Windjbuujellinnekes en Windjbuujels, Zoe net veur de zomervakantie höbbe veur uch – via ózze niejsbreef – ‘ne veuroetblik gegaeve op ‘t kómmende vastelaovesseizoen 2020-2021. Mèt ‘t coronavirus op ózze bagagedrager waerde ós veurbereijinge op ‘t nieje seizoen sjterk behinjerd. D’r waas twiefel in ‘t besjtuur en bie de kemmissies, mer mèt meugelikke versoepelinge vanoet de euverheid in ‘t veuroetzich en ómdet ós vastelaoves-blood ouch kruup wao ‘t neet gaon ken, bleef de haop besjtaon det veur van de vastelaovend zoeas veur det gewend zien ‘n fieës van verbónjeheid kóste make…..desnoeëds in aangepaste vorm. Veur haje ós immers veurgenaome ‘t maximaal meugelikke oet ós activiteite te wille haole.   Noe zón twieë maondj later waert ós laeve nag sjteeds beïnvloed door ’t coronavirus. Nao inkele versoepelinge in de vakantieperiode waert d’r intösse weer naogedach euver ‘t verder aantrekke van de teugels. ‘t Virus is weer bezig aan ‘ne opmars ….. veur zien d’r dus nag neet vanaaf. Veur zien den ouch in de sjtellige euvertuging det ‘t coronavirus ‘ne sjterke invloed geit höbbe op ózze vastelaovend. De huidige 1,5 maeter-maatregel zit nag sjterk verankerd in de regelgaeving en mèt dit veuroetzich is ‘n sjpontane- en óntsjpanne vastelaovend zoe good as ondinkbaar. Vastelaovend is ‘n fieës van same hosse en sjpringe, same zingen, same lache en mekaar lekker same vaspakke …. det alles zit d’r neet in deze kier! Veur wille daonaeve bie veurkómme det ein van ós activiteite as katalysator geit werke in de verdere versjpreiding van ‘t virus.   Dit alles haet óngertösse al geleid toet ‘t aflasse van ós liedjesweekend in oktoeëber. Helaas blief ‘t dao neet bie, want mèt pien in ós vastelaoveshert – en nao aafsjtumming mèt ós Ruiverse en Óffebekse zustervereniginge, C.V. De Drake oet Beesel en mèt burgemeister Vostermans – höbbe veur helaas mótte besjloete det De Windjbuujels en de Boerebroelof Ruiver – Óffebek in ‘t seizoen 2020-2021 gèn activiteite gaon organisere. Wie gaer det veur ’t ouch zólle wille, zelfs mèt ‘t in ach nimme van alle richliene en ‘t bedinke van allerlei alternatieve, kènne veur de gezóndjheid van ós vastelaovesvierders neet garandere. Daonaeve is dit ‘n verantjwoordelikheid die veur neet kènne / wille nimme. Väöl windjkrachte höbbe De Windjbuujels in de afgelaope jaore doorsjtaon, mer de krach van ‘t coronavirus is ouch veur ós ‘n mäötje te groeët.   Concreet beteikent dit det d’r in ‘t kómend vastelaovesseizoen gèn activiteite zalle waere georganiseerd, en det d’r gèn nieje hoeëgheje kómme. Prins Sjoerd II mèt adjudante Tom & Joppe, Jeugdprinses Lissy I mèt adjudante Sien & Janne, de Boeregezelsjappe mèt Boerebroedspaar Ruud & Linda en häör getuge Erwin & Kim en Roy & Dana en Jeugdboerebroedspaar Guusje & Pepijn mèt häör getuge Bibi & Cas blieve dit jaor aan en volgend jaor zalle zie häör huidige seizoen op ‘n Windjbuujels waardige wieze aafrónje.   ‘t Genaome besjloet velt ós zjwaor, mer raekening hajend mèt de huidige veuroetzichte en de benuuedigde veurbereijingstieje van de diverse activiteite, res ós noe gèn angere keus. Ouch zónger det de Windjbuujels häör programma dreije, zal d’r ongetwiefeld ‘gewuuen’ – en passend binne de den geldende regelgaeving – vastelaovend gevierd gaon waere in 2021. ‘t Zal angere d’r neet van weerhaje óm sjpontaan activiteite te gaon organisere. Wao meugelik sjtaon de Windjbuujels klaor óm hiejin mei te dinke.   Dit jaor blieve ós kostuums dus in de kas en de sjteke in ’t kóffer. Veur noe: Blief veural gezóndj en haopelik treffe veur ós ’t dao-op volgend seizoen weer tiedes vastelaovend 2021-2022. Veur höbbe d’r noe al weer zin in! Mèt vastelaovesgroete, Names ’t besjtuur van V.V. De Windjbuujels en Boerebroelof Ruiver – Offebek.

Windjbuujels en Windjbuujelinnekes, Nao aanleiding van de lètste maatregele ómtrent COVID-19 die aangekondig zien, höbbe veur euverleg gehad mèt de liedjeskemissie, blageliedjeskemissie en besjtuur. Hie oet is gebleke det veur ózze liedjesaovend en blageliedjesmiddig neet op ein verantwoorde en veilige manier aan uch kènne aanbeje. En nao ’t aafwaege van allerlei opties höbbe veur oeteindelik toch mótte besjloete óm de liedjesaovend en blageliedjesmiddig dit jaor neet door te laote gaon. Volges de op dit moment geldende regels is ’t neet versjtenjig óm mèt vuuel miense biejein te kómme en eine liedjesaovend of blageliedjesmiddig (zelfs in digitale vorm) nuuedig oet óm det waal te doon. De vereiniging kèn en wilt gènne katalysator zien in ’t samebringe van miense as det volges de regelgaeving aafgeraoje waert. Wat dit beteikent veur anger activiteite is op dit moment nog neet besjlaote. Veur haope det veur volgend jaor de draod weer op kènne pakke mèt eine sjoeëne liedjesaovend en blageliedjesmiddig, zoewie veur det de aafgeloupe jaore gewend zien en veur haope uch dao den ouch allemaol te zeen, en ’t leefste uiteraard mèt eine nieje sjlaeger zodet ózze liedjescultuur, wao veur oppe Ruiver gruuets op zien, blief bleuje. Besjtuur, liedjeskemissie en blageliedjeskemissie van v.v. De Windjbuujels

Mèt de zomervakantie in ’t veuroetzich sjloete veur Windjbuujels normaliter ein periode van evaluere en veuroetkieke aaf, óm vervolges nao de vakantie in september weer volop aan de sjlaag te gaon mèt alle veurbereidinge op ’t nieje vastelaovesseizoen. Maar dit jaor is alles angers gegaon, ’t coronavirus goeijde roet in aete. D’r waas weinig toet gèn ruumte óm te evaluere, laot sjtaon ruumte óm ouch maar enigszins nao te dinke euver wie / en wao veur ’t ‘t volgend jaor wellich baeter of angers kóste gaon doon. De spaarzame momente die ’t besjtuur (online) kós vergadere waerde veurnamelijk besjteed aan de vraog of veur volgend jaor waal ‘ne vastelaovend höbbe, en zoe jao: aan welke regels zien veur den gehaaje, en geld dae lestige 1,5m regel nog sjteeds en welke risico’s loupe veur hie den bie? Ouch mèt De Drake oet Beesel höbbe veur besjtuurlik gesjpraoke euver dees vraogsjtökke. Same mèt häör höbbe veur aafgesjpraoke det veur mekaar oppe huuegte haaje en det veur örges in ’t najaor gezamelik elkaars besjloete mèt / op elkaar aafsjtumme. Wat doon veur beveurbeeld mèt ’t liedjeswiekend? Of wie zit det mèt paaf alaaf? Kump d’r ‘ne nieje Windjbuujel(jeug)prins of kómme d’r nieje Boeregezelsjappe, en wat doon veur mèt de zittinge, de prinsebal, de optochte etc. etc. Op al dees vraoge kènne veur neet zoemaar ’n antjwaord gaeve. Daegene dae ’t waal wet moog ’t zègke! Maar ein dink is zeker ’t coronavirus geit van invloed zien op al ós aktiviteite en óngetwiefeld ouch op ózze vastelaovend. Besjtuurlik waare veur ’t d’r echter vriej sjnel euver ens det veur neet noe al ós conclusies wólle trekke, en det veur ós neet noe al bie de pakke ginge neerlègke. Hetgeen op houfliene beteikend det veur d’r veur höbbe gekaoze óm zoe lang meugelik te wachte mèt ’t besjloet óm ’n bepaolde aktiviteit of erger nog alle vastelaoves aktiviteite veur aankómmende seizoen op veurhandj al te cancelle. Wachte kèn, maar veur zólle raekening mótte haaje mèt de versjillende veurbereidingstieje veur bepaolde aktiviteite. Wat beteikend dit sjtandjpunt den? De iersvolgende aktiviteit nao de zomer is ’t liedjeswiekend op 23 en 24 oktoeëber. ’n Belangrieke aktiviteit veur vastelaovend vierend Ruiver en Óffebek. Veur wille alles op alles zètte óm dit weekend door te kènne laote gaon. Verderop kómme veur hie oetgebreider op truuk. In ’t ierste weekend nao de 11e van de 11e in dit geval op vriedig 13 november trappe veur ’t vastelaovend seizoen aaf mèt Paaf Alaaf. Veur gaon d’r noe nog sjteeds van oet det veur dae aaftrap nog sjteeds kènne doon, allein in welke ómvang is nag mèr de vraog. Geur huuerd uuterlik begin november van ós wie dae aovend d’r oet kump te zeen. In ’t lètste weekend van november, op zóndigmiddig de 29e, sjteit ’t Diner Des Buutes geplend. De kemissie dink momenteel nag nao euver de meugelikheden in deze. Kèn ’t gewuuen doorgaon, of wellicht in ’n kleinere of angere setting, of is doorsjuuve nao ’t veurjaor van 2021 ’t versjtenjigste? Medio oktober numme veur in deze ’n besjloet. En den ein van de belangriekste vraoge wao veur de kómmende tied ’n antwaord op mótte zeuke, mesjien waal ’n allesbepaolend antjwaord wat van invloed is op ’t doorgaon van al ós angere aktiviteite in aanloup nao en mèt de vastelaovend. Dit hingk d’r van aaf of de veursjpellinge / versoepelinge ’t op ‘n verantwaorde manier viere van vastelaovend meugelik make, en daonaeve of dees voldoende sjtabiel en acceptabel zien zoedet de prinsekemissies- en de vraogkemissie van de BoereBroelof op paad kèn gaon veur respectievelijk de nieje Windjbuujeltrios en de Boeregezelsjappe. De 1,5m regel sjpeelt in deze ‘n belangrieke rol, ’t sjpontaan kènne viere van vastelaovend mèt acceptabele beperkinge is veur De Windjbuujels ‘n vereiste óm alle hoegheden ‘ne volwaardige vastelaovend te kènne beeje. In euverlegk mèt de betrokke prinse- en vraogkemissies verwachte veur hie uuterlik eind oktoeëber een besjloet in te kènne numme. Binne ’tgene wat meugelik is wille veur d’r besjtuurlik veur gaon en same met de kemissies bekieke veur wat d’r maximaal meugelik is, en wat eventueel de alternatieve kènne zien. Ós vastelaoveshert geuf zich neet zomaar gewónne! Liedjeswiekend In ’t wiekend van 23 en 24 oktoeëber sjteit ’t liedjesweekend geplend, met op zaoterdigaovend de liedjesaovend en op zondigmiddig de blageliedjesmiddig. De Windjbuujels höbbe altied flink geïnvesteerd in ózze vastelaovesliedjeskultuur, zónger liedjes gènne vastelaovend. Zoe ouch dit jaor hadde veur ós bedach, en dus haet ’t besjtuur de liedjeskemissies gevraog óm ‘s nao te dinke euver ’t antjwaord op de vraog: Wie kèn ózze ‘liedjesaovend en blaageliedjesmiddig’ d’r dit jaor oet zeen? De liedjescommissie en de blageliedjescommissie zien dees oetdaging aangegeaon en zie höbbe same naogedach euver ein 2-tal scenario’s. Enerzijds ’n traditionele live oetveuring in De Sjakel aafgesjtumd op de den geldende regelgeving. Anderzijds as alternatief ein online oetveuring. Veur beide variante is ’t animo gepols bie deilnimmers en bie téks-en mezieksjrievers en zien alle veurs en taeges op ein rie gezatte. Op basis van ’t getuuende animo höbbe de kemissies same mèt ’t besjtuur besjlaote det de online variant de basis vormt veur ’t opsjtarte van de veurbereidinge, en mits det de aangekondigde versoepelingen van september ós voldoende ruumte gaeve veur alsnog kènne besjloete óm veur ’n live versie in de Sjakel te keeze. Een definitief besjloet in deze numme veur op 2 september aansjtaonde. Insjrieve veur deilname kèn nag wies 9 september. Wie ierder al gezag veur wille óndanks alle beperkinge dinke in meugelikhede en ós maximaal inzètte óm toch ‘ne liedjesaovend te kènne organisere. Veur kènne dit echter neet allein en doon, hie-bie den ouch ’n oproop aan alle (potentiële) sjrievers en artieste óm mèt te doon! Veur Windjbuujels laote ós neet kiste, en as ’t aan ós ligk geit ‘t door, wie den ouch! Wie zuut de online variant d’r den oet? Op zaoterdig 24 oktoeëber waere sjmiddigs alle sjlaegers van zoewel de groeëte- as van de blaage-artieste opgenaome mèt beeld en geluid. Lokasie nag nader te bepaole. De artieste kriege tiedig eine muziekbandj van häör liedje aangereik, zoedet ze al good kènne repeteere. De

Wegens de maatregelen rondom de Corona-crisis gaat de ‘twiede buffet meizingaovend’, 28 maart a.s., niet door.

Leef Windjbuujelinnekes en Windjbuujels, Wat höbbe veur ‘ne waanzinnige tied mooge met maake es trio 2020 ziende. Wat höbbe veur genaote van én met uch. Of ’t noe ’n serenaadje waas, ’n hendje, ’n kaertje, ’n sjoone wage of act inne optoch of ein van de vuule foto’s die gemaakt waerde, nieks waas te gek. Veur kieke truuk op twie en ’n halve waek fieës; vanaaf ’t prinsebal op 8 fibberwarie toet aswoensdig (nja, asdonderdig huul vruug eindigde ’t mierendeil van os trio pas). Doe kens dich dr vanalles biej veursjtelle mer esse den zelf dao sjteis wetse neejt wat dich euverkump. Alle clichés kloppe euveriges ouch, met name det ’t veurbiej vluug. “t liek waal iergistere det ’t prinsebal nag waas. Ongertusse is “ozze” vastelaovend alweer veurbiej en sjtinge veur same met alle angere hoeëghede te bäöke op ’t balkon. Jeugprinses Lissy met uch adjudante Sien & Janne en de res van Windjbuujels jeug, Jeugprins Sem met uch adjudante Finn & Sven en de res van Jong Nederland Offebek, Boerebroelof Ruud & Linda met uch getuuge Roy & Dana, Erwin & Kim en de res van ’t boeregezelsjap, Minimoos Pepijn & Guusje met uch getuuge Cas & Bibi en toet sjlot Bacchus Nick en de res vanne Bacchusklöp ontzettend bedank veur de keisjieke tied dae we met uch mochte belaeve. En netuurlijk gaon veur dit en volgend jaor gewuun nag efkes verder met fieëste!   Onger os motto: Gans van Sjlaag! Prins Sjoerd II Adjudante Tom & Joppe Os dames Danique, Karin & Ymke

Op vastelaovesmaondig trók de groeëte optoch door ‘t Windjbuujelriek. Alle deilnimmers haje häör bèste bein veurgesjaote en det zorgde veur ‘ne sjieke optoch: bedank d’r veur. De waergode ware ós glökkig redelik good gezind: weinig windjsjtoeëte en op ‘n bietje moezel in te begin waar ‘t druueg. De groeëte winnaar waerde nummer 25: Hie zit meziek in… deze groeëte groep ging d’r mèt de Windjbuujelcup vandoor.

Neet op vastelaovendmaondig, mér op dinsdig trok de kinjeroptoch door ôs Windjbuujelriek. Vanwaege ut gevierlijke waer haaij de organisatie besjlaote om de optoch te verplaatse en det bleek un goeij besjlissing te zien. Lekker zunke, lekker windje, lekker waerke. Mit veurop ôzze knoevele-Jan en ôs Aad Wief Daniëlle waas ut unne geweldige optoch, vol sjoeën gesjminkte sjnuutjes. De kinjer haaije same mit hölp van de volwassene weer sjoeën creaties in-ein gezatte en leepe vol trots en sjpontaniteit door d’n optoch. En idderein veel in de priese. Dank aan alle deilnimmers, muziekkorpse, verkiersregelaers, jury-lede, balondragers, sjnoep oetdeilers en angere vrijwilligers. Dankzij uch is d’r weer unne geweldig sjoeëne kinjeroptoch door ut Windjbuujelriek getrokke.

Hiej is der den, de opsjtelling van de grote optoch van VV de Windjbuujels! Geur komt toch auch kieke Maondig? de ierst vertrèkke óm 11 minute euver half 2 in Óffebek. Toet maondig!   Opsjtelling Groeëte optoch  

Bèste Windjbuujelinnekes en Windjbuujels ’t Is weer bienao vastelaovend en op de zóndig 23 fibberwarie en de maondig 24 fibberwarie trèk d’r den ’n kinjeroptoch en ‘ne groeëte optoch door ‘t Windjbuujelriek. Vanaaf 13.30 oer trèk de kinjeroptoch vanoet de opsjtelplaats (Offenbekermarkt) via de Keulsewaeg nao de Riekswaeg, hie linksaaf toet veurbie de mert, wao de deilnimmers linksaaf de Sjtationssjtraot indreije. Via de sjpaorwaegeuvergang gaon ze nao ’t eindpuntj De Sjakel. Hie zal de priesoetreiking gehaje waere.  ‘t Opsjtelle veur de groeëte optoch vinjt plaats oppe Keulsewaeg vanaaf de Beukelsjtraot toet de Beatrixsjtraot, waobie de nummer 1 bie de kruutsing Keulsewaeg – Beukelsjtraot – Theresiasjtraot sjteit en ’t hoeëgste nummer richting de Beatrixsjtraot. De route löp via de Keulsewaeg en Riekswaeg nao de Ruiverse mert, wao aansjloetend de priesoetreiking gehaje waert. De ierste deilnimmers vertrèkke óm 11 minute euver half 2 in Óffebek. Veur verzeuke alle aanwoeënenden óm uche uche auto zoe min meugelik aan de waeg te zètte tiedes de optochte en kort daoveur.’t Zól ouch sjiek zien as geur uch wuuëning en eventueel de veurtuin versiert óm ’t gehiel ’n sjtök sfeervoller te make. Veur verzeuk aan uch óm det zoe sjiek meugelik (bv. Mèt windjbuujels, vlagge, vaandels en sjlingers) te doon. Höb geur nag versiermateriaal nuuëdig kènt geur terech bie de Windjbuujelwinkel (bie de Bruna). Alvas bedank veur uch mètwerking. Vastelaovesgroete, Optochkemissie v.v. De Windjbuujels

Hiej is der den, de opsjtelling van de Kinjeroptoch van VV de Windjbuujels! Geur komt toch auch kieke zondig? Vertrek 13:30 vanaaf de mért in Offebek. Ut waert kei gezellig, toet zondig!     !opsjtelling 2020