjiene. De aafgeloupe jaore, wie ich de Prins zoog oetkómme, höb ich sjtiekem ouch waal ens gedach … wat zou det sjoën zien as ich det ouch ens mèt moog make. En noe, dit jaor, moog det! Nog sjteeds krieg ich dae grijns op ’t gezich as ich ’t zegk of dink. Terwiel ein van mien adjudante ós van ein niej drankje veurzuut, höbbe veur ’t mèt väöl enthousiasme euver de dinge die gaon kómme. Euver de vastelaovend, euver ’t oetkómme maar ouch euver de periode toet aan ’t Prinsebal, wao nog waal get sjpannende momente aan zitte te kómme. Ouch zien veur erg beniejd nao de angere Hoeëghede. Ich bön d’r van euvertuug det die allemaol ouch al flinke zenuwe höbbe. Aan Prins Joep I zou ich wille zegke det häökske 11 neet vriej gehaje hoof te waere biej de mansluujzitting morge, maar aevegood bedank veur ’t aanbod. En wat betref det advies wao geur mich in kènt veurzeen…. alle tips zien welkóm. Langzamerhandj beginne mien adjudante toch waal jaloers te waere det zie gen eige daagbook höbbe en vinje ze ’t jaomer det ze nog nieks met uch höbbe kenne deile. Daorom zal ’t volgende sjtukske in ’t daagbook waarsjienlik van häör aafkomstig zien, mesjien det adjudante Ramon en Bas al get tips veur häör höbbe. Zoë, veur razele lekker verder toet aan ’t prinsebal. Veur höbbe d’r sjteeds mier zin in, de sjoon zien gepoets en ingeloupe, de pekskes hange klaor, laot de vastelaovend maar kómme!! Toet sjnel, Windjbuujelprins 2018 PS: veur winse de hieëre van ’t gengig gedeilte väöl plezeer vanaovend mèt de niejjaorsróndjgangk. Det waert weer ‘ne gezellige aovend höbbe veur gehuuërd van de PeeKaa. Volgend jaor zien we d’r bie.

Leef Windjbuujels en Windjbuujelinnekes, Ich besef ’t nag sjteeds neet gans, maar ‘ne jongesdruim geit oetkómme. Ich moog Prins van de Windjbuujels in 2018 waere. Naodet ‘ne gewuuën doordewaekse aovend ‘n verrassende wending kreeg, zoot ich in eine kier bie de PeeKaa aan taofel. En jao … toen waerde mich ‘DE’ vraog gesjteld, die binne ‘n paar momente door de zenuwe mèt ‘n sjtamelend ‘Jao … zeker’ waerde beantjwaord. ‘n Fles beer en eine ganse berg informasie vanoet de PeeKaa kwaam miene kantj op, mer van die informasie is maar hiel weinig blieve hange. De daag daonao höb ich mèt ‘ne grijns op mien gezich belaef. Ein onwerkelik geveul, maar ouch geliek zenuwe, want ’t ieërste wat mót gebeure, is adjudante vraoge. ‘Zörg desse zeker eine(!) versjtenjige d’r biej höbs’ waerde mich door de PeeKaa op ’t hert gedrök. En zoe wie ich dit sjtökske aan ’t sjrieve bön, haop ich det ich ze good höb ingesjat, mer zeker weite doot ich det neet. Aan ’t enthousiasme zal ’t zeker neet ligke, want ‘n paar daag later zote die twieje al bie mich oppe bank en hadde veur alle drie dae groeëte grijns op ’t gezich. En den begint ’t sjpel, terwiel Prins Joep I mèt zien adjudante Bas en Ramon nag ‘n vol programma veur zich haet, höbbe veur ós eige programma. De sjoon mótte waere ingeloupe, de sjteek mót waere ingezjweit en mien adjudante oefene al mèt ’t besjerme van de scepter. En det alles mót in ’t grótste geheim gebeure. Gen gemekkelike opgave kèn ich uch vertelle. De gezellige körsdaag stjaon veur de deur, maar in gedachte höb ich die al lang euvergesjlage, en ouch aadjaorsaovend moog van mich veurbiej vlege. Aaftelle nao 27 januari, nao det moment det veur eindelik met de res van Ruiver vastelaovend kènne gaon viere as ’t Trio van 2018. Iddere kier as ich dao aan dink krieg ich weer kiepevel en zenuwe tegeliek. Wat waert det sjiek! Met klamme hendjes aaftelle nao ’t Prinsebal, nag effe in ’t geheim, maar daonao gaon veur same vastelaovend viere, toet sjnel! Windjbuujelprins 2018

Leef windjbuujels en windjbuujelinnekes,   
Mèt de Körsbbaum links en de gesjtaomde manjtel rechs is de vastelaovend al weer doen bie… Ich realiseer mich det ich ’n jaor geleje op de camping zoot. Op de bank veur de tillevisie mien nieje sjteek in aan ’t zjweite. Det zal de nuuje ongetwiefeld noe ouch aan ’t doon zien. As ich mèt Yvette en Sem oppe Ruiver rondjwanjel, kieke we sjtiekem biej get hoeshajes nao binne of we genne zenuwachtige kaerel zeen mèt ‘ne sjteek oppe kop veur de televisie. We höbbe nag nieks kènne ontdekke.

We höbbe ‘ne fantastische tied achter ós ligke en nog ‘ne hiele sjoeëne tied in ’t veuroetzich. ’n Kort sezoen mèt ’n sjiek programma. ’t Jubileumjaor Route 66 waert omgeduip nao ’t thema “good geknip”. De ieërste gedachtes die ich biej det thema kreeg, ware netuurlik de biejhurende Prins… Den zal de nuuje waal Jûnke waere of eine van Muller. Maar det zou natuurlijk waal hiel veur de handj liggend zien.  Onweitend geit de nuuje ’n geweldig avontuur taegemoet. Maar ouch väöl zjwaore aovende met de PeeKaa. Die jonges kènne namelik neet nao hoes gaon! Net zoeë as mien adjudante, die kènne ouch neet nao hoes gaon… 
Veurluipig wille we ouch nqg neet nao hoes gaon, want we moge nog effe. Inmiddels höbbe Ramon en Bas ’t adjudante vak hiejlemaol ónger de kneen en det wille ze gaer nao ’t volgende trio euverbringe. Asse van foute liers den dink ich det veur as trio enorm wiejs zien gewaore en die wieësheid moog netuurlik neet verlaore gaon. Daorom wil ich vraoge aan de nuuje wat dae gaer zou wille weite zoedet we uch as Hoeëgheid elect 2018  good kènne veurbereide. 

Eine tip: Mog geur nao de mansluujziting kómme den hoof geur gen häökske te risservere. D’r waert d’r namelijk ein veur uch vriej gehaje. Häökske 66 is helaas neet mier. Dus ich sjtel veur det det häökske 11 waert. Ich wins same mèt mien adjudante idderein sjoeën fieësdaag toe en ‘ne goeije roetsj ’t nieje jaor in. Hoeëgheid Prins Joep I Joepie ’t is weer vastelaovend