Lekker windje, lekker zunke, lekker waerke. ‘t Waer is noe nag get onsjtuimig, maar … veuralsnag zien d’r gen raejene óm ózze groeëte optoch aaf te laste. Vanaaf 13.30 oer sjtart de optoch in Offebèk. De optoch óntbindj oppe mert in Ruiver. En haopelik sjient den ouch ‘t zunke. Toet sjtraks.
Opsjtelling groeëte optoch 2019
Lekker zunke, lekker windje, lekker waerke. Haopelik kènne we dao mèt de vastelaovesdaag ouch op raekene. Zeker as we de optochte moge loupe. De (veurluipige) opsjtelling veur de groeeëte optoch en mieër informasie vinjt geur in de aafbeelding bie dit berich.
Verkoup De Windjbuujel
Dónderdig 21 fibberwarie vindj van 18.00 tot 20.00 oer de hoes-aan-hoes verkoup van de Windjbuujel plaats. De windjbuujel kost 4,- euro en is ouch te koup biej de Bruna en Welkoop
’t Is zoe wieët
Leef Windjbuujelinnekes en Windjbuujels, Euver ‘n kleine 10 uurkes is ’t zoe wieët. De sjpanning is óngekend! Veur det ’t zoeë wiët is, zal ich nag dök nao ’t kleine kaemerke mótte. Maar good, det sjient d’r bie te huuëre. Elk jaor op de daag van ’t Prinsebal zegk ich taege mien vruijke: “d’r zitte d’r drie in sjpanning vandaag.” Dit jaor zien veur det! Waem had det gedach! Wat höbbe veur al ‘ne geweldig sjieke tiëd achter de rök. ’t Moment det ich gevraog waerde, ’t geweldige niejs vertelle aan mien vruijke, ’t veurlaeze van de gedichte mèt dao in de vraog aan mien adjudante, al die geheimzinnige en gezellige vergaderinge mèt de PeeKaa en ’t verzinne van al die smoesjes. Sjtök veur sjtök ónvergaetelikke momente. Ich realiseer mich det ich aan de veuraovend sjtaon van ein unieke ervaring. Det ich Vastelaovend gaon viere zoeë as ich det nog noeëjts höb gedaon. Det ich nie miense lieër kènne en aaj bekende weer zal sjpraeke. D’r zalle momente kómme mèt ‘ne lach en wellich ’n traon, momente die depe indrök make, momente die ich noeëjts mieër zal vergaete. Ich bön den ouch ontzettend gruuëts det ich dit jaor Prins moog zien van de Windjbuujels en det ich uch veur moog gaon in dae prachtige Vastelaovend dae de Ruiver rieëk is. Ich haop van herte det veur d’r same ’n geweldig fieës van gaon make. Det ich op Vastelaovesdinsdig mien vruijke en mien adjudante Cor en Don nog eine kieër sjtevig vas kèn pakke en mèt waterige uigskes kèn zegge: dit waas sjiek. Dit waas uniek! De landing is ingezatte. Nag efkes en den sjtaon veur weer mèt beide bein oppe gróndj. ’t Waas ’n turbulente reis, maar de besjtumming is bereik. De verf is druuëg en hotel de Windjbuujel is opgeleverd! Sjtrakkes zalle veur ós hotelkamers in gaon nimme, maar ieërs nag ’n sjpannend en óngetwiefeld geweldig Prinsebal!Nag efkes naegel biete en den kènne veur ós de handj sjödde en ’n glaeske drinke. Ich kèn uch verzekere. Veur zien d’r klaor veur en höbbe d’r ontzettend väöl zin in. Toet sjtrakkes!Trio 2019!
Windjbuujelhijsse
Aansjtaonde zóndig is ’t Windjbuujelhijsse neet oppe Merret veur ’t gemeintehoeës maar op ’t plein bie ’t aad raodhoes. Om 13:49 zal ’t hijsse plaatsvinje. Op vastelaovesdinsdig mèt is ’t windjbuujelsjtrieke ouch op ’t plein veur ’t aad raodhoes. We sjtartte den óm 23:49.
PLUS aktie
Vanaaf vandaag kènt geur ug kassabónne bie de PLUS scanne veur de Windjbuujels!
Groeëte optoch, vastelaovesmaondig 4 mieërt
Op vastelaovesmaondig 4 mieërt a.s. trek d’r weer de groeëte optoch door ‘t Windjbuujelriek. De optochte sjtart óm 13.30 oer. ‘t Opsjtelle vinjt plaats oppe Keulsewaeg vanaaf de Beukelsjtraot toet de Beatrixsjtraot, waobie de nummer 1 bie de kruutsing Keulsewaeg – Beukelsjtraot – Theresiasjtraot sjteit en ’t hoeëgste nummer richting de Beatrixsjtraot. De deilnimmers kènne tösse 12.30 oer en 13.15 oer veurbie Keulsewaeg 108 (veurmalige bekkerie) loupe wao de jurie sjteit opgesjteld óm ’n ierste beoerdeiling oet te veure. Dit geldt neet veur de praalwages. Dees sjtelle zich op bie de kruutsing Keulsewaeg / st. Theresiasjtraot / Beukelsjtraot. De optochroute löp via de Keulsewaeg, Riekswaeg linksaaf, toet veurbie de merret en den rechsaaf ’t Raodhoesplein op. Hie waert de optoch óntbónje en aansjloetend aan de optoch vinjt oppe merret de priesoetreiking van de groeëte optoch plaats. De nieje Hoeëgheid van ’t Windjbuujelriek nimp oppe Merret in Óffebek ’t defilé aaf. Nao aafloup van de priesoetreiking kènt geur terech veur de afterparty in de tent bie kefee Ronckenstein. Wilt geur meidoon aan de optoch kèn det door invulling van ’t insjriefformulier. As geur neet mei wilt of kènt doon, zeuk uch den ’n lekker plekske naeve de route en geniet van die sjieke creaties die de optochdeilnimmers bedinke en make.
Laot de vastelaovend maar kómme
Nao det mien adjudante Cor en Don ein sjoeën daagbookdeil gesjreve höbbe kèn ich netuurlik neet achterblieve mèt weer ‘n nie sjtökske. En jao, netuurlik bön ich al waeke de waeg kwieët. Det is ouch neet vraemp, ich sjtaon op ’t punt om de nieje Prins van de Windjbuujels te waere! Inmiddels waere sjteeds mieër hotelkamers ingenaome door Hoeëghede. Zoeë haet Jeugprins Lucas I ‘n prachtige kamer met Gucci behang en bie Bacchus Jeroen op de kamer sjient d’r beer oet de kraan te kòmme! Geur höb de sjpanning van ’t oetkòmme al achter de rök, terwiel bie mich en mien adjudante de razel noe pas ech begint. Net as mien adjudante wil ich uch uiteraard ouch van herte felicitere! Geniet mèt volle teuge van de kómmende tied en det ‘mèt volle teuge’ zal veur Jeroen gèn probleem zien liek mich. Helaas is ’t Marina net neet gelök óm in de finale te kómme. Maar de Ruiver is waal weer ‘n prachtige vastelaovesballade rieker! Veur zalle ‘Vastelaovend bedank’ met die daag ongetwiefeld nag dök veurbie huuëre kómme en oet volle bors meizinge. En net zoe as veur veur Marina òs doeme blauw gedreid höbbe, doon veur det uiteraard ouch veur Jitske en Mara as zie in de finale van TVK Limburg sjtaon en veur Guusje, Bibi en Pieke veur de finale van ’t KVL. @Pieke: Sjtel des se wins, den weit ich zeker det pap dich weer op de nek nimt! Wat zal opa en oma Linssen trots zien mèt zoe väöl kleinkinjer in de finales! Aafgelaope weekend höb ich, tösse de traone van ’t lache door, ‘ns good óm mich haer gekeke. In gedachte zoog ich mich al baove op det bühne sjtaon mèt dae mantjel en die vaere en op de achtergróndj die bekende gezichte van de Raod van Ellef. Wat mót det ‘n geweldig geveul zien óm veur die men te moge sjtaon en veurop te moge gaon in ’t fieësgeweld. ’t Mót toch emes opgevalle zien det ich de ganse aovend höb zitte dreije op dae stjool van de zenuwe! Of… waas dit alles ouch ‘ne druim? Nag twieje waeke vol haje, nag twieje waeke ‘droeëme mèt de oege aope’ (want sjlaope waert sjtaeds lastiger) veur det veur los kènne. Toet sjlot wil ich Prins Joep II en zien adjudante Twan en Roy hieël väöl sjterkte winse kòmmend wiekend mèt ’t opnimme. Geur höb ’t geweldig good gedaon, ich höb van uch genaote! Maar ierlik gezag kèn ich bienao neet wachte óm de scepter van dich euver te nimme! Veur sjpraeke òs sjnel! Hoeëgheid 2019
Insjrieve Kinjeroptoch 2019
Op zóndig 3 mieërt trèk ózze Kinjeroptoch weer door ’t dörp. Höb geur al ein good idee? Ziet geur missjien al bezig mèt knutsele? Of höb geur nog ein lètste zetje nuuedig om mèt te doon? Idder jaor is ’t weer keigezellig en as det nog neet alles is, zien der ouch nag prachtige prieze te winne. Haaj ouch Facebook in de gate veur ’t lètste niets. Dus: MÈTDOON, en toet binnekort! Insjrieve ken via: http://www.windjbuujels.nl/kinjeroptoch/
Ierste Hoeëgheje bekend!
Aafgeloupe weekend waas ‘t zoeëwieët, de ierste Hoeëgheje in ós Windjbuujelriek kóste zich aan ‘t publiek veursjtelle. Vriedigaovend waas ‘t de beurt aan Windjbuujels’Jeug, Lucas I waerd oetgerope toet Jeugprins. Same mèt adjudante Koen en Clim viere ze deze Vastelaovend ónger ‘t motto ‘Alles Gucci’. Zaterdigaovond waas ‘t podium veur Bacchus Jeroen I en zien Bacchusklöp. Zien motto is: ‘De Ruiver te toep, Te toep de Ruiver!’