Op 21 september is tiedes ’t Windjbuujelcupsjete bie de Sjötterie in Óffebek de Mark Hendriks Trofee gewónne door de Keuning van de Sjötterie en ging ein team van de Windjbuujels d’r vandoor mèt de Windjbuujelcup.
Leef Windjbuujels en Windjbuujelinnekes
3 september jóngsleje is d’r weer eine prins gebaore op de Lieëwerveltwaeg. Eine echte Ruiverse, fijn biej pap en mam op de sjlaopkamer gebaore. Moder Kim maak ’t good en vader en breurke Koen vinje ’t ouch geweldig. Oeteindelik kóste veur zègke det ouch dees operasie gesjlaag waas. “Wat ein jaor”, zagte veur al taege-n-ein. Veur wille alvas idderein bedanke veur de blome, kaarte, tillefoontjes, epjes en tweets. Geweldig. Veur zeen ós weer mèt ’t Windjbuujelcupsjete………………………. Groet, Prins Sjoerd d’n ieërste
’t Hingk in de lóch!
Aafgeloupe zaoterdig is ’t nieje thema veur volgend sezoen bekent gemaak. En det beteikent dat geur noë al met nieje ideeje op de proppe kènt komme. Dus dao alvas vuuël sukses mei. De aafgeloupe tied höbbe veur neet sjtil gezaete. Zoë höbbe veur al eine geweldige fietstoch gehad en netuurlik aafgeloupe zaoterdig ’t Wiesenfest. En jewaal de agenda sjteit gewuuën alweer vol geplant veur de kommende tied. Det vinge veur natuurlik neet erg. Want angers komme veur nurges! In de tusse tied höbbe veur ouch de kans gehad om get foto”s en films te bekieke. En nao zes kieër kieke nog sjteeds kieppevel. Wat ein fieës waas det en zulle d’r nag vuuël volge. Veur wille waal zegge det ’t nieje thema nog hiel ver weg is. Dus veur ós hingk ’t in de lóch det muziek sjiek is!! Idderein alvas ein sjoeëne vakantie. Groete van Prins Sjoerd en miene linker Sjtan en Rechter Andy
Thema 2014 – ’t Hingk in de lóch!
Gister is tiedes ’t Wiesefest ’t vereinigingsthema veur 2014 bekènd gemaak. Ein filmke vertèlde ós det ’t thema veur 2014 “’t Hingk in de lóch!” is. Mèt dit gegaeve kènne veur röstig de verkansie in en ós gedachte en ideje euver liedjes, wages en anger oetinge ómtrent ’t thema häöre gangk laote gaon.
Veur winse José Nagel-Feron hieël vuuël suukses mèt Alpe d’HuZes
Op vastelaovesdinsdigmorge tiedes de Boerebrunch vertèlde José häör verhaol veur de deilname aan de alpe d’HuZes. ’t Waas moessjtil in de zaal. Nao aafloup klónk d’r ein luid applaus. Vanoet dees plaats wille veur José en häör team hieël vuuël suukses winse mèt dees groeëte oetdaging.
De rös is wedergekieërd!
Daag miense, Eindelik höbbe veur weer effe tied veur uch. De vastelaovend is veurbiej maar ózze titel drage veur gelökkig nag ’t ganse jaor. Wat waas ’t sjiek. D’r zien nag genog aovende det veur dinke van…. ‘Wat waas det sjoën’. De foto’s en films zien bienao in ein gezat … Den besefs se pas det veur genog geweldige momenten samen mei höbbe gemaak. Ouch nao de vastelaovend höbbe veur waer de nuuëdige evaluasies en aetentjes gehad, en ’t geit veurluipig nag effe door. Det vinje veur natuurlik gen sjtraof al is het aaf en toe waal passe en maete om ’t gedreijd te kriege. Zoeës geur weijt sjteit juni bienao veur de deur … en det beteikent vuuël aktiviteiten veur ós. Wat geur neet mog vergaete is det ’t Wiesenfest d’r aan kump … en veur as trio zoude ’t leuk vinje as geur dao in groeëte getale haer komp. Dus besjtel sjnel ein kaertje en den zeen veur os dao, zoeëdet veur dao ouch ein gesjlaagde operasie neer kenne zette. Groet, Hoegheid Sjoerd I en met miene linker Stan en rechter Andy.
Op 9 fibberwarie 2014 is de KVL finale oppe Ruiver!
Veur zien blie uch te kenne vermelde det volgend jaor de finale van ’t Kinger Vastelaovend Leedjesfestival (KVL) nao de Ruiver kump. Aafgeloupe jaor hadde veur in november al ein halve finale van ’t KVL. Op 9 fibberwarie 2014 is ’t den zoeëwiet. Den is de KVL finale in de Sjakel oppe Ruiver. Mieër informasie volg taege dae tied oppe site. Wilt geur mieër weite euver ’t KVL den kiek ens op http://www.kvl-limburg.nl/ Veur höbbe noe al zin d’rin.
Resepsie Windjse Windjbuujelhajer Gerard Ligthart 14 april 2013
Windjbuujelinnekes en Windjbuujels, Op zóndig 14 april 2013 krieg de kersverse Windjse Windjbuujelhajer Gerard Ligthart ein resepsie aangebaoje in ós rizzedensie, cafe/zaal Ronckenstein. Vanaaf 16:15 oer ziet geur van herte welkom óm Gerard te kómme felisitere. Nao aafloup van de resepsie zal d’r in de cafe nag ein after-party plaatsvinje mèt ein optraeje van Thei en Joop. Geur kómp toch ouch?! Besjtuur VV De Windjbuujels.
In memoriam Lei Vaessen
Vandaag bereikde ós ’t berich det ózze Hof-Kelner Lei Vaessen is euverleje. Jaorelank haet hae in de Sjakel as ‘nne rasechte gashieër gefungeerd veur ózze Raod van 11. Waallich höb geur ‘m dök veurbiej zeen sjuve achter de artieste oppe buun. Altied ein vol blaad beer bie zich. Nieks waar ‘m te vuuël en wat haaj d’r gaer te make mèt die jónge van ós. Lei waar erg krank, det waar dudelik….maar zoeë sjnel?? Hae haet vriewaal alle aktiviteite tiedes de aafgeloupe vastelaovend bezóch; hae haet zelfs ózze Hoeëgheid Sjoerd I, de Prinses en zien adjudante mèt de maedjes nag gefillisiteerd. ‘nne Dappere miens, dae veur gaon misse. v.v. de Windjbuujels
Bedank bedank en nag ‘ns bedank.
Leef luuj, ’t Zit d’rop veur wat de vastelaovend betröf. Wat ein paar daag ware det. Veur höbbe van uch genaote. Wat ein fieës! Veur as trio wille uch bedanke veur dees geweldige ervaring. D’r zien gewuuën gèn wäörd veur….Veur haope det geur ’t net zoeë sjoeën höb gehad as veur det gehad höbbe. Veur as trio zagte taegenein gisteraovend…….. “OPERASIE GESJLAAG” Prins Sjoerd I en zien adjudante Stan en Andy