Veur kènne de daag gaon aaftelle!
Noe de fieësdaag en de Körsborrels verleje tied zien, kènne veur vol gaas op nao 15 fibberwarie. Ich kèn uch mitdeile det dit trio d’r ontiegelik väöl zin in haet. ‘t Kèn neet sjnel genog gaon toet 15 fibberwarie. Veur make ós al zoeëväöl veursjtellinge euver wat ós te wachte sjteit. Prinsebal mèt – as veur de Peekaa moge geluive – ‘n sjieke oetkomact en netuurlik bouwe we ‘n vastelaovesfieës mèt de band Stout. Den daags d’r op nag ’t Windjbuujelhijsse, ‘t Jeugprinsebal in Óffebek, de resepties, sjleuteleuverdrach, optochte, ós eige thoesgebeure enz, enz. Maar veur höbbe ouch genaote van ‘n sjoeën Mansluujzitting van ’t Trommel- en Fluiterkorps.
Verder höbbe veur weer geheime bieeinkomste gehad en kump ’t plaetje zoëwie alles geit loupe, d’r sjteeds mieër kompleet oet te zeen. Gelökkig viere veur al ‘n paar jaor Vastelaovend en waere veur door de Peekaa klaor gesjtoump veur al die vastelaovesaktiviteite. Noe veur in ’t nieje jaor zitte, bön ich ouch gaon switche van meziek, Maria Carey, Queen en Flappie droet en op nao Spik en Span, Pruuf Mar, DEH, Rempetemp, W-Dreej en alle euverige LVK (halve) finaliste. En ózze eige Ruiverse vastelaovesmeziek netuurlik. As ’t efkes kèn, de uurkes in en heerlik genete van al dae Vastelaovesmuziek.
Langkzaam aan waert ’t ouch sjpannend veur de angere nieje Hoegheje in ós Windjbuujelriek. Ich bön erg beniejd waem ’t allemaol geit waere. Waem waert de ieërste nieje Hoegheid? Krieg Windjbuujels’ Jeug ‘nne Prins of een Prinses? Waert ’t weer ‘ne jonge vent as Bacchus of kriege veur de ieërste vrouwelikke Bacchus?
Wat zalle die Hoegheje al zenuwachtig zien want 24 en 25 jannewarie moge zie zich presentere aan de Ruiverse gemeinsjap bie ós residentie Ronckenstein. En den neet te vergaete, ’n waek veur ’t Prinsebal, ’t Boerebal, waem waert ’t nieje Boerebroedspaar mèt de Boerebroeloffemilie?
Noe de letste waeke veur ’t oetkómme zien aangebraoke, gaon ich mich good veurbereije op de letste sjtökskes tèks die nag gesjreve motte waere, de veurbereidinge veur ’t thoesgebeure, diverse lieskes make veur speciale gelegenheje, zörge det ’t thoesfront de witte bloeze haet gesjtreke, ’t pak klaor hingk, de sjoon nag ens extra poetse, nag ‘n kapper aafsjpraok make en den nao ’t oetkómme nag ff kieke as veur motte helpe mèt ’t oprume van dae berg mèt klinkers oppe Keulsewaeg want die ligke toch éch in de waeg veur de optochte.
As ich euver de Ruiver en door Offebek fiets den zeen ich die lantaarnpäöl mèt die sjoeën roed-gael-greune Prinsemötse al aan de päöl hange. Wat sjiek det Óffebek en Ruiver jaorliks zoë sjiek waere versierd.
Ich wins uch alvas väöl plezeer bie de kómmende evenemente, buutteaovend en zittinge. En haopelik zien veur neet allein bezig mèt veurbereidinge veur de Vastelaovend maar ziet geur ouch al volop bezig mèt ongetwiefeld sjieke kreaties veur de (kinjer)optoch.
Net veur 15 fibberwarie laot ich same met A1 en A2 nag weite as veur as trio en aanhang d’r veur de volle 111% klaor veur zien.
Groet,
Windjbuujelprins 2025
