Wat ’n droevig berich bereikte ós aafgeloupe waek. ‘ne Zieër illustere veurgenger is haergegaon. Huug, wat haje veur gaer d’r nag eine mèt uch gedronke nao ós oetkómme. Det ‘t uch dao baove good moog gaon en haopelik maak geur dao nag väöl kolder – Holderdebolder. Veur winse femilie en dierbare van Huug hieël väöl sjterkte toe de kómmende tied. ‘t Is Körsaovend. Hieël get speculasies euver de nieje aan de Körsstaofel waere wellich noe al geveurd! Dit daagbookdeil (uiteraard mèt get Körsmeziek oppe achtergróndj) höb ich den ouch mèt plezeer gesjreve en gaer aan uch gebrach. En ich mót waal zegge det ich bie ’t sjrieve hieël get Körsmeziek höb verbasterd toet zoe get as: Jingle Bells, Jingle Bells, toeter all the day Oh what fun it is this time, de Nieje is underway! Dao klop netuurlik nieks van, maar good det maak noe ff nieks oet. De tied dae veur mèt ós drieje noe meimake is erg speciaal. Nieks liek mieër gewuuën. As ich nao de winkel gaon, kiek ich bie binnekóms ieërs effe good róndj of dao toevallig bekende zien die meugelik vraoge kènne gaon sjtelle. ‘n Goei veurbereiding is ouch noe ‘t halve werk en wie sjneller ich de winkelroute höb volbrach, wie ierder mich weer get rös wach. En det geit prima veur alsnog. Bie mien eige femilie, maar ouch bie de femilies van mien adjudante motte we sjerper zien. Ich krieg haos ’t geveul det ze dao de Körsbaum mèt roeëd-gael-greune sjlingers versiere. Zeker wannier ich weer ens dao bön, is ’t ech verrekes moeilik óm de mondj te haje. Want wat zou ich gaer wille vertelle det ich de nieje waer! ‘t Puntje van mien tong hingk den aan ’n zieje dräödje. Dit sjpel sjpele is werkelik ech sjoeën! As ich ens same mèt ein of beide adjudante in gezelsjap van angere bön, make v’r éch waal wat dubbelzinnige opmerkinge en knipuigskes. Det is geweldig! Toet nu toe geit det ós good aaf en vlege de waeke óngertösse veurbie. Al liek 8 fibberwarie nag wieët weg ierlik gezag. Mèt de veurbereidinge ligge we op sjema. Ich kèn zegge det de pakke passe. Det waas euveriges éch ’n moment mèt ’n goud rendje! Veur höbbe behuuërlik gelache wie oet de paskamer ‘rechs’ naeve mich op ens ’n beknepe sjtumke vroog of zien pak estebleef ‘n mäötje grótter mog zien. Efkes later waas ’t de beurt aan ‘rechs’ óm te lache wie hae huuërde det hae de sjmaalste nek had van ós drieje. Wie veur elkaar vervolges zoge in ós nieje kostuums, waerde ‘t sjtil en vormde zich ’ne gruuëtse lach op ós gezich. Det neet allein veur bezig zien mèt de veurbereidinge merke we noe al erg good. Fantastisch óm det te zeen en te huuëre. Pekskes waere gekóch, diverse Prinse in Limburg zien al bekend en de ieërste veurronde van ’t LVK is alweer gewaes. Hieëre van Deh!: wat rot dat geur nao de halve finale mót! In idder geval hieël väöl sukses. Veur óngersjteune uch uiteraard wao we kènne. Veur noe wins ich uch, ouch mede names mien adjudante en aanhang, ‘ne biezónjer gezellige Körs en good oeteinde toe. Kiek in de veuraovend van ‘mien’ vastelaovessezoen good oet mèt vuurwerk. Die hendjes höb geur namelik nag nuuëdig. Zeker wannier de Toddezèk ‘wao zien die hendjes’ zinge op mien resepsie. Toet in 2020. De nieje

Zeutjes aan gaon de prinsevoetjes, trippel trappel trippel trap…. Leef Windjbuujelinnekes en Windjbuujels, Oppe verjäördaag van Sinterklaos moog ich mich veur de ieërste kier toet uch richte. Dèt wat mich euverkómme is… is mèt gen wäörd te besjrieve! Gevraog waere as nieje hoeëgheid van de Windjbuujels…. Ongeluifelijk! Wie dèt den ging? Nou: ’t Waas ‘ne gans normale aovend en miene tillefoon ging. Nieks vraemps aan. Ich ontving ‘n berichje. In det berichje loos ich vervolges de wäörd “11 veur 11”, “get vraoge” en “Windjbuujelriek”. ’t Berichje waerde aafgesjlaote mèt “bel ós” en “gr. van versjillende”. Ich belde zoeget drek…. “Kènse zoeë efkes langskómme, want veur mótte dich gewuuën efkes get vraoge?” zag dae aan de angere kantj van de lien. Dao begós mich waal get te dage en mèt ’n trillende handj en euversjlaonde sjtum waerde ’t gesjprek beëindig. “Waer ich noe veur de gek gehaje? ” vroog ich mich aaf. Later dae aovend arriveerde ich op de gevraogde lokasie. Ich keek nao binne en miene aom stokte. Ich zoog de voltallige PeeKaa binne zitte. ’t Zól toch neet éch zoe zien? Ich toch neet? Nae, ’t zal waal get angers zien, dit kèn neet. Ich waerde binne gelaote en waerde geliek door eine van de PeeKaa verweze nao ‘ne prinsheerlikke sjtool. Kortsjloeting in ‘t köpke volgde toen ich de wäörd al huurde; ze gaon mich vraoge óm Prins te waere! Ich begreep drek alles wat Bram & Ruud oeijt höbbe bedoeld met häöre LVK sjlaeger ‘de Kriebels’. Ich razelde van top toet tieën en alles wat ich nag wól zegge kwaam d’r neet mier oet wie bedoeld. ’t Waas heerlik werm binne, maar ich had kiepevel toet ónger oppe veut. Veer gezichte keke mich lachend aan toen ich aangaof det ich ’t toch waal erg sjpannend vónj waere. ’n Hieël gemeind antjwaord kwaam truuk: “veur ouch!”. Vervolges kwaam den toch éch die vraog: “Wils doe de nieje Windjbuujelprins waere veur 2020?” …. “JAO ZEKER!”, zag ich. Hieël erg väöl is mich neet blieve hange van wat de PeeKaa mich allemaol haet verteld toen. D’r ging mich zoe väöl door de kop haer. Wat ich waal nag weijt is det ’t ‘nne hieële gezellige aovend (en nach) waas en det ich twieje adjudante mós gaon vraoge. Det waas sjnel geregeld, want 14 oer naodet ich gevraog waas haje ‘links’ en ‘rechs’ razend enthousiast ‘jao’ gezag en waas mien trio compleet. Örges gluive veur ’t nag sjteeds neet gans: Veur drieje ‘t Windjbuujeltrio? Hoeëgheid en Adjudanten 2020… Kèn ‘t gekker? `t Sjpel is in idder geval begós en veur gaon uiteraard ós sjtinkende bes doon om ós geheim te haje. Maar of det geit lökke…? Ouch noe, ónger ‘t sjrieve van dit daagbookdeil, razel ich. Hieël väöl enthousiasme (en ouch waal sjpanning) maak zich in mich los. Veur zette veurluipig in idder geval de Toeters & Belle nag efkes oet. Maar vanaaf ’t Prinsebal op 8 fibberwarie 2020 gaon die aan! De Nieje