Windjbuujelinnekes en Windjbuujels, met Paaf Alaaf haet Vors Hans Boonen ’t thema veur ’t kómmende Prinsebal bekend gemaak: Vluch PK2014. Waem waerd ’t trio 2014 en waem moog de scepter zjweije euver ’t Windjbuujelriek? Diegene die met de vleger nao de sjnieje zien vertrokke, zalle néét metmake wie de nieje Hoeëgheid oppe Ruiver oet de lóch kump valle. Of haet de Prinsekemissie ’n anger verrassing veur uch in petto? ’t Zal in idder geval weer ‘ne keigezellige aovend waere met meziek van de fieësbend PATS! Wilt g’r d’r bie zien? Rizzerveer ug dèn de datum: zaoterdig 15 fibberwarie 2014, vanaaf 20.30 oer in De Sjakel.
Oetnuuëdiging algemeine lejevergadering 29 november 2013
Leef leje van vastelaovesvereininging De Windjbuujels, Op vrijdig 29 november 2013 om 20.00 oer sjteit de algemeine lejevergadering geplend. Dees zal plaatsvinje in de residensie café-zaal Ronckenstein. Veur nuuëdige alle leje oet om hiejbiej aanwezig te zien. Moch geur genne agenda of versjlaag van veurig jaor höbbe ontvange den verzeuk ich uch om eine e-mail mèt daoin uche naam, adres en e-mailadres te sjture aan: sikkretaris@windjbuujels.nl Of te belle mèt 077-4745416 as geur gènne e-mail höb. Geur krig den de agenda en ’t versjlaag digitaal gemaild of per pos bezorg. Vastelaovesgroete, Besjtuur VV De Windjbuujels.
Van uche Hoeëgheid en adjudante
Windjbuujels en windjbuujellinnekes, Wat ’n versjrikkelikke daag höbbe veur achter de rök. ’t Ganse dörp is d’rvan gesjrokke. Ruiver sjteit groeët op alle niejs sites. En den neet veur iets positiefs. Helaas laeve veur in ‘nne wereld wao dit veurkump, det haje veur noeijts gedach. ’t Trio wilt idderein sjterkte winse. Morge zal d’r ‘nne stille toch waere gehaje. Dit is ’n sjoeën gebaar van de burgers. Idderein verwerkt dit op zien eige manier en zoeë huuërt ’t ouch. Wat hertverwermend is om te zeen, is det z’n dörp waal veur elkaar klaor sjteijt. Idderein laef op zien manier meij. Ich haop det veur dit noeijts mieër hove mei te make en det veur ’t allemaol ’n plekske kènne gaeve. Vastelaovend is ein fieës wao idderein bie-elkaar kump. Ouch kèn det ein fieës zien wao se sjteun aan elkaar kèns höbbe. Maar laot det maar idder veur zich bepale. Nogmaals sjterkte aan femilie en alle betrokkene in deese moeilijke tiëd. Hoeëgheid Sjoerd I en zien adjudante Stan en Andy
Ós gedachte zien bie de femilie, naobejstaonde en omwoeënende
As vereiniging laeve veur mèt mèt de femilie, naobesjtaonde en omwoeënende van ’t femiliedrama wat zich gister haed afgesjpeeld is ós gemeinsjap. Veur winse idderein dae hiebie betrokke is hieël vuuël sjterkte de komende tied om ’t verlees en dees versjrikkelikke gebeurtenis te verwerke en ein plaats te gaeve
Klasse ZuuverZat
Beste ZuuverZat, wat waas uch optraeje sjiek gister. Klasse werk. Veur zien trots op uch. En den ouch nag eine pries veur beste aanhang. Prefisiat!
Sjrief in ugge agenda: 28 fibberwarie 2014 – Vastelaovend am Weissen Stein
De naam zaet genóg euver de lokasie……maar op vriedigaovend 28 fibberwarie 2014 wille veur same mèt uch de offisjele äöpening van de vastelaovend viere. Op deze aovend, sjpesjaal bedoeld veur de get aajere jeug mèt ‘nne laeftied vanaaf 2×11 jaor, gaon veur truuk in de tied mèt vastelaovesliedjes van jaore ’80 en ’90. Meziek dae de vastelaovend in dae tied sjpesjaal maakde en gebrach door artieste oet dae tied. Ouch ós Ruiverse Joekskepelle zalle häör biejdrage levere. Noe dink geur natuurlik de Witte Stein…..wie kóm ich dao noe weer? De Windjbuujels höbbe bösse veur uch geregeld die tösse 19.30 en 21.30 oer op en neer pendele tösse Ruiver/Óffebek en de Witte Stein, en die uch later oppe aovend tösse 0.00 toet 2.00 oer in ’t dörp weer aafzitte. Gewuuën good geregeld dus………en det veur € 5,– incl. entree en twieë kónsumpsies! Wilt g’r dit neet misse? Zorg den det geur sjnel ug kaarte rizzerveert. Dit kén via de site www.windjbuujels.nl of door uch aan te melde door ‘nne mail te sjture nao vaws@windjbuujels.nl Gaef dudelik aan mét wievuuël persoeëne geur ziet en of geur gebroek wilt make van de bös. Haaj ouch raekening mèt de minimum laeftied. Zorg det geur d’r sjnel biej ziet, want vol = vol!
Wat ein weekend!
Beste miense, De ieërste generale is waer veurbiej. Wat waas het sjoeën dit weekend. Veur as trio höbbe waer genaote. De zaoterdigaovend biej Harrie waas ’t boemvol. En den de liedjes, met eine geweldige winnaar. De Harie’s proficiat met ugge titel. Dit waas veur ós ouch kiepevel vooral omdet ut liedje gesjraeve is door ózze Nol. De pries waerde aan ‘m opgedraage, en dae ken d’r met vuuël trots op sjoorsjtein der biej zitte. Ouch de nummer 2 van daese aovend waas ein gesjlaag liedje. Veur höbbe ós kapot gelache mèt die veterane van de REVOC. Wat haaije se ein plezeer mèt det liedje. En den de nummer driej. Ein prachtig liedje det zich ongersjeide van alle angere liedjes. Marina good gedaon meid. Dao zalle veur in de toekomst vas nog mieër van gaon huuëre. Ouch de Dorsvlaegels ware waer good op dreef, maar jonges aan die kondisie mot waal gewerk waere. Blaoze zalt geur mèt dit trio. Al met al waas het waer ein gesjlaagde operasie. En as se den nao de zondig geis kieke. Wat zoot det leuk in elkaar. Prima gedaon kemissie. De jeugd haed de toekomst zegge ze, nou det höbbe ze waal bewese. Idderein sjtong der geweldig op. En ze ware allemaol zoeë good det der waal 9 derde plaatse zien oetgerijk. Maar de winnaar waas bienao utzelfde as vurrig jaor, allein hadde zich der twieje dames biejgevoeg. De groep “Confettie” sjleipte dao de ieërste pries oet de kas met ut liedje “Ozze pap”. En nummer twieje waerde dao de” lala ladies” met veur wille d’roet. Idderein nogmaals proficiat. Veur höbbe nog mieër zin gekrege in wat nog komme geijt. Veur zeen os sjnel. Alaaf.
Confettie winnaer Blageliedjesmiddig 2013
De Paerssjtal sjting oppe kop aafgeloupe zóndig tiedes de 6e Blageliedjesmiddig. Ónger muzikale óngersjteuning van Jack Claessen zónge zès groepe en eine solis de sjterre vanne hemel in de sjtried óm de titel Blagesjlager 2013-2014. De deskundige zjurie, besjtaonde oet ós veurgengers vanne vastelaovend en muzikaal sjpesialis Koos Franssen, haaj ’t loeizjwaor en haet mótte besjloete óm idderein, boete de nummers ein en twieë, ’n derde plaats toe te kènne. ’t Niveau waas gewuuën te good dit jaor! Oppe twieëde plaats eindigde de Lala Ladies, die veur de ieërste kieër mei deje aan de Blageliedjesmiddg mèt häör nummer: Veur wille d’roet! Mèt ’n klein versjil in punte is ’t nummer Ózze pap van Confetti (Faye Neuray, Lauren Gastens, Rody Gommans en Joep Kusters), gesjreve door Gert-Jan Kusters en Jack Claessen, winnaer vanne Blageliedjesmiddig en kump oppe nieje CD van V.V. de Windjbuujels. Gangk nao ’t foto-album veur de sjoeën foto’s van deze middaag. De foto’s zien gemaak door Jac Vullers. ’t Wachtwaord is windj.
“Dao hange de sjlingers” is de nieje Windjbuujelsjlager
Liedjesaovend “de Windjbuujels” “Dao hange de sjlingers” is de nieje Vastelaovessjlager van “de Windjbuujels” veur ’t nieje seizoen. Oet 11 inzendinge waerde zaoterdigaovend 5 oktoeëber 2013 deze sjlager van de handj van Nol Wassen gekaoze as Windjbuujelsjlager 2014. ’t Is ‘nne mars woe-in hae besjrief wie en waoróm d’r mèt Vastelaovend juus det kefee binnegeit woe get te doon is, woe ’t vol is en woe volop gefieës wuuërt, en sjnachs op waeg nao hoes nag efkes aangeit biej de kastelein dae nag op um haet gewach. Hae besjrief det zoeë det iddere Vastelaovesvierder zichzelf dao-in truukkènt. Dit liedje is getiteld “Dao hange de sjlingers” en waerde gezónge door “de Harie’s”, ziende Har Geraeds en Jan Stinges. Oppe twieëde plaats eindigde de veterane van Revoc/VCB mèt ’t liedje , genaamp “Effe nieks” van Bas Geujen en Jac van Deuzen. Ouch in dit liedje haaj Nol Wassen ’n handj want hae teikende same mèt Jac en Bas veur de meziek. De veterane zónge det ze mèt “die daag” effe hieëlemaol nieks gaon doon. Ze wille Vastelaovend viere mèt allein maar flauweköl. De nummer drie, genaamd “Doeën biejein” waerde gemaak door Jack Claessen en oppe bühne gebrach door zien dochter Marina Claessen. ’t Is ’n leef loesterliedje woe-in Marina zingk van ’t gelök det ’t mètmaak mèt Vastelaovend same mèt… jao, mèt waem eigelik?… det verreujt ’t ós neet. Biej aanvang van de aovend waerde de Intochmars van de Windjbuujels veur ’t ieërs geprizzenteerd biej de opkóms van Prins Sjoerd I mèt zien gevolg. Deze mars zal ilke kieër as ’t gengig gedeilte örges zien opwachting maak gezónge en gesjpild waere. Ron Aspers teikende veur de teks en meziek. Intochmars MP3 en Tèks intochmars. De zjurie bepaolde ouch wae de zoeëgenaamde aanwiespries verdeende dit jaor. Det ware “De maedjes van noe”, ’n sjtèl entoezjaste jong vrouwluuj die veur de ieërste kieër meideje aan de liedjesaovend en de meneer bezónge woe-op ziej taegewäördig de Vastelaovend viere mèt häör digitale hölpmiddele. Ech aktueel. De teks en meziek zien van de handj van John Wassen. Naodet de zjuriepunte ware opgehaold sjting d’r nag as verrassing ’n intermezzo-act oppe bühne. As thema veur ’t kómmend seizoen höbbe de Windjbuujels ’t motto “’t Hingk in de lóch” oetgerope. Ger Geerlings haaj hiejop ingesjpild en ’n liedje gesjreve det (boete ’t konkoers) waerde gezónge door “de Vaeskes”. Op ludieke wies bezónge de zuskes Vaessen wat d’r in de lóch hingk. De aovend waerde geprizzenteerd oor Vors Hans Boonen en muzikaal opgeloesterd door joekskepel “de Dorsvlaegels”. De kómplete oetsjlaag van de aovend is: 1-Dao hange de sjlingers – De Haries’s – teks/muziek: Arnold Wassen 2-Effe nieks – Veteranen REVOC/VC B – teks: Jac van Deuzen / Bas Geujen – muziek: Arnold Wassen/Jac van Deuzen/Bas Geujen 3-Doeën biejein – Marina Claessen – teks/muziek: Jack Claessen 4-Neet allein – Sjeiv – teks/muziek : Koos Franssen 5-Allein mèt dich – Leiding Jong Nederland – teks/muziek: Bas Geujen 6-Vastelaovend digitaal – De maedjes van noe – teks/muziek: John Wassen 7-As fibberwarie oppe klender sjteit – De Vaeskes – teks/muziek: Ger Geerlings 8-Ein sjoeën gezich – Erwin en Ruud – teks/muziek: Jac Linssen 9-De sjónste tied – Pascal Gommans – teks: Ger Geerlings – muziek: Jack Claessen 10-Vastelaoveskindj – Corrie van de Kerkhof – teks: Ger Geerlings – muziek: Jack Claessen 11-De lètste tango – AJO (Aad Jeugprinse Óffebek) – teks/muziek: Huub Killaars De nummers 1,2 en 3 en de Intochmars waere same mèt de winnaer van de Blageliedjesmiddig, “Ózze pap” van de groep Confetti, opgenaome biej sjtudio Theelen in Munstergelaen en oetgebrach op ’n cd die op 18 jannewarie 2014 hoes aan hoes te koup wuuërt aangebaoje. Rizzervere is ouch meugelik via www.windjbuujels.nl.
In memoriam Toon Jacobs
Aafgeloupe daag bereikde ós ’t berich det aad-veurzitter Toon Jacobs is veróngelök. Toon waas vanaaf jannewarie 1987 toet en mèt mei 1993 veurzitter van ós vereiniging. Vanoet dees plaats wille veur de femielie vuuël sjterkte toewinse mèt ’t verwerke van dit groeëte plotselinge verlees. v.v. de Windjbuujels