Leef Windjbuujelinnekes en Windjbuujels, Op dit moment liek ’t röstig in ’t Windjbuujelriek en idderein is in aafwachting of d’r de kómmende maondj nag meugelikheje ontsjtaon óm ós vastelaoveshèrt toch nag efkes roeëd, gael en greun te kènne laote kloppe! Vastelaovesvereiniging De Windjbuujels haet in idder geval neet sjtil gezaete de aafgelaope tied. Ós vereiniging is volop in bewaeging. Middels dit berich kondige veur namelik ‘nne wisseling aan van de Vors en sikkretaris van V.V. De Windjbuujels. Tiedes de lejevergadering van 4 juni 2021 haet ózze huidige Vors Sjoerd van Leipsig aangekondigd óm ‘t Vorssjap nao 7 jaor te wille euverdrage per 11 november 2022. De drökke en onregelmaotige werkzaamheje in de Ambulancezorg zien veur Vors Sjoerd ’n belangrieke raeje achter zien besjloet. Gaer hadde veur dees wisseling aangekondig tiedes ós lejevergadering. Veur höbbe echter besjlaote hie nimmer mei te wille wachte en traeje daoróm noe mèt dit niejs nao boete. ‘T besjtuur is verheug uch te kènne mètdeile det veur ‘nne opvolger höbbe gevónje en dreug Jeroen de Mol veur as nieje Vors van V.V. De Windjbuujels. Tiedes de äöpening van ‘t volgend seizoen op 11 november 2022 zal Vors Sjoerd ‘t sjtèkske euverdrage aan ziene opvolger. Jeroen is ‘nne rasechte Ruiverse jong dae mèt twieë bein in ós gemeinsjap sjteit. Ónger angere as lid van Revoc/VCB, mede organisator van ’t jaorliks Ruivers Toeptoernooi en bie väöl miense bekend as mede organisator van de dörpsquiz RuiverPedia. Jeroen is 32 jaor en wónt same mèt zien maedje Anne-Marie en häör pasgebaore zoontje Tuur oppe Börgemeister Claessenssjtraot. In ’t dageliks laeve is Jeroen werkzaam as óngerwiezer bie De Wijnberg. Det Jeroen ‘t vastelaoveshert oppe juuste plek haet zitte höbbe veur allemaol kènne zeen wie hae in 2019 de Bacchusklöp veur ging as Bacchus Jeroen. ‘T besjtuur haet ‘t volste vertroewe det mèt Jeroen ‘nne waardige opvolger gevónje is veur ‘t Vorssjap veur de kómmende jaore en ein welkomme aanvulling in ’t besjtuur. Jeroen zal toet aan november alvas gaon métdreije in ’t besjtuur en Vors Sjoerd zal Jeroen de kómmende maondje waegwies make as aansjtaond vors. Behalve de aansjtaonde vorswisseling, sortere veur ouch al veur op ’n euverdrach van ’t sikretariaat. Ózze huidige sikretaris Erik haet aangekondigd nao dit jaor plaats te make veur vers blood. ‘T besjtuur is blie ouch veur dees plek ‘nne gesjikte kandidaat te höbbe gevónje in de persoeëne van ózze huidige hoegheid Prins Sjoerd II (Palmen). Sjoerd zal nao ’t aaftraeje van zien prinssjap verbónje blieve aan ós vereiniging en waert tiedes de lejevergadering in november veurgedrage veur ’n plek in ’t (dageliks) besjtuur veur de taak van sikkretaris. Veur winse Jeroen en Sjoerd alvas väöl sukses mèt häör nieje functie! Names ’t besjtuur van V.V. De Windjbuujels Mèt vastelaovesgroete, Roy Linssen  Veurzitter

Leef Windjbuujelinnekes en Windjbuujels, Net as väöl angere vastelaovesvereiniginge in de regio is vastelaovesvereiniging De Windjbuujels oppe Ruiver aafgeloupe waek op ‘t puntj belandj det veur ein besjloet mótte nimme euver de aansjtaonde vastelaovend. Vraoge veur ‘nne nieje Hoeëgheid? Kèn de kaartverkoup veur zittinge van sjtart? Kènne veur wagebouwers greun leech gaeve? Op dit moment zien alle antjwaorde op dees vraoge onzeker. De besjmettingscijfers zien nag te hoeëg, in de ziekehoeze is ’t nag te drök en de zörg róndjom de opkómmende omikron-variant nimp mèt de daag toe. Door de geldende maotregele waere veur flink belemmerd óm alle benuuedigde veurbereijinge tiedig te kènne treffe. De huidige ómsjtanjigheje laote ós daoróm gèn anger keus den te mótte besjloete óm ‘nne sjtreep te zètte door alle georganiseerde vastelaovesaktviteite van ós vereiniging toet aswoensdig. Veur rope dit jaor gén nieje hoeëghede oet! Vastelaovesvereiniging De Windjbuujels wilt binne ós deepgewortelde vastelaovestraditie ‘nne volwaardige vastelaovend kènne organisere en kènne beje. “Veur doon ’t good of veur doon ’t neet!” . Veur ‘t twiejde jaor op rie zien veur weer “gans van sjlaag” . ‘T besjtuur van De Windjbuujels zien ós vriewilligers erg dankbaar veur alle geleverde insjpanninge óm van de vastelaovend 2022 ’n onvergaetelikke fieës te make! Net as Körsmis en aad op niej waert ‘t desondanks gewuuen vastelaovend! Móch de situatie ‘t taege dae tied toelaote, den zien veur d’r van euvertuug det d’r genóg flexibiliteit en krach zit in ós vereiniging óm de vastelaovend same te kènne viere, al zal ’t last-minute en kleinsjalig van karakter zien! V.V. De Windjbuujels sjtik vanoet dees plaats alle (horeca)óngernimmers ein diek hért ónger de reem veur de tied dae veur ós lik. Veur haope uch allemaol weer sjnel te zeen en blief gezondj! Besjtuur V.V. De Windjbuujels

Leef Windjbuujelinnekes en Windjbuujels,   Gisteraovend höbbe veur allemaol getuge kènne zien van de persconferentie wao in door premier Rutte en minster De Jonge sjtrengere maotregele zien aangekondig die vandaag om 18:00 oër in gaon. Hie haje veur al ’n bietje raekening mèt gehaje. De toeën van de persconferentie waas dudelik. Van idderein waert in de kómmende waeke get extra’s gevraog óm ‘t coronavirus weer ónger de doem te kriege. Vandaag haet ’t besjtuur van V.V. De Windjbuujels in ein extra euverlèk gekeke welke gevolge det de nieje maotregele höbbe veur de geplande aktiviteite in de kómmende tied. Ós oetgangspunt is det veur binne de ómsjtandigheje wao in veur zitte wille kieke welke aktiviteite veur op verantjwaorde wieze kènne laote plaatsvinje in de periode die veur ós ligk.    *Liedjesaovend* ( _sjting gepland op zaoterdigaovend 20 november_ ) De huidige richtliene gaeve gèn ruumte óm de liedjesaovend te laote plaatsvinje zoe as gepland. In euverlégk mèt de liedjeskemissie zeuke veur nao ’n alternatief óm de liedjesaovend óm te zètte nao ein middig evenement medio december. Veur vinje ’t belangriek óm rech te doon aan de belangsjtelling en al ’t werk van liedjessjrievers, zéngers, bandleje en kemissie. De exacte datum verwachte veur halverwaege kómmende waek bekend te kènne make. Hie euver zien veur momenteel nag in euverlèk mèt angere vereiniging om ‘t gebroek van de locatie aaf te sjtumme. Veur vertrouwe d’r op det de huidige richtliene nao 4 december teminste waere verlingk of (haopelik) versoepeld zoedet veur de liedjesmiddig den verantwaordj door kènne laote gaon.    *Blageliedjesmiddig* ( _sjting geplend op zóndigmiddig 21 november_ ) Kiekend nao de geldende regels den zól de blageliedjesmiddig in principe door kénne gaon. Deze middig is echter wat faciliteite betröf (dink aan leech en geluid) ónlosmakelik verbónje aan de liedjesaovend. Nao euverlèk mèt de liedjeskemissie en de kemissie kinjerzitting höbbe veur besjlaote de “Blage” tiedes de kinjerzitting ‘t podium te gaeve. De blageliedjesmiddig verplaatse veur dus nao zóndigmiddig 30 jannewarie en maak óngerdeil oet van de kinjerzitting.    *Dines des Buutes* ( _sjteit gepland op zóndig 28 november_ ) Dines des Buutes is ein kleinsjalige aktiviteit, mèt kaartverkoup, toegangscontrole en vaste zitplaatse. Dees aktiviteit kèn binne de huidige richliene op verantwaorde wies door gaon.    *Jaorvergadering V.V. De Windjbuujels*  De jaorvergadering van ós vastelaovesvereiniging höbbe veur geplend op zóndig 12 december óm 11 euver 11 bie kefee Ronckestein. Veur leje alvas ‘nne datum óm in de agenda te notere!   De huidige situatie vreug van väöl miense de nuuedig flexibiliteit. Det realisere veur ós! Veur wille ós röstig haje en ós maatsjappelikke verantjwaordelikheid toeëne in de kómmende waeke. Dao naeve wille veur de vastelaovend oppe Ruiver laevedig haje! Veur dinke det veur det op dees wieze kènne bewerksjtellige.   Names ‘t besjtuur van V.V. De Windjbuujels   Roy Linssen Veurzitter

Leef Windjbuujelinnekes en Windjbuujels, Op zaoterdig 9 oktoeëber höbbe veur ‘nne fantastische aovend belaef. Neet allein omdet veur eindelik ózze kersverse Windjse Windjbuujelhajer höbbe kénne decorere, mer veur höbbe dae aovend ouch weer ’n bietje vastelaovend gepreuf! En dét sjmaakte nao mier. Veur zien mèt volle energie aan de sjlaag gegaon mèt alle veurbereidinge óm de kómmende aktiviteite weer ens duchtig oet te pakke ! Veur haje toen neet verwach det de waereld d’r good 4 waeke later zoe angers oet zól zeen. ‘T aantal besjmettinge loupe in rap tempo op, ziekehoeze ligke vol, evenemente om ós haer waere gesjrap en de miense in de zorg luje de noeëdklok. Det vreug ouch van ós óm ‘n sjtandpunt in te nimme euver de kómmende aktiviteite wao veur zoe nao oetkieke! Mèt pien in ós hért höbbe veur besjlaote óm ‘nne sjtreep te zètte door de äöpening van ózze vastelaovend op vriedig 12 november. Paaf Alaaf geit neet door! Ein lestig en döbbel besjloet. Einerzijds omdet ós geveul zaet det veur gaer vastelaovend wille viere; vastelaovesvierders wille d’r gaer oet en wille same kómme. Veur vraoge ós aaf wao ‘t weer haer geit. Angerzijds zaet ós versjtandj det ’t gezeen de corona ontwikkelinge noe neet versjténjig is, ouch al zól ’t moge volges de huidige richtliene. Vriedig is d’r weer ein persconferentie. ‘T lik in de lien der verwachting det d’r sjtrengere maotregele waere aafgekondigd. Veur vinje ‘t óngepas óm mèt dit veuroetzich nag sjnel ’n graantje mei te pikke! Veur vinje dit ein biezónjer jaomer besjloet veur de kemissie Paaf Alaaf en veur café De Paerssjtal die ‘nne geweldige aovend veur uch in petto haje. Euver de aansjtaonde liedjesaovend, Blageliedjesmiddig en Diner des Buutes höbbe veur nag gén besjloet genaome. Veur wachte de ontwikkelinge en de persconferentie efkes aaf óm te zeen welke ruumte det d’r is wao in veur dees aktiviteite kènne laote doorgaon. Veur zien weer efkes ” gans van sjlaag “, mer haope uch sjnel weer te zeen! Names besjtuur V.V. De Windjbuujels Roy Linssen Veurzitter

Veur pakke duchtig oet! Op 12 November vinjt de äöpening van de vastelaovend plaats bie De Paerssjtal. De zaal is aope vanaaf 20.00 oer. Veur de äöpening van os nieje vastelaovesseizoen kriege veur medewerking van Joekskapel Joekskapel de Gresbuus, Sjöppe Aos, Heite Soep en Roy Selder! Veur haope met ug same de vastelaovend te äöpene!

Veur pakke duchtig oet! 20 en 21 november sjteit weer gans in ’t teike van vastelaovesliedjes oppe ruiver!! Veur zeen os den!

“Hert veur Beesel” un Sjpesjiale live oetzending op vastelaoveszóndig van omroop P&M wao aandach waert gevraog veur de óngernummers in ós gemeinte…. Veur mier informatie kiek op: https://ontdekbeesel.nl/nieuws/hart-voor-beesel-op-carnavalszondag/

In aanloup nao ‘t jubileumseizoen 6×11 jaor V.V. De Windjbuujels is d’r al ‘ne top 66 van alle vastelaovessjlaegers in ‘t Windjbuujelriek gepresenteerd. Dae top 66 is toen tiedes Paaf Alaaf 2016 gedreid en zelfs live gezónge. De top 11 van toen waas: 11e Dae Tore, AJO 10e Kop veur de Vastelaovend, Veterane Revoc/VCB 9e ‘t Allerlètste muntje, 25+ 8e Óffebek blief Óffebek, orkes Cosy 7e As de aje zich begaje, Veterane Revoc/VCB 6e Zugabe!!!! Veterane Revoc/VCB 5e De Beerboek, de EPS en Det mót kènne. 4e Bye, bye, bye, Madonna, de Veurwasjes 3e De Zaagte “Geej”, Lei Driessen 2e Honing aanne vot, Leiding Jong Nederland 1e Good geammeseerd, Det mót kènne   Dit jaor wille veur gaer as ode aan alle vastelaovesliedjessjrievers en artieste nag ens ’n lies van favoriete sjlaegers gaon samesjtelle. Dao kènt geur aan meidoon door te sjtumme op maximaal 11 van de 192 liedjes oet de óngersjtaonde lies. Det zien de oeits op ‘ne geluidsdrager (Single, Elpee, Cassettebendje of CD) oetgebrachte nummers in ós Windjbuujelriek. Det sjtumme kèn door veur 6 fibberwarie 2021 ‘ne mail te sjture nao redaksie@windjbuujels.nl mèt dao in uch favoriete windjbuujelsjlaegers (maximaal 11). Per identiek mailadres moog d’r eine kier gesjtump waere. In de Puike Windjbuujel van 10 fibberwarie zalle veur de definitieve top 111 presentere.   Lies sjlaegers Top 111

Beste Windjbuujels en Windjbuujelinnekes, Wij bevinden ons in een bijzondere tijd. Een tijd waarin sinds jaren het Vastelaovesfieës niet door kan gaan. Toch wil de Kinjeroptoch kemissie van VV de Windjbuujels de jeugd aanmoedigen om samen een digitale Kinjeroptocht in elkaar te knutselen om deze tijd positief door te komen. Voor deelname aan deze digitale optocht is het volgende reglement bindend: Houdt bij het maken van de creatie de geldende Corona maatregelen in acht. Alle kinderen en jongeren van Reuver mogen deelnemen. Knutsel een eigen creatie (wagen, eenling, kleine groep) bijvoorbeeld met Lego, playmobil of van kostenloos materiaal. Je mag ook een toneelstuk in elkaar zetten. Maak een filmpje van de creatie. De maximale duur van het filmpje is 1 minuut. Post het filmpje op facebook of stuur het naar patrickhermans1@gmail.com Zet je het filmpje op facebook, dan ‘tag’ hierin VV de Windjbuujels en Windjbuujels Jeug. Daag via facebook/twitter ook iemand anders uit om deel te nemen. Let bij het posten op de geldende AVG regels en vraag je ouders om toestemming. De beste vijf deelnemers worden door de kemissie Kinjeroptoch beloond met een beker. De beste drie krijgen naast de beker een geldprijs. Alle filmpjes worden door de Kinjeroptoch aan elkaar geplakt. Via Youtube zal deze kinjeroptocht live gaan op zondag 14 februari om 13:30 uur.   Jongens en meisjes veel plezier……..en zet hem op.   Kinjeroptochkemissie VV de Windjbuujels.