Hallo Windjbuujellinnekes en Windjbuujels, Mèt dees drökte, vluug de tied ech. ’t Geit noe daag in daag oet werkelik razendsjnel. De lètste puntjes oppe ‘i’ höbbe veur net d’r op gezatte mèt de PeeKaa. De waeg is vrie, de kesjtielmeister is ingelich zoeëdet veur zaoterdig in eine rök de buun op kènne. Maar veurdet ich verder gaon ieërs efkes Bacchus Luuk I en zien klöp nag ens van herte felisitere. Sjoeën det veur sjtrakkes same mèt  Prinses Lynn I in de Ruiverse vastelaovend veurop gaon. Ouch dit jaor moog de vereiniging en ’t dörp de Ruiver gruuëts zien oppe Sjterzitting. Minnig dörp en vastelaovesvereiniging zól zich zónne zaal en programma winse. En as ich die kinjer zeen sjittere en sjpringe oppe buun, den is det ouch ’n superdiek kompliment aan de kemissie van de Kinjerzitting waerd. Maar wat is det toch jaomer det veur zóndig ouch huuërde det de AJO en de hiere van Revoc/VCB neet in de LVK finale sjtaon. Veur haje toch gaer weer ’n Ruiverse LVK finalist gehad. Ós sjtum haje ze in idder geval. Truuk nao ’t noe. Ich huuër van allerlei name in Óffebek en oppe Ruiver róndjgaon en soms kieke miense mich aan mèt van die uig – teminste det dink ich – waert dae ’t? Ich kèn uch in idder geval zègke det ’t neet altied meivèlt. Nim de T.O.D. bieveurbeeld. Die zègke det ze mich in de gate höbbe. Is det waal zoeë? En den veur Wieniewaagt. Geur wilt get mier euver mich zelf weite. Maar die vraoge van uch… Laeftied? Getrouwd? Kinjer? Det brink mien bekendheid waal erg in gevaor. Ich haaj ’t gaer ’n bietje veilig. In idder geval zal ich uch vraoge kómmende zaoterdig beanjtwaorde. Good … ’n klein antjwaord den … miene laeftied pas in idder geval bie miene laevesjtiel. En mien hoeselikke omgaeving sjluut aan bie miene laeftied. Veur winse Ryan en zien adjudante John en Ron väöl plezeer en ouch sjterkte toe aankómmende vriedig. Geur waas ein super trio! Haopelik kènne veur det veurtzètte. Toet sjlot. Veur zien oppe tied zaoterdig want óm 21.00 oer sjtaon de paortwachters aan de kesjtielpaort van de Sjakel. Die laote dich nao 21.00 oer allein binne as se 5,= euro betaals. En veur die euro’s kèns se d’r ouch ‘ne drinke mèt ós. Toet zoaterdig!?, De Nieje en zien adjudante.