Nao zo’n sjoeëne aankondiging van ózze aankómmende Hoeëgheid zien veur bliej dèt veur eindelik ouch in de pen kènne klumme. Geluif ós dèt velt nag neet mei. Wie kènse dèt geveul dèt veur al waeke in ós koffers meisjleipe ónger wäörd bringe. Veur mótte ierlik bekènne det dae nieje det in idder geval good aafgeit. Wat sjteit d’r väöl te gebeure en wat kump d’r allemaol op ós aaf?!? Vanwaege de sjpanning drinke veur d’r nag maar eine same, maar dèt baat ós ouch al neet. Dae nieje neump ós leefkozend ‘zien reisleiders’ op waeg nao hotel de Windjbuujel. Dae beste miens is al waeke de waeg kwieët en kèn bliej zien met zó’n ervare reisleiders. Dèt zal nag neet meivalle óm ózze Hoeëgheid al die daag de goeije kantj op te sjture. Veur haope den ouch op de hulp en biejdrage van uch allemaol. De Vastelaovend laef, det merke veur aan alles. De sjoeële zien volop bezig om alles weer geregeld te kriege. De mansluuj- en de vrouwluujzitting ware good bezóg en gesjlaag. De sjtumming richting de vastelaovend kump d’r sjteeds baeter in. Nag èfkes en dèn sjtaon de Buutteaovend en de Sjterzitting op ’t reisprogramma. Hiejveur zien euveriges nag inkele kaarte besjikbaar. Dètzelfde weekend is ouch nag de Kinjerzitting wao de jongste Windjbuujels alves van de vastelaovend kènne geniete. Veur as reisleiders vinje al dèt geregel netuurlik prachtig óm te zeen. Oeteindelik is ’t ós doelsjtelling óm ‘t idderein zoeë good meugelik nao de zin te maake. Van groët toet klein en van jongk toet aad. Idder belaef zo’n reis op zien eige maneer, mèr same mósse d’r ’ne sjoeëne tied van maake. In Hotel de Windjbuujel is plaats veur idderein! Veur, as adjudante, zien netuurlik waal hieël erg gruuëts dèt veur ’n kamer zoeë doeën biej ózze Hoeëgheid höbbe kènne kriege en wat zien veur bliej dèt ‘t de Windjbuujels is gelök om zó’n prachtig hotel nao de Ruiver te haole. Neet met ’t vleegtuug nao vèrre oorde, maar gewuuën vekansie viere in ós eige Windjbuujelriek. De periode van vreugboekkortinge is dèn waal aafgeloupe, mèr d’r zien nag waal gèt ‘last minutes’ vriej. Boek nag sjnèl, want ‘t waert ’n onvergaetelikke reis! Zoeë langzaamaan zien al diverse Hoeëghede bekend. Veur wille Jeugprins Lucas I en Bachus Jeroen alves van herte felisitere. Det hendje en ’ne gruuëtste blik óm same in de vastelaovend veur te kènne gaon kómme sjnel. Nag twieje waeke en dèn kènne veur ós ens good in de auge kieke en same ‘t glaas höffe. Veur òs zien de veurbereidinge zoeë good as klaor. De pèkskes zitte in ’t koffer en de reispapiere zien veurzeen van de juuste foto’s en sjtempels. Veur zien klaor om op reis te gaon. Veur höbbe d’r hiël väöl zin in en kènne neet wachte óm de Hoeëgheid nao ’t oetkómme de letste maeters nao Hotel de Windjbuujel te wiëze. Dae weag höbbe veur ós al oët de kop gelierd en in gedachte al tig kier geloupe. Ouch de daagexcursies mèt de Vasteloavend zien toet in de puntjes oetgewerk en verkend. Maak uch gen zörg, de Hoeëgheid zal euveral versjiene, dao zörge veur waal veur. Cor en Don

Veur zien halverwaege ós reis, ’n turbulente reis met eindbesjtumming: Hotel de Windjbuujel! Nag veer waeke te gaon toet ’t prinsebal. Ich merk det ’t vastelaovesvirus net zoeë hel óm zich haer griep as ’t griepvirus. Veuralsnag wint biej mich ’t vastelaovesvirus en ich haop det ich det veurluipig zoeë kèn haje. Links en rechs vange veur al get signale op det d’r drök gespeculeerd waerd euver de Nieje. ’t Geit nag alle kantje oet en det maak ’t veur ós extra sjpannend maar zeer zeker ouch sjoeën. In gedachte höb ich mich al dök de gezichte van sommige luuj probere veur te sjtelle op ’t moment det ich mèt mien adjudante, óngetwiefeld razelend van de zenuwe, oetkóm op ’t Prinsebal. Euver de Sjakel gesjpraoke … ’t Niejaorsconcert van de harmenie waas ouch dit jaor gesjlaag. Sjoeën óm te zeen det ’t fluiterkorps, de harmenie Ruiver en zelfs de harmenie van Beesel sjteeds mieër gaon samewerke. Det duit mien vereinigingshert good. Ich begreep waal det ’t neet väöl had gesjaeld of ózze Prins Joep II had ’t bienao aaf laote weite nao ’ne wellich iets te gezellige niejjaorsróndjgank mèt de Raod van 11. Noe kèn ich det euveriges good begriepe, want ouch veur höbbe inmiddels al ’n paar kieër moge ervare det aovende mèt de PeeKaa erg gezellig en laat waere. Laot sjtaon as dao ouch nag de res van ’t gengig gedeilte bie kump. Veur wille netuurlik ouch vanoet dees plaats Marina felisitere mèt ’t behaole van de halve finale van ’t LVK! Wat zou ’t gaaf zien as doe in de finale kums! Veur gunne ’t dich van herte! Dus miense…, vergaet neet te sjtumme! Daonaeve bös se ouch nag ein van de veer finaliste veur de CMC Alaif clip trofee. Wie sjiek is det! Hieël väöl sukses en ós sjtum höbs se uiteraard! Gelökkig kumt d’r ouch dit jaor ’n Boerebroelofsgezelsjap. ’t Zou dich toch gebeure, des se Prins waers van de Windjbuujels en det d’r den veur ’t ieërs in 55 jaor gèn Boerebroelof is! Wie jaomer zou ‘t zien as d’r kamers in Hotel de Windjbuujel laeg bleeve! Ich bön blie det d’r ouch noe weer vastelaovesleefhöbbers zien opgesjtaon en dees kèr zien gaon trekke. ’n Teiken det de vastelaovend laef in Óffebèk en Ruiver! Vastelaovend viers se same, dus wie mieër Hoeëghede wie sjoeëner! Ich weit zeker det veur d’r  met alle Hoeëghede same ‘ne ontzettend sjieke tied van make en ich kèn neet wachte om uch de handj te moge sjödde. Waem ich alves ’n spesjiaal welkom in ’t Windjbuujelriek en ’ne dieke prefisiat wil gaeve is Prins Jeffrey Brouwers en Prinses Zenna Feller. Zie zien dit jaor ’t Prinsepaar van de Borchgrave oet Roostere en ze woeëne op dit moment oppe Ruiver aan de Prinses Christinalaan. Waem wet kènne we ós ondanks ós drökke agenda’s nao de 16de fibberwarie nag urges treffe. Ós reis geit nag effe verder. Same mèt mien reisleiders, Cor en Don, geniet ich nag in relatieve rös van de kómmende sjpannende waeke. De zittinge kómme d’r aan en langzaam waert de Ruiver klaor gesjtoump veur de sjoeënste dage van ’t jaor. Veur winse Prins Joep II en zien adjudante Twan en Roy nag ‘ne prachtige tied toe. Veur zalle uch good in de gate haje en haope – net zoe wie geur det vurrig jaor kreeg – op nag get tips en tricks óm de kómmende waeke door te kómme. Cor en Don hadde veuralsnag ’n loezelaeve. Behalve det ze mich aaf en toe met allebei de bein weer op de grondj mótte zette, höbbe ze zich nag neet ech meug hove te make. Mer dao zal binnekort verangering in kómme want ze sjtaon te popele óm ouch ens ’t waord toet uch te richte. Ze zien det nieks zeggende gewazel van mich meug en bringe gaer get mieër deepgang in ’t daagbook. Ich wins häör daobie väöl sukses! As geur vraoge veur heur höb, den sjtel ze gerös, dao zien ze reisleiders veur! Väöl plezeer de kómmende tied! Hoeëgheid 2019!

Zoeë, de Körsdaag zien achter de rök. Ich kèn uch vertelle det ’t ’n hieël aparte ervaring is óm op ieërste Körsdaag as Hoeëgheid elect aan ’t fornuus te sjtaon óm de knienebatse te dreije en mich zelluf betrap op ’t feit det óndanks Sky Radio ós al waeke lang murf sjleit met Körsmuziek, ich ‘ne vastelaovessjlaeger neet kèn óngerdrökke. Zoeëdra ich mich dit good en waal realiseer sjrik ich dao toch waal ’n bietje van en kiek ich sjnel óm mich haer of de res van de femilie nieks is opgevalle. Gelökkig veel det mei. De pakke passe. Wat zuuët det gaaf oet! De manjtel en de sjteek mós ich d’r nag effe biej verzinne, maar wie ich in de winkel veur de sjpeegel sjting en achter mich de PeeKaa en mien adjudante zoog sjtaon, dwaalde ich in gedachte hieël effe aaf nao 16 fibberwarie. Ich kèn uch euveriges vas verklappe det miene nek ’n maot dieker is as dae van miene linker en rechter, maar det mótte de zenuwe zien gewaes. Det kèn neet angers. Vannach telle veur weer aaf. 2018 is den veurbie. ’n Jaor wao ich mèt vuuël plezeer op truukkiek en wat veur mich op de valreep nag ’n onverwachte verassing in petto haaj! ’n Jaor wao veur ós de lach gelökkig weer haet gewónne van de traon! Óm 00:00 oer begint veur mich, mien adjudante en ós gezinne óngetwiefeld ’n jaor wao veur vastelaovend gaon viere toet in de kleine tieën. En ouch dit jaor… hieël gaer same mèt uch allemaol! As de Ruiver vanaovend aaftelt veur ’t nieje jaor, zalle veur in gedachte doortelle nao 16 fibberwarie. ’t Kèn ós neet sjnel genóg gaon! Maak uch euveriges gen zörg, ’t nieje trio sjtik gen vuurwerk aaf… veur knalle met de vastelaovend! Toet sjloet netuurlik de beste winse veur uch allemaol! Trio 2019

‘t Is inmiddels november as Prins Joep II mèt zien adjudante Twan en Roy breid lachend bie ós de kamer in kieke… Vanoet de krantebak waal te versjtaon! Messjien waert ‘t tied om dae bak ens op te sjoeëne, flits ‘t door mich haer. Of zou ‘t ‘n veurteiken zien? Feit is det ich dees jónges nog noeijts zoe dök in de auge höb gekeke as de aafgelaupe waeke. Ich had op ‘ne late aovend ‘n aantal telefoontjes gemis en ’smorges wachtte mich ‘n geluidsfragment van de PeeKaa euver ‘n hotel wat ze veur mich geboek hadde. ‘n Hieël biezónjer hotel… Det mich dit euverkump… Ich waas ech kompleet van de wap. De vastelaovesrazel maakte zich van mich meister en ‘t duurde effe veur det ich ‘ne nieje teug zuurstof toet mich kós nimme. Neet lang daonao kreeg ich kramp in mien kake van de ‘smile’ dae, as geur good kiek, zich nag altied aafteikent op mien gezich. Op waeg nao de zaak waerde Mariah Carey de móndj gesjnoerd en mós die plaats make veur Marina. Of ich qua werke éch nuttig bön gewaes dae daag, vraog ich mich zellef waal aaf. ‘t Sjpel is begós… en det ich det noe moog sjpele. Det sjpel det duurt bies 16 fibberwarie. Den moog idderein ’t weijte det ich de Nieje bön! Uiteraard kèn ich det neet allein. Toen ich mien vruijke ‘t groeëte niejs vertelde en zien reaksie zoog, waas ‘t veur mich euverdudelik: dit waert ‘n onvergaetelikke ervaring. En den netuurlik miene Linker en miene Rechter. Wie veur die ginge vraoge, begreep ich wat de PeeKaa bedoelt met de sjpanning as se ‘de vraog’ geis sjtelle. Allebei haofde ze gén seconde nao te dinke. Häör vruijkes waerde eigelik pas nao 10 minute aangekeke of ze ’t d’r ouch mèt ens ware. ‘t Trio 2019 is compleet. De koffers zien gepak. De ieërste hotelkamers van Hotel De Windjbuujel zien geboek! Ich bön d’r van euvertuug det dit Hotel binne de kortste kiere is volgeboek met hieël väöl Ruiverse luuj die same mèt ós d’r ‘ne ónvergaetelikke vasteloavond van wille make. As ich zeen wat d’r de aafgelaope waeke aan Ruivers talent al van zich haet laote huuëre den weit ich zeker det ‘t super gezellig waert in de hotellobby. Elke morge zalle veur wakker waere en dinke: “Laot ós vandaag laeve asof morge neet besjteit…” “Feng nag eine” zal ein gevleugelde oetsjpraak waere aan de hotelbar as de hiere van de EPS zich dao nestelle, omringd door blage die same met Jur de sjlaeger “Vastelaovend is cool” zinge. Óm tensjlótte in de kleine uurkes erm in erm aaf te sjloete met “Vastelaovend Bedank” gezónge door Marina. Wat bön ich gruuëts det veur mich in dit hotel ‘t penthouse is geboek! Ós reis is begós, bie elke tössesjtop zalle veur uch op de huuëgte haje van dees reis. Veur noe winse veur uch hieële sjoeëne, leefdevolle Körsdaag en ich gun idderein ‘n net zoe biejzónjer 2019 as wie det veur ós ongetwiefeld geit waere! Hoeëgheid 2019 van de Windjbuujels!