Leef luuj, ‘t Is allemaol nag neet te bevatte wat d’r allemaol gebeurt mèt ós drie. De reaksies van de miense zien hertverwermend. De fieëste die veur gehad höbbe, ware mieër den gesjlaag. En veur höbbe nag get veur de boeg. De puppy power dae veur gekraege höbbe is nag lang neet op. Iddere daag laje veur ós batterieje gewuuën weer op. Veur wille alle miense nag ‘nne kieër bedanke en neet te vergaete ózze raod. Wat kènt geur ein fieës make. Super, wie det geur alles regelt. ‘t Is ein ieër óm mèt uch dit te moge meimake. Vanmiddig gaon veur nao PSW toe. Hiej höbbe veur weer vuuël zin in. En den is ‘t bienao vastelaovend, maar maar maar. Toet noe toe kènne veur allein maar zègke … “OPERASIE GESJLAAG”

Iddere daag mótte veur weer efkes geknepe waere. Zoeëvuuël reaksies det haje veur noeëts dörve druime. Dank hieveur miense. De ieërste fieëskes in ós prinselik paradies zitte d’r al op. ‘t Waas super gezellig. Ouch haet de sjtraot ein geweldige biejdrage geleverd. Ich bön erg gruuëts det veur hiej woeëne. Veur höbbe nag get sjoeëne daag in het versjeet. Dao gaon veur noe mèt alle plezeer nao oetkieke. Veur wille toet noe toe alvas idderein bedanke veur de reaksies en helpende hendjes. En den nag ’t magazine wat veur woensdig aangebaoje höbbe gekrege. In ein waord geweldig! Redaksie hartsjtikke bedank. Dees operasie is noe al gesjlaag………alaaf Groete van ’t Trio 2013.

Zoeë veur kènne ós noe eindelijk rech in de ouge aankieke. Wat ein gebeurtenis. Veur zien nag sjtieëds aan het biejkómme van eine geweldige zaal. Wat ein fieës kènt geur d’r van make. En die band, miense kinjer wat waas det super. Miene linker en rechter höbbe mich geregeld effe mótte kniepe. Ich dach det ich druimde. Maar d’r is waal eine druim oetgekómme. Noe kènne veur wieër mèt het make van plezeer. En det gaon veur netuurlijk allemaol same doon. Maar nao aafgeloupe zaoterdig höbbe veur dao alle vertroewe in. Wieër zien veur nag bezig óm nag ’t ein en anger veur te bereije. En wille veur idderein alvas bedanke dae get van zich haet laote hure en det zien d’r hieël vuuël. Geweldig miense. Ich gaon nag effe get doping haole veur die daag. Veur sjrieve belle en zeen ós sjnel weer. Veur zègke noe al “operasie gesjlaag”!

Leef Windjbuujelinnekes en Windjbuujels, De pakke hange klaor! De bloeze zien gewasse en gesjtreke! De sjoon zien gepoets! De möts kèn neet wachte óm opgezatte te waere! Noe begint ‘t ech op de sjete! De zenuwe beginne ós noe langzaam parte te sjpele, maar veur höbbe d’r óntzettend vuuël zin in en veur haope geur ouch! Ouch veur wille Gerard Ligthart van herte felisitere mèt de titel Windjse Windjbuujelhajer, eine titel óm gruuëts op te zien: diek verdeend. Mèt de vraog, wie lang ich d’r euver doon óm neuchter vanoet de Paerssjtal nao hoes te loupe, kèn ich kort zien. Det höb ich nag noeëts neuchter gedaon! Ouch dinke veur det ‘t El V Kaatje ‘t tentame neet geit haole, geur mót nag eine kieër aantraeje op her-eksame waarsjienlik, alvas suukses daomei. Noe dees paar daag nag door zeen te kómme mèt miene linker en rechter! Veur zien d’r klaor veur.   Veur zeen ós sjnel, Fons, Potsy en Ritchie Trio 2013

Leef Windjbuujelinnekes en Windjbuujels, D’r is veur ós alweer ‘nne nieje zaoterdig aangebraoke, de ein-nao-lètste veurdet ‘t geit beginne! Gisteraovend zien d’r alweer twieë nieje vastelaoveshoeëgheje bekènd gewaore en dit wille veur natuurlik neet ónopgemerk veurbiej laote gaon. Gaer wille veur as ieërste ózze nieje Bacchus Rob 1 van herte profisiat winse mèt ziene titel. Ich weit zeker det veur d’r tenminste eine same gaon drinke mèt die daag. En as det nag neet genóg is höbbe veur gisteraovend ouch nag ein niej aad wief gekrege. Andrea ouch dich names ’t nieje trio van herte profisiat. Miene linker en rechter kènne neet wachte óm dich te felisitere. En ich zal dao ouch neet rouwig óm zien. Veur make d’r same ein sjoeën fieës van. Gelökkig is noe bienao idderein van ‘t gezjwieg aaf. Toch höbbe veur besjlaote nag ein waek door te gaon en vollop te geniete van ‘t ‘sjpelke’, mesjien kómme veur ós nag waal ein paar kieër taege!!!!   Toet sjnel leef luuj, Gegroet,   Fons, Potsy en Ritchie Trio 2013

Bèste Windjbuujels en Windjbuujelinnekes, Wat höbbe veur ein sjoeën weekend gehad, zègk det waal! Maar veurdet veur aan det weekend kóste beginne … … is d’r vuuël water door de Maas gesjtruimp. Veur haje ós namelik veurgenaome óm same te gaon. Maar woe móste veur in godsnaam naotoe? ‘t Jeugprinsebal of nao de groeëte of kleine miensezitting of toch maar euveral haer … … wat een keus! Oeteindelik ware veur ’t èns … … en wat waar det ein goeie keus, want miense wat höbbe veur weer gelache, genaote en gedans … … want jao Pascal: “Danse, ouch det kènne veur”! As dit de veurteikens zien, den mót ‘t waal eine gesjlaagde vastelaovend waere. Intösse zitte veur op heite kaole, nag zó’n 9 daag te gaon veurdet ‘t veur ós geit beginne. Veur wille uch waal verraoje det de zenuwe biej ós door ‘t lief giere. Daoróm gaon veur nag maar èns mèt de menkes van de PeeKaa óm de taofel zitte óm e.e.a. good door te sjpraeke. Die lètste daag moog natuurlik nieks mieër misgaon, dus mesjien kriege veur waal ‘t zèlfde advies as Eric vurrig jaor … … “trek uch een paar daag truuk in ‘t kloeëster, den kènt geur ouch good oetröste”! Laote veur det neet haope want veur haje neet van rös(te)! Vandaag wille veur ‘t hiej weer biej laote, maar neet veurdet veur de Nieje mèt die pruuk en ‘t nieje Aad Wief hieël vuuël suuk6 en veural vuuël plezeer winse aankómmende vriedig. Toet later, en alweer een klein bietje korter biej eine prinselikke groet, Fons, Potsy en Ritchie Trio 2013

Dao zitte veur weer veur de zoeväölste kieër mèt ós drieje biejein …… maar begriep ós neet verkieërd “mèt al det geregel höbbe veur waal de grótste lol”. Wat is ‘t sjoeën óm te laeze det versjillende persoeëne al meine op ‘t goeie sjpaor te zitte, maar let good op det geur neet óntsjpaort want det geuf vertraoging en ‘nne houp werk! Gangk veural zoeë door en laot uch verasse! Intösse is d’r alweer ein waek veurbiej; veur ós nag twieë waeke zjwiege. Gisteraovend is ‘t veur Mike Smets, de nieje van Windjbuujels’ Jeug al begós. Biej deze felisitere veur Mike en zien adjudante Ruben en Shawn van herte. Wat zalt geur in sjpanning höbbe gezaete … Hieël väöl suukses winse veur uch mèt die daag wannieër veur same die ker gaon trekke! En daonaeve winse veur idderein väöl suukses (en plezeer) biej de zittinge veur de groeëte en kleine miense dit weekend. Veur zeen ós zeker dit weekend. Nag net gèn prinselikke groete van, Fons, Potsy en Ritchie

Veur haope det geur net as ós ‘nne goeje en sjoeëne roetsj höb gehad. Veur ós waas dae hieël sjpesjiaal. En jao natuurlik ware veur biejein. Veur dinke det veur as einige gènne raege höbbe gehad……. Ós zjwiegzaamheid is toch weer aardig op de proof gesjtèld. Maar volges ós zien veur d’r weer good doorhaer gekómme. Beste luuj, ‘t leefste zólle veur uch alles wille vertèlle, maar de prinsekemissie verangert al ós tekste. Veur waere d’r hartsjtikke krank van. Maar toch wage veur nag ein poging. Veur mótte ós sjterk vergaete maar Treeske, doe mós toch ‘n sjpaor höbbe opgevange? Zoe neet, den haet ’t te väöl tablette gehad!!!!! Koos, veur ware ech mèt èllef man, maar det wilt neet zègke det veur gèn bieësjes haje die oet voorbekskes ote…… Koos doe vreugs of de linker en de rechter mich de haor van de kop kènne kieke. Ich höb die vraog aan häör veurgelag en zie zagte; “Wèlke haor bedoelt dae?” Maar nae, veur kènne ós rech in de ouge kieke. Bèste Pascal: Ten ieërste is ‘t jaomer des se ós neet kèns vertaegewaordige op ‘t LVK. Dit is ein gemis veur de Ruiver. Veur (oudjes) vinje ‘t sjoeën det d’r sjtieëds mieër jeug opsjteit óm d’r get van make. Daonaeve wil ich dich nag antjwaord gaeve op dien vraog. ‘t Is lang geleje det ich gewerk höb maar det höb ich good geregeld….. Neet allein veur höbbe ein sjpraekverbod, maar ouch ós/ózze jeugprins(es) en dae mèt die pruuk loupe mèt ‘tzelfde verbod róndj. Euver ‘n paar daag geit ‘t fieës losbarste. Óm te beginne mèt ’t jeugprinsebal, zittinge en daonao kèn Bacchus aan de sjlaag. Veur zalle probere óm d’r zoeëväöl meugelik biej te zien, maar veur mótte ech oplette veur Treeske. Maar det zalt geur waal begriepe, want zoeëas veur al ieërder höbbe gesjreve; “Dae fiks haet get in de gate. Det kèn neet angers……” Toet Sjnel!!! Groete, Trio 2013

Leef luuj, Noe det de buukskes weer róndj zien gegaete kènt geur en veur d’r weer taege aan. De prins haet same mèt de linker en de rechter gezamelik de körsdaag mèt ein doorgebrach. Veur ware waalgetèld mèt èllef man. Good gegaete, good gekald en weer van alles geregeld. Noe mótte veur allein zorge det veur al die kallorieje weer kwiet waere. Maar good det veur sjportief zien ingesjtèld. Ouch de dames zien d’r volop mei bezig. De pekskes en heudjes waere gemaak, zoeëdet zie d’r mèt die daag ouch gelek op sjtaon. Veur wille Prins Eric I bedanke veur de hölp dae d`r ós gegaeve haet. Veur sjpraeke binnekort aaf biej dae viever…… En den dae óngedöldige veurzitter. Effe veur de dudelikheid: ich höb gèn “nae” gezag … det zól ich neet euver mien hert verkriege. Euver Michel en Treeske, ja det is ein verhaol apart. Mèt uch twieë mótte veur veurzichtig zien. Geur höb ‘t de aafgeloupe jaore te dök good gehad, maar det geit uch dit jaor neet lökke…… En as Treeske nag ein sjpaor wilt opvange van mich, den ruuk d’r maar aan dae manjtel van Prins Eric I. En eks-prins Coen de twieëde, bedank veur dien bemoedigende wäörd. Veur wille dich waal zègke det veur al eine goeje kapper in de buurt van de zelfkantj gevónje höbbe, dae ós det presies kèn aanmaete. Maar d’r is weer ein waek veurbiej, dus alweer dónder biej ‘t Prinsebal. D’r zien nag allerlei vraoge die veur veur dae tied neet beantjwaord kriege. Veur laote ‘t maar gewuuën op ós aafkómme, den kump ‘t vanzelf waal good. Veur winse uch allemaol eine goeje roetsj en kiek oet mèt knalle… Laot det maar aan ós euver. Toet Sjnel, Fons, Richy en Potsy

Leef miense, In alle drökte ware veur bienao get vergaete. Oppe valreep wille veur uch oeteraard fijne körsdaag, alle gezóndjheid en ‘nne sjoeëne vastelaovesroetsj ’t nieje jaor in toewinse. De Fons, Potsy en Richie.