Leef luuj, zoewel windjbuujels as windjbuujelinne, boere as boerinne, dörpse as neet-dörpse!
Wat is ‘t aafgeloupe waeke lastig gewaes door al die luuj die ós ’t vuur aan de sjene höbbe gelag. Bie de zittinge waar ’t mei al zjweite, dus höbbe veur de bal mer get truuk probere kaatse. En de hierezitting waar ouch genne gemekkelike. Boete det d’r genóg gedrónke waar, mer dao höbbe v’r ós ouch good óngeroet kènne wazele. Daonao ‘ne friet van Keube waas ouch óm te sjmulle. Eigelik is det dus waal gelök allemaol.
En wat meint geur van aafgeloupe zaoterdigaovend, wie ze hie oppe Ruiver häöre nieje hoeëgheid geprizzenteerd krege. Wat ein sjitterend spektakel kwaam dao teveursjien. Dus veur gaon d’rvan oet det idderein mèt dit grandioze trio vas waal kèn fieëste wies de haan kreit! Nao aafgeloupe weekend bliek waal det de lies in de lak is gezatte en oetgehardt, de verf op de achtergróndj van ’t canvas is opgedruuëg. Op ein sjoeën zjwart-wit heukske nao is nag get plaats op ’t dook, wao veur oeteindelik nag oetgesjtreke waere, mer verder höbbe alle hoeëghede häör sjnoet, kleure en häöre sjteek gekregen. En dit jaor zien de veurgengers oet ‘n anger vaetje getap. Dit veel van teveure netuurlik neet te plenne, mer dit geit ein joeksig fieës waere, en veur weite allemaol wat joeks geuf. Veur sjtaon den ouch ech te trappele van spanning, want a.s. zaoterdig kómme veur den eindelik oet as Boerebroedspaar 2024 same mèt ós gezelschap.
En dit is neet ’t ierste ’t beste boeregezelsjap. Nae, dit gezelsjap is oet verschillende weie, velde en modder gesjleip. Euveral wao se plat kós kalle, zien veur de boeremerte aafgegange óm dae sjtal te völle: paerd oet Remunj op de trailer gelaje, kuuj oet Zjwame van ’t sjtruje getrókke, badderende verkes van de angere kantj van de Maas,(wetse waal; dae foute kantj), get geite van de Venraojse kantj aangesjaf, get kuukes oet Belvendse kiepe-eier hierop gehaold, en jao, zelfs drake, oet Beesel, BEESEL! Aan al dit sjoeën bie-eingeraapde vieje höbbe veur duchtig mótte riete en duje om det fetsuunlik in ’t geriel te kriege. Hingste en merries efkes gesjeie haje en in ‘n paar aparte sjtalle neergezat, aangezeen die zich has neet in kóste haje en nag mier van det gezoks. Mer naodet de meiste lammere gewórpe zien en al ’t jónk grut ouch richting ’t ierste veurjaor geit, kènne veur zègke det alles is gelök óm mèt det vieë, alle hoeëgheden en mèt idderein dae wat mèt ós mei wilt doon, good aan te gaon de kommende tied!
Daaróm gaon veur de lètste paar daag veurdet veur vastelaovend gaon viere iers nag efkes ’t landj op óm te kieke of dae vors noe ouch ech te goei d’reuver is gegange, ’t moos al de gewinste kleur op ’t blaad haet, euver de plaats haer óm te kieke of de kezele rech aangeherk zien, of de haof te goei gesjoeffeld is, alle gereidsjappe in de sjuur zien gesjmete, zorge det de trog van de verkes en geite gevöld is mèt voor, de kuuj gemolke zien en weer op ’t sjtruje ligke, de paerd besjlage en ingevlochte zien, de paad gekaerd is, de bagger van de sjtevele aaf is, de mès in de koel lik te dampe, en det de buujel en de vlag oethange.
As det allemaol geregeld is, en v’r d’r has klaor veur zien, kènne veur d’r langzamerhandj waal vanoet gaon det v’r ’t volgende weite: De Sókkerome haet gezorg veur ein good gevölde portemonnee, die wat euveral mei naotoe geit. Ós Sirremoniemeisteres haet de sjmik oet ’t vet gehaold, want det is wao die gaer mei zjweit. De Ambtenaar is d’r ouch klaor veur as ’t mer 15.00 oer gewaes is. De Troubadour haet zien dwarse fluit bie zich, want zónger die fluit geit det altied mis. Meneer de Börgemeister haet zien zilvere ketting gepoets, zoedet die good blink. Ós getuge höbbe get sjmaer op häör hekskes en sjoon gesjmaerd mer ouch in häöre kael, zoedet det zinge ouch ein bietje good klink. Haopelik geit ózze Veldwachter op ziene koes den nog effe sjpienze of d’r gen omgezaegde buim oppe waeg ligke tösse moder Maas en de kevent.
En as lètste wille veur uch noe alvas winse mer zeker ouch mèt ug viere; eine sjoeëne vastelaovend!
Boerebroedspaar 2024
