Bèste Windjbuujelinnekes en Windjbuujels Ouch op vastelaovesdinsdig kènt geur uch de Keuning te riek veule. Want zoe as geur de lètste jaore van ós gewend ziet organisere veur weer de Boerebrunch bie ós residentie kefee-zaal Ronckenstein. Vanaaf 11.11 oer kènt geur hie terech en vanaaf 11.30 oer kènne veur, in ’n ongedwonge sfeer mèt inkele ludieke optraejes, ’t brunch buffet aanvalle. Wilt geur hie aan meidoon kènt geur bie kefee Ronckenstein (aan de bar) terech veur kaarte. Pries veur volwassene 5 euro, kinjer toet 12 jaor zien gratis. Geur kènt ouch kaarte besjtelle bie Jan Hendriks (via jan-nicole@ziggo.nl).
Sjtumme op Veterane van Revoc-VCB
Zoeëwie geur waarsjienlik al gehuurd höb, is de Ruiver dit jaor maar leefs mèt twieë liedjes doorgedrónge toet de halve finale van ’t Limburgs Vastelaovesleedjes Konkoer (LVK). Aafgelaupe vriedaag höbbe de Aad Jeugprinse Óffebek (AJO) häöre sjlaeger “Dae Tore” in de halve finale moge zinge en kómmende vriedaag zien de Veterane van Revoc aan de beurt, mèt häöre sjlaeger “Zugabe!!!” Kómmende vriedaag, 15 jannewari, beklumme de Veterane van Revoc-VCB ’t halve finale-podium in de L1 sjtudio in Mesjtreech. Dees halve finale waert tösse 18 en 20 oeër live oetgezonde op L1 TV en radio. Zaoterdaag 16 jannewari waert dees oetzending herhaold, tösse 10 en 12 oeër. Nao beide oetzendinge höbbe kiekers en loesteraers ’n half oer de tied óm via sms of tillefoon te sjtumme, en zoeë te bepaole welke liedjes de groeëte LVK finale bereike. Veur haope natuurlik det de Ruiver daobiej zit en auch geur kènt daoveur zorge, door op Zugabe!!! (liedje nummer 42) te sjtumme. Óm alvas in de sjtumming te kómme: https://www.youtube.com/watch?v=BphNXeEfucA Wie kèn d’r gesjtump waere? D’r kèn via de tillefoon gesjtump waere, ’n half oer nao aafloup van de oetzending (dus kómmende vriedaagaovend tösse 20 en 20.30 oeër en zaoterdaag tösse 12 en 12.30 oeër). D’r mot op 3 liedjes gesjtump waere, maar zorg in idder geval det liedje 42 d’rbiej zit! SMS: SMS nao 4422 en sjtum beveurbeeld: LVK 42 44 49. In dit veurbeeld op liedje 42, 44 en 49. Gebroek allein LVK veur ’t ierste leed en veur ’n spatie in tösse de nummers van de liedjes. Per tillefoonnummer moogs-se maar eine kieër sjtumme. Belle: Belle kèn auch en auch noe moogs-se maar eine kieër ein sjtum oetbringe per tillefoonnummer. Bel nao 0909 202 70 30 en den kriegs-se instructies via de tillefoon. Veur ’t ierste leed in en sjloet aaf mèt ’n hekske (#), veur den ’t twieëde leed in en sjloet aaf mèt ’n hekske en veur den ’t derde leed in en sjloet aaf mèt ’n hekske. Zorg in idder geval natuurlik det liedje 42 d’rbiej zit en wae wèt, volg d’r veur de Ruiver nag ’n Zugabe in de finale. Allein mèt uch sjteun kènne de manne die finale bereike! Mieër info en tekste van alle liedjes op www.stichtinglvk.nl.
Injrieve groeëte optoch 2016
Beste Optochdeilnimmer(s), As geur dit jaor ouch weer mei wilt doon, lèt den op ’t volgende: De insjrieving veur de Optoch zal dit jaor plaats vinje op: woensdig 27 jannewarie van 19.30 oer toet 21.00 oer in ós Rizzedensie Café Ronckenstein. Maar lök uch dit neet? Download den ’t insjriefformulier 2016 hiej oppe site en mail dit ingevuld nao ’t volgende e-mail adres: optoch@windjbuujels.nl Nao aanmelding ontvange de insjrievers informasie euver inkele verangeringe euver en van de optoch. ’n Paar belangrieke dinge wille veur waal al vas priesgaeve en det is … nao aafloup van de priesoetreiking oppe mert de Bacchusreceptie gehaje waerd en daorom kènt geur ouch al veurdet de priesoetreiking hie plaatsvinjt get te drinke kriege oppe mert. E.e.a. beteikent ouch det veur in taegesjtelling toet veurgaonde jaore ierder sjtarte. Óm 13.30 oer zal de ieërste deinimmer sjtarte. Haaj dus raekening mèt ’n anger begin tiedsjtip as det geur de lètste jaore gewend ziet en nim good de tied óm uch op te sjtelle. Allein de wages Jeugprins(es)e, Bacchus (dae zal äöpene), EPS en evt. Boerebroelof kènne aevegood róndjom de Óffebekse mert klaor sjtaon veur de sjtart, waobie det natuurlik de aanwiezinge van de optochkemissie opgevolg dene te waere. Alle angere wages waere door de kemissie geïnformeerd euver häör opsjtelplaats. De nieje optochkemissie besjteit oet: Twan Bongers, Leon Linssen, Johan Straatman, Rob Hillekens en Hans Boonen. Höb geur vraoge, nim den gerös kontak op met ein van de leje van de Optochkemmissie of sjtel de vraog via ’t e-mail adres. Veur winse uch goej veurbereijinge veur de optoch toe en die nag mótte sjoestere aan häöre wage väöl sukses. Uiteraard zeen veur gaer op de insjrieving. Mèt vastelaovesgroet, Optochkemmissie v.v. de Windjbuujels M. 06 – 308 219 86 (Johan Straatman)
Jeugprinses Lynn I en adjudante Sanne van Willick en Minouk Franssen van herte proficiat!
Veurdet ich verder gaon wil ich idderein ouch via ’t daagbook nag efkes de bèste winse veur ’t nieje jaor toewinse. De Körsbaum is alweer ’t hoes oet. ’t Is 2016. ’t Geit noe ech beginne. Veur gaon ós opmake veur ’ne te gekke vastelaovend. Nag 11+1 daag en veur moge ós aan uch toeëne. De sjpanning sjteig mèt de daag. Ouch op ’t werk waert ’t mieër. Mèt ós nieje jeugprinses Lynn I en häör adjudante kènne veur mèt rech al sjpraeke det ’t ‘nne sjoeëne vastelaovend geit waere. Lynn I en netuurlik adjudante Sanne van Willick en Minouk Franssen van herte proficiat mèt uch beneuminig. Lynn, Sanne en Minouk ich kiek d’r nao oet óm uch te zeen. Maar wat waas ‘t ’n drök weekend. Naeve ’t jeugprinsebal en receptie van Lynn I, de niejaorsconcerte van de Hermenie, de vrouwluuzitting, de aafsjloeting van de tentoeënsjtelling Eskase mèt Frans Pollux en de mansluuzitting. En det allemaol in ein weekend. Veur vinje det veur waal van zoeväöl meugelik oppe huuëgte mótte zien dus dao höbbe veur aan gewerk. Van hure zègke waas de vrouwluuzittting gesjlaag, de mansluuzitting idem dito. Eskace waas sjiek! En de hermenie kiek truuk op twieë sjoeën edities. Wat wille veur nag mieër oppe Ruiver? En noe … sjnel op nao de nieje Bachus aankómmende vriedig, de Sjterzitting op zaoterdig en de Kinjerzitting op zóndig. Wat betröf ós zelf. ’t Meiste is waal geregeld. De pakke passe. De sjoon zien ingeloupe, de sjteeke oetgewied. Mótte waal nag get ingenaome waere. Veur beginne d’r ech zin in te kriege. Veur kómme nag ‘n paar kieër bie-ein óm de puntjes op de ‘i’ te zètte. En den gaas d’rop! Zèt uch alvas in de agenda det geur veur nege oer op ’t prinsebal mót zien. Angers geit ’t geld kóste. En die euro’s kèns se baeter oetgaeve aan get angers. Veur zeen ós op 23 jannewarie róndj de klok van half tien. Good? Toet den. Veur zien de keuning noe al te riek. De nieje en zien adjudante. PS: loester good nao de Heraut tiedes de Sjterzitting!
CD verkoup “De keuning te riek”
Leef Windjbuujels en Windjbuujelinnekes, Op zaoterdig 9 jannewari, zal vanaaf 10:30 oer de nieje cd weer hoes aan hoes waere verkoch. Dit jaor mèt maar leefs 2 halve finaliste van ’t LVK d’r op en ‘ne finalist van’t KVL. Moch geur zaoterdig neet thoes zien en toch gaer de cd wille koupe? Gèn probleem, vanaaf volgende waek is dees verkriegbaar bie de Bruna oppe Riekswaeg.
7 fibberwari Kinjeroptoch 2016
Allein , mèt vrunj of vriendinne, mèt eine groeëte groep, mèt de klas , of mèt de ganse sjoeël! Doe duis toch ouch mei aan de Kinjeroptoch 2016! Veur winse uch vuuël suukses mèt ‘t oetdinke en óntwikkele van uch krejasies en zeen uch insjrieving gaer kómme. Höb geur vraoge, sjtèl die den grös via de meel: r.claessen@ziggo.nl. Insjrieve veur de optoch kènt geur doon biej veurkeur via de mail, en angers via ’t insjriefformulier oppe site van de windjbuujels, deze oet printe, in vulle en in de brevebös van Rob Claessen Parklaan 65 doon.
30 extra zitplaatskaarte veur de Sjterzitting
16 Januari is de Sjterzitting. Zoeas geur weijt zien alle zitplaatsen oetverkóch. Door same met Zalencentrum “de Sjakel” nog ens good te kieke wat de meugelijkhede zien, kènne veur as joekskommissie uch mededeile det d’r ’n oetbreijing kèn plaatsvinje van 30 kaarte. In totaal zalle d’r 220 zitplaatse zien. Dit beteikent det geur kènt reagere nao ’t volgende mailadres sterzitting@windjbuujels.nl. Mail nao dit adres zoedet geur kans maak op die letste zitplaatse. As der mier as 30 kandidate zien zal d’r gelaot waere. De desbetreffende kanditate kriege via de mail te huuëre det se dees kaarten taege 17,50 kènne ophaole. Helaas kènne veur dit jaor – simpelweg door ’t korte sezoen – neet zoeväöl zitplaatse beje. Om toch genog miense de gelaegenheid te gaeve óm de Sjterzitting te bezeuke höbbe veur sjtaonplaatse ingerich. Dees gezellige sjtaonplaatse zien te verkriege taege 15 euro.
Kinjerzitting 2016 op 17 jannewarie
Op 17 jannewarie organiseert Windjbuujels’Jeug weer de Kinjerzitting in de Sjakel. Vanaaf 14.30 oer zien de deure geäöpend. Óm 15.00 oer sjtart ’t programma. Ouch dit jaor is de entree veur idderein gratis. Veur 4 euro zien d’r weer kraskaarte veur de kinjer. Veur ein kraskaart kriege de kinjer 2 konsumpsies, ’n zekske chips en ’n zekske sjnoep. In samewerking met Puur Theater is d’r dit jaor gewerk aan ’n aantal nieje elemente in ’t programma! Wie det d’r precies oetzuut, verklappe v’r nag neet. Waal kènne v’r alvas laote weijte det de Plunskes, Merijn, Roy van de Broek, Miejske, Marina en nag väöl mieër anger jeug oppe bühne zalle versjiene. De prissentasie is in henj van Keith Dewinden. ’t Belaof weer ‘ne boeiende, sjwingende, gezellige en kei leuke middaag te waer. Mis det neet! Toet den.
Twieje liedjes in de halve finale van LVK
De Ruiver sjteit dit jaor maar leefs mèt twieë liedjes in de halve finale van ’t Limburgs Vastelaovesleedjes Konkoer (LVK). Kómmende vriedaag sjtaon de Aad Jeugprinse Óffebek (AJO) mèt häöre sjlaeger “Dae Tore” in de halve finale en de vriedaag daonao zien de Veterane van Revoc aan de beurt, mèt häöre sjlaeger “Zugabe!!!” Kómmende vriedaag, 8 jannewari, beklumme de hieëre van de AJO ’t halve finale-podium in de L1 sjtudio in Mesjtreech. Dees halve finale waert tösse 18 en 20 oeër live oetgezonde op L1 TV en radio. Zaoterdaag 9 jannewari waert dees oetzending herhaold, tösse 10 en 12 oeër. Nao beide oetzendinge höbbe kiekers en loesteraers ’n half oer de tied óm via sms of tillefoon te sjtumme, en zoeë te bepaole welke liedjes de groeëte LVK finale bereike. Veur haope natuurlik det de Ruiver daobiej zit en auch geur kènt daoveur zorge, door op Dae Tore (liedje nummer 38) te sjtumme. Óm alvas in de sjtumming te kómme: https://www.youtube.com/watch?v=GwexAC0-GNU en https://www.facebook.com/thijs.metsemakers.7/videos/1046831262034120/?theater Wie kèn d’r gesjtump waere? Dit jaor gèn geknip en geknutsel mèt bónne oet de gezèt… d’r kèn allein via de tillefoon gesjtump waere, ’n half oer nao aafloup van de oetzending (dus kómmende vriedaagaovend tösse 20 en 20.30 oeër en zaoterdaag tösse 12 en 12.30 oeër). D’r mot op 3 liedjes gesjtump waere, maar zorg in idder geval det liedje 38 d’rbiej zit! SMS: SMS nao 4422 en sjtum beveurbeeld: LVK 38 32 37. In dit veurbeeld sjtum se den op liedje 38, 32 en 37. Gebroek allein LVK veur ’t ierste leed en veur ’n spatie in tösse de nummers van de liedjes. Per tillefoonnummer moogs-se maar eine kieër sjtumme. Belle: Belle kèn auch en auch noe moogs-se maar eine kieër ein sjtum oetbringe per tillefoonnummer. Bel nao 0909 202 70 30 en den kriegs-se instructies via de tillefoon. Veur ’t ierste leed in en sjloet aaf mèt ’n hekske (#), veur den ’t twieëde leed in en sjloet aaf mèt ’n hekske en veur den ’t derde leed in en sjloet aaf mèt ’n hekske. Mieër info en tekste van alle liedjes op www.stichtinglvk.nl. Zorg in idder geval natuurlik det liedje 38 d’rbiej zit en wae wèt, bereik ’n liedje euver de Óffebekse kerktore de finale van ’t LVK…
Weg körs … op nao 2016
De Körs is gewaes, veur zien weer aangegaete en -gedrónke. Det lètste geldt zeker veur diegene, die nao ’t Körskiene zien gewaes. Of neet? D’r waere weer nieje veurnimmes gemaak veur ’t nieje jaor. “Die kilo’s mòtte d’r weer aaf”, huuër ich sommige zègke. Maar det is gèn probleem. Toch? In ’t nieje jaor kèns se dao aan gaon werke. ’t Waert veur mich sjteeds moeilikker nao mien geveul. “Kènne ze ’t aan mien gezich zeen?”, “Doot ich angers as angers?”, “Nae, nae, nae. Doot maar gewuuën”. “Doot maar gewuuën Keuninklik”, den velt ’t nemes op. Haop ich. Ich haaj ’t berich deze kier kort. Geur ziet allemaol bezig mèt de veurbereidinge van aadjaorsaovend. En ich wil uch neet van de wies bringe. Ich wil waal nag efkes de AJO’s en de hiere van Revoc/VCB felicitere mèt ’t behaole van de halve finale van ’t LVK. Gank d’rveur den kump ’t allemaol good! Ich höb al oet betroebare bronne gehuuërd det dit veur sommige ’n verrassing waas. Kèns se ens zeen dets se d’r ouch ens naeve kèns zitte. Ich dink dök aan waem same mèt mich en mien adjes in de vastelaovend van 2016 veurop geit. Nag ’n dieke waek en den kump de Jeugprins(es) al oet. En ’n waek later maak Bacchus 2016 zich bekend. Jeugdprins JN, ’t Aad wief, ’t jeugboerebroedspaar, ’t boerebroedspaar volge den razendsjnel. Ich wins alle hoeëghede sukses mèt de veurbereidinge en alle sjpanning. Ich zal in idder geval dao wao ich kèn de Keuninklikke waeg veur uch vrie make. Leef Windjbuujelinnekes en Windjbuujels, allemaol de bèste winse veur 2016, in ’n goeje gezondjheid. De nieje.